ડિજિટલ ચૂકવણીની દુનિયામાં ભારતે હંમેશા નવીનતા સાથે આગળ વધીને વિશ્વને આશ્ચર્યચકિત કર્યું છે, અને હવે યુનિફાઇડ પેમેન્ટ ઇન્ટરફેસ (UPI) ફરી એકવાર ટેકનોલોજીની નવી ઊંચાઈઓ સર કરવા તૈયાર છે. નેશનલ પેમેન્ટ્સ કોર્પોરેશન ઓફ ઇન્ડિયા (NPCI) અને રિઝર્વ બેંક ઓફ ઇન્ડિયાએ મુંબઈમાં યોજાયેલા ગ્લોબલ ફિનટેક ફેસ્ટ 2025માં UPIમાં બાયોમેટ્રિક અને વેરેબલ ગ્લાસ-આધારિત ઓથેન્ટિકેશનની રજૂઆત કરી, જે ચૂકવણીને વધુ ઝડપી અને સરળ બનાવશે.
બાયોમેટ્રિક ઓથેન્ટિકેશનની શરૂઆત
UPI વપરાશકર્તાઓ હવે પરંપરાગત ચાર/છ અંકના પિન ઉપરાંત ફિંગરપ્રિન્ટ, ફેશિયલ રેકગ્નિશન અથવા વેરેબલ ગ્લાસ જેવી બાયોમેટ્રિક ટેકનોલોજીનો ઉપયોગ કરીને ચૂકવણી કરી શકશે. આ નવી સુવિધા હેઠળ, ટ્રાન્ઝેક્શન વપરાશકર્તાના ડિવાઇસ પર જ થશે, જેથી સંવેદનશીલ માહિતી ફોનની બહાર નહીં જાય. આ ઉપરાંત, એનપીસીઆઈએ યુપીઆઈ લાઇટ ફીચરની પણ રજૂઆત કરી, જે વેરેબલ સ્માર્ટ ગ્લાસ દ્વારા નાની રકમની ચૂકવણીને સંપૂર્ણપણે હેન્ડ્સ-ફ્રી બનાવશે, જેમાં માત્ર વૉઇસ કમાન્ડ અને ક્યૂઆર કોડ સ્કેનથી ટ્રાન્ઝેક્શન પૂર્ણ થશે.
યુપીઆઈ લાઇટ અને હેન્ડ્સ-ફ્રી ચૂકવણી
યુપીઆઈ લાઇટ એ એક એવી સુવિધા છે, જે નાની રકમની ચૂકવણી માટે પિન કે અન્ય ઓથેન્ટિકેશનની જરૂર વગર કામ કરશે. ખાસ કરીને વેરેબલ સ્માર્ટ ગ્લાસ વપરાશકર્તાઓ માટે આ ફીચર ગેમ-ચેન્જર સાબિત થશે. આમાં વપરાશકર્તાઓ ફોન કે ટચ વગર, ફક્ત વૉઇસ કમાન્ડથી ચૂકવણી કરી શકશે. આધારની બાયોમેટ્રિક સિસ્ટમનો ઉપયોગ કરીને, જેમાં ફિંગરપ્રિન્ટ, આઇરિસ અને ફેસ ડેટા સામેલ છે, ટ્રાન્ઝેક્શનની સુરક્ષા અને ચોકસાઈ સુનિશ્ચિત કરવામાં આવશે.
મલ્ટી-સિગ્નેટરી યુપીઆઈ ફીચર
એનપીસીઆઈએ યુપીઆઈની એક નવી સુવિધા પણ રજૂ કરી છે, જેમાં સંયુક્ત ખાતાધારકો (જેમ કે પરિવાર કે વ્યવસાયના ખાતા) ચૂકવણી માટે એક કે વધુ વ્યક્તિઓની મંજૂરી લઈ શકશે. આ ફીચરથી સંયુક્ત ખાતાઓનું સંચાલન વધુ પારદર્શક અને સરળ બનશે. રિઝર્વ બેંક ઓફ ઇન્ડિયાએ પરંપરાગત પિન ઉપરાંત નવી ઓથેન્ટિકેશન પદ્ધતિઓને મંજૂરી આપી છે, જેના પગલે આ નવીનતાઓ શક્ય બની છે.
આ પણ વાંચો…ટોલ ટેક્સ પર મોટી રાહત! FASTag નથી? તો પણ UPI થી પેમેન્ટ કરવા પર બચશે પૈસા, જાણો નવો નિયમ…
