નવી દિલ્હીઃ લોકસભાની ચૂંટણી પહેલા ભારતીય જનતા પાર્ટીના સાંસદ ગૌતમ ગંભીરે મોટો નિર્ણય લઇને બધાને ચોંકાવી દીધા છે. પૂર્વ ભારતીય ક્રિકેટર અને બીજેપી સાંસદ ગૌતમ ગંભીરે શનિવારે પોતાના X એકાઉન્ટ પર ટ્વીટ કરીને રાજકારણમાંથી તેમની દૂરીનો સંકેત આપ્યો હતો. તેમણે કહ્યું છે કે મેં પાર્ટી અધ્યક્ષ જેપી નડ્ડાને મારી રાજકીય ફરજોમાંથી મુક્ત કરવા વિનંતી કરી છે.
ગૌતમ ગંભીરે લખ્યું છે કે, ‘મને લોકોની સેવા કરવાની તક આપવા બદલ હું વડાપ્રધાન નરેન્દ્ર મોદી અને ગૃહમંત્રી અમિત શાહનો હૃદયપૂર્વક આભાર માનું છું. જય હિંદ!’
મેં પાર્ટીના માનનીય પ્રમુખ @JPNadda જીને વિનંતી કરી છે કે તેઓ મને મારી રાજકીય ફરજોમાંથી મુક્ત કરે જેથી હું મારી આગામી ક્રિકેટ પ્રતિબદ્ધતાઓ પર ધ્યાન કેન્દ્રિત કરી શકું. મને લોકોની સેવા કરવાની તક આપવા બદલ હું માનનીય PM @narendramodi જી અને માનનીય HM @AmitShah જીનો હૃદયપૂર્વક આભાર માનું છું. જય હિન્દ!
ગૌતમ ગંભીર હાલમાં ભાજપની ટિકિટ પર પૂર્વ દિલ્હીથી લોકસભા સાંસદ છે. ગૌતમ ગંભીર T20 વર્લ્ડ કપ 2007 અને ODI વર્લ્ડ કપ 2011માં ભારતીય ટીમનો સભ્ય રહી ચૂક્યો છે. ગૌતમ ગંભીરે બંને ટૂર્નામેન્ટની ફાઇનલમાં ભારતીય ટીમ માટે મેચ વિનિંગ ઇનિંગ્સ રમી હતી. ગંભીરે T20 વર્લ્ડ કપની ફાઇનલમાં 54 બોલમાં 75 રન બનાવ્યા હતા. તે જ સમયે, ODI વર્લ્ડ કપની ફાઇનલમાં તેના બેટમાંથી 91 રન આવ્યા હતા. ગંભીર હાલમાં IPLમાં કોલકાતા નાઈટ રાઈડર્સ (KKR)નો મેન્ટર છે. તે લખનૌ સુપર જાયન્ટ્સ (એલએસજી)ના મેન્ટર પણ રહી ચૂક્યા છે.
ગૌતમ ગંભીર 2019ની લોકસભા ચૂંટણીમાં ભાજપની ટિકિટ પર પહેલી વાર મેદાનમાં ઉતર્યા હતા. પૂર્વ દિલ્હીની સીટ પર મોટા માર્જિનથી જીત મેળવી હતી. તેઓ AAPના આતિશી અને કોંગ્રેસના નેતા અરવિંદર સિંહ લવલીને હરાવીને 3 લાખ 90 હજારના જંગી માર્જિનથી જીતીને લોકસભામાં પહોંચ્યા હતા. ભાજપ દ્વારા ટૂંક સમયમાં જ લોકસભા ચૂંટણી માટે ઉમેદવારોની પ્રથમ યાદી જાહેર કરવામાં આવનાર છે. એવા સમયે ગૌતમ ગંભીરની રાજકારણમાંથી એક્ઝિટ ચોંકાવનારી છે.
