ધરમપુર: વડા પ્રધાન નરેન્દ્ર મોદીએ ગુજરાતના મુખ્ય પ્રધાન તરીકેના કાર્યકાળ દરમિયાન 2003માં ચિંતન શિબિરની શરૂઆત કરાવી હતી. ત્યારથી આ શિબિરનું સમયાંતરે આયોજન થતું આવ્યું છે. તાજેતરમાં વલસાડ જિલ્લાના ધરમપુર ખાતે આવેલા શ્રીમદ રાજચંદ્ર મિશનની પવિત્ર ભૂમિ પર ત્રી-દિવસીય 12મી ચિંતન શિબિરનું આયોજન કરવામાં આવ્યું હતું. 29 નવેમ્બર 2025ના રોજ આ ચિંતન શિબિરનો સમાપન સમારોહ યોજાયો હતો. જેમાં મુખ્ય પ્રધાન ભૂપેન્દ્ર પટેલે ગુજરાતને 2047 સુધીમાં ગુજરાતને કયા પ્રકારનો વિકાસ કરવો છે, તેનું લક્ષ્ય જણાવ્યું હતું.
ચિંતન શિબિરે સાર્થક પરિણામો આપ્યા
12મી ચિંતન શિબિરના સમાપન સમારોહને સંબોધતા મુખ્ય પ્રધાન ભૂપેન્દ્ર પટેલે જણાવ્યું હતું કે, 2047 સુધી ‘વિકસિત ગુજરાત’ના લક્ષ્યને પ્રાપ્ત કરવા માટે ‘સારી કમાણી-સારું જીવન’ના મંત્રને ‘સારો વિચાર-સારું કાર્ય’થી પ્રેરિત ગાઢ બૌદ્ધિક સહકાર સાથે આગળ વધારવો જોઈએ. અધિકારીઓએ પોતાની ફરજોનું પૂર્ણ સ્વામિત્વ, સમર્પણ, જવાબદારી અને લોક કલ્યાણ પ્રત્યે પ્રતિબદ્ધતા સાથે નિર્વાહન કરવું જોઈએ.
મુખ્ય પ્રધાન ભૂપેન્દ્ર પટેલે આગળ જણાવ્યું કે, 2003માં જ્યારે વડા પ્રધાન નરેન્દ્ર મોદી રાજ્યના મુખ્ય પ્રધાન હતા, ત્યારે તેમના દ્વારા શરૂ કરવામાં આવેલી ચિંતન શિબિરની પહેલે ટીમ ગુજરાતની સખત મહેનત અને લોકહિત માટેના સામુહિક વિચારને કારણે સાર્થક પરિણામો આપ્યા છે.
ગામડાઓને ગરીબીમાંથી બહાર લાવવા પડશે
2003માં તત્કાલિન મુખ્ય પ્રધાન નરેન્દ્ર મોદીએ પહેલી ચિંતન શિબિરમાં આપેલા ભાષણનો ઉલ્લેખ કરીને મુખ્ય પ્રધાન ભૂપેન્દ્ર પટેલે જણાવ્યું હતું કે, “આપણો દૃષ્ટિકોણ સંકલિત હોવો જોઈએ. આપણે ગામડાઓને ગરીબીમાંથી બહાર લાવવા પડશે, જેથી એક પણ પરિવાર ગરીબી રેખાની નીચે ન રહે. જેમ જેમ ભારત 21મી સદીમાં આગળ વધી રહ્યું છે, આપણું સામુહિત યોગદાન તેને ભારતની સદી બનાવવામાં મદદ કરશે. આ માત્ર એક રાજનીતિક અથવા અધિકારિક કાર્યક્રમ નથી, આ માનવતાના ઉત્થાન માટેનો એક નાનકડો પ્રયાસ છે.”
