નવી દિલ્હી: ભારતીય રેલવે સરકારી નોકરીની શોધમાં રહેલા યુવાનો માટે એક સુવર્ણ તક લઈને આવી છે. પશ્ચિમ મધ્ય રેલવે (WCR) એ વર્ષ 2025-26 માટે 2,865 અપ્રેન્ટિસ પદો માટે ભરતીની જાહેરાત કરી છે.
આ ભરતીની વિશેષતા એ છે કે અહીં કોઈ લેખિત પરીક્ષા કે ઇન્ટરવ્યૂ નહીં લેવાય, અને ઉમેદવારોની પસંદગી શૈક્ષણિક યોગ્યતાના આધારે થશે. આ ભરતી રેલવેમાં સ્થિર અને સુરક્ષિત કારકિર્દીની તક આપે છે, જેની સંપૂર્ણ માહિતી wcr.indianrailways.gov.in પર ઉપલબ્ધ છે.
ભરતી પ્રક્રિયા અને અરજી
પશ્ચિમ મધ્ય રેલવેની આ ભરતીમાં ઉમેદવારોની પસંદગી મેરિટ લિસ્ટના આધારે થશે, જેમાં 10મા ધોરણ અને ITI (NCVT/SCVT)ના ગુણની ગણતરી કરવામાં આવશે. અરજી પ્રક્રિયા સંપૂર્ણપણે ઓનલાઈન છે, જે 30 ઓગસ્ટ, 2025થી શરૂ થઈ છે અને 29 સપ્ટેમ્બર, 2025 સુધી ચાલશે.
ઉમેદવારોએ 10મું માર્કશીટ, ITI સર્ટિફિકેટ, ફોટો અને સહી અપલોડ કરવાના રહેશે. મહિલા ઉમેદવારો માટે અરજી ફીમાં રાહત આપવામાં આવી છે, જે મહિલા સશક્તિકરણ પર વધુ ભારે મુકે છે.
આ ભરતી માટે ઉમેદવારોએ માન્ય બોર્ડમાંથી 10મું ધોરણ ઓછામાં ઓછા 50% ગુણ સાથે પાસ કરેલું હોવું જોઈએ, સાથે NCVT/SCVT માન્ય સંસ્થામાંથી સંબંધિત ટ્રેડમાં ITI સર્ટિફિકેટ જરૂરી છે. 20 ઓગસ્ટ, 2025ના રોજ ઉમેદવારની ઉંમર 15થી 24 વર્ષની વચ્ચે હોવી જોઈએ.
SC/ST ઉમેદવારોને 5 વર્ષ, OBCને 3 વર્ષ અને PwBD ઉમેદવારોને 10 વર્ષની આયુમર્યાદામાં છૂટ આપવામાં આવશે. આ નિયમો ભરતીને વધુ સમાવેશી બનાવે છે.
આ ભરતીમાં કુલ 2,865 પદો વિવિધ ડિવિઝનમાં ફાળવવામાં આવ્યા છે, જેમાં જબલપુર ડિવિઝનમાં 1,136, ભોપાલ ડિવિઝનમાં 558, કોટા ડિવિઝનમાં 865, CRWS ભોપાલમાં 136, WRS કોટામાં 151 અને મુખ્યમથક જબલપુરમાં 19 પદોનો સમાવેશ થાય છે.
અરજી ફી માટે જનરલ/OBC/EWS ઉમેદવારોએ ₹141 (₹100 ફી + ₹41 પ્રોસેસિંગ ફી) ચૂકવવાના છે, જ્યારે SC/ST/PwBD અને મહિલા ઉમેદવારોએ માત્ર ₹41 (પ્રોસેસિંગ ફી) ચૂકવવાની છે. ચૂકવણી ઓનલાઈન માધ્યમથી જ થશે.
આ ભરતીમાં ઉમેદવારોની પસંદગી માત્ર 10મા ધોરણ અને ITIના ગુણના સરેરાશના આધારે થશે, જેમાં કોઈ લેખિત પરીક્ષા કે ઇન્ટરવ્યૂની જરૂર નથી. પસંદગી પામેલા ઉમેદવારોને Apprentices Act, 1961 હેઠળ તાલીમ માટે બોલાવવામાં આવશે.
જે દરમિયાન તેમને નિયત સ્ટાઈપેન્ડ મળશે. જોકે, આ સમયગાળા દરમિયાન રહેવાની કે હૉસ્ટેલની સુવિધા ઉપલબ્ધ નહીં હોય, અને ઉમેદવારોએ પોતાની રહેવાની વ્યવસ્થા કરવાની રહેશે.
આ પણ વાંચો…રાત્રિ પ્રવાસમાં સ્ટેશન ચૂકી જવાનો ડર થશે દૂર, ભારતીય રેલવેની આ સુવિધાનો લેજો લાભ
