શ્રીલંકામાં ચક્રવાત ‘દિત્વા’એ વેર્યો વિનાશઃ એનડીઆરએફની ટીમ બની ‘રક્ષક’, જયશંકરે શેર કર્યો વીડિયો

કોલંબો: ‘દિત્વા’ ચક્રવાતે શ્રીલંકામાં વિનાશ વેર્યો છે. ચક્રવાતના કારણે શ્રીલંકાના અનેક વિસ્તારોમાં ભૂસ્ખલનની ઘટનાઓ ઘટી રહી છે, જેમાં અનેક લોકો અસરગ્રસ્ત થયા છે. ભીષણ ચક્રવાતને કારણે અનેક શહેરોની ઇમારતો કાટમાળમાં ફેરવાઈ ગઈ છે, જેનાથી મોટી જાનહાનિ થઈ છે. અચાનક આવેલી આ કુદરતી આપત્તિમાં 150થી વધુ લોકોના મૃત્યુ થઈ ચૂક્યા છે. જેને લઈને શ્રીલંકાના રાષ્ટ્રપતિ અનુરા કુમારા દિસાનાયકે કટોકટી લાગુ કરી છે. આ સંજોગોમાં ભારત પડોશી દેશની મદદ કરવા માટે ‘ઑપરેશન સાગર બંધુ’ શરૂ કર્યું છે. આ ઑપરેશન હેઠળ સેનાના બે વિમાનો મારફતે 21 ટન રાહત સામગ્રી શ્રીલંકામાં મોકલવામાં આવી છે, જ્યારે સેનાના જવાનો પણ હનુમાન બનીને લોકોને મુશ્કેલીમાંથી ઉગારી રહ્યા છે.

રેસ્ક્યૂ ઑપરેશનમાં જોડાઈ NDRF ટીમ

‘ઑપરેશન સાગર બંધુ’ હેઠળ ભારતથી NDRF ટીમની એક 80 જવાનની ટુકડી પણ મોકલવામાં આવી છે. શ્રીલંકા પહોંચતાની સાથે જ તમામ 80 જવાન ચક્રવાત અને ભૂસ્ખલનથી અસરગ્રસ્ત વિસ્તારોમાં લોકોનું રેસ્ક્યૂ કરવામાં જોડાઈ ગયા છે. જેના વીડિયો અને ફોટો વિદેશ પ્રધાન જયશંકરે સોશિયલ મીડિયા પ્લેટફોર્મ પર શેર કર્યો છે.

હાઈ કમિશન ઓફ ઇન્ડિયાના એક્સ હેન્ડલ પર શેર કરવામાં આવેલા વીડિયોમાં જોઈ શકાય છે કે હેલિકોપ્ટર અને બોટ દ્વારા NDRFના જવાનો લોકોનું રેસ્ક્યૂ કરી રહ્યા છે. પાણીમાં ફસાયેલા લોકોને હેલિકોપ્ટર દ્વારા એરલિફ્ટ પણ કરવામાં આવી રહ્યા છે. વીડિયોમાં NDRFના જવાનોની નિડરતા અને બહાદુરી જોવા મળી છે, જ્યારે સોશિયલ મીડિયા પર લોકોએ તેમના વખાણ પણ કર્યા છે.

જરૂરિયાતમંદ લોકોને રાશન અને જરૂરી સામાન પહોંચાડવામાં આવી રહ્યો છે. ભારતીય વાયુસેનાએ જણાવ્યું છે કે, ‘પહેલા પડોશી’ની નીતિને મહત્ત્વ આપતા ભારત આ મુશ્કેલીના સમયમાં શ્રી લંકા સાથે મજબૂતીથી ઊભુ રહ્યું છે.

ડીએમસીના જણાવ્યાનુસાર શ્રી લંકાની 798 રાહત શિબિરોમાં 27, 494 પરિવારના 1,00,898 લોકોએ આશરો લીધો છે. જોકે, આ કુદરતી આપત્તિને કારણે મૃતકોની સંખ્યા વધીને 153 થઈ ગઈ છે. 191 લોકો ગુમ થઈ ગયા છે. જેમની શોધખોળ ચાલી રહી છે. કુલ 25 જિલ્લામાં 2,17,263 પરિવારોના 7,74,724 લોકો આ કુદરતી આપત્તિથી પ્રભાવિત છે.

આ પણ વાંચો…શ્રીલંકામાં 150નાં જીવ લીધા બાદ ‘દિતવાહ’ વાવાઝોડું તમિલનાડુ-પુડુચેરી પર ત્રાટકશે, તંત્ર હાઈ એલર્ટ પર