‘કોરોનાથી સાવચેત રહો, ગભરાવાની જરૂર નથી’: આરોગ્ય પ્રધાન
નવી દિલ્હીઃ કોરોના વાયરસ વિશ્વમાં ફરી એક વાર ફેલાઈ રહ્યો છે. વિશ્વના લગભગ 40 દેશોમાં ફરી એકવાર કોરોનાના કેસ ઝડપથી વધી રહ્યા છે. સમસ્યા એ છે કે ભારત પણ આનાથી અછૂતુ રહી શક્યું નથી. છેલ્લા 24 કલાકમાં ભારતમાં કોરોનાના 341 નવા દર્દીઓ મળી આવ્યા છે. કેરળમાંથી સૌથી વધુ કેસ સામે આવ્યા છે. છેલ્લા બે સપ્તાહમાં કોરોનાને કારણે 16 લોકોના મોત થયા છે. કોરોનાના વધતા જતા કેસોને ધ્યાનમાં રાખીને કેન્દ્રીય આરોગ્ય પ્રધાન ડો.મનસુખ માંડવિયાએ બુધવારે તમામ રાજ્યોના આરોગ્ય પ્રધાનો સાથે બેઠક યોજી હતી.
બેઠકમાં કેન્દ્રીય સ્વાસ્થ્ય પ્રધાને તમામ રાજ્યોના સ્વાસ્થ્ય પ્રધાનોને એકબીજા સાથે મળીને કામ કરવા કહ્યું હતું. તેમણે કહ્યું હતું કે, ‘આપણે સાવચેત રહેવાની જરૂર છે, ગભરાવાની નહીં.’ તેમણે હોસ્પિટલની તૈયારી વિશે પણ વાત કરી હતી અને નક્કી કર્યું હતું કે દર 3 મહિનામાં એકવાર તમામ હોસ્પિટલોમાં મોક ડ્રીલ હાથ ધરવામાં આવશે. બેઠકમાં જણાવવામાં આવ્યું હતું કે દેશમાં નવા વેરિઅન્ટ JN1ના 21 કેસ નોંધાયા છે.
નીતિ આયોગના સભ્ય ડૉ. વિનોદ કુમાર પૉલે જણાવ્યું હતું કે દેશમાં કોવિડ-19ની વર્તમાન પરિસ્થિતિ અંગે બેઠકમાં વિગતવાર ચર્ચા કરવામાં આવી હતી. આ વખતે જે આઉટ બ્રેક બહાર આવ્યો છે તેનાથી જાણવા મળ્યું છે કે નવો વાયરસ પેટા પ્રકારનો છે, જેનું વેરિઅન્ટ 2.86 છે. આ પ્રકાર એક હળવો રોગ છે. તેની ગંભીર બીમારી હજુ સુધી બહાર આવી નથી. તેમણે એમ પણ કહ્યું કે આપણે યાદ રાખવું પડશે કે કોવિડ -19 હજી ગયો નથી. WHOએ નવા વાયરસને ‘વેરિએન્ટ ઑફ ઇન્ટરેસ્ટ’ ગણાવ્યો છે.
કોરોનાના કેસો વિશે માહિતી આપતા તેમણે કહ્યું હતું કે હાલમાં દેશમાં કોરોનાના 2,311 કેસ સક્રિય છે. 5 રાજ્યોમાં કોરોના પોઝિટિવ રેટ પાંચ ટકાથી વધુ છે. સકારાત્મકતા દર કેરળમાં લગભગ 21 અને મહારાષ્ટ્રમાં 7 છે. છેલ્લા 24 કલાકમાં દેશમાં કોરોનાના 341 કેસ નોંધાયા છે અને 3 દર્દીઓના મોત થયા છે.
