‘રાજકીય લાભ’ માટે ગૃહને ચાલવા ન દેવું યોગ્ય નથીઃ અમિત શાહનો વિપક્ષ પર આકરો પ્રહાર
નવી દિલ્હીઃ સંસદ અને વિધાનસભાઓ દલીલો અને ચર્ચાના સ્થાન છે, પરંતુ સંકુચિત રાજકીય લાભ માટે વિપક્ષના નામે ગૃહને એક પછી એક સત્ર ચલાવવા ન દેવા એ યોગ્ય નથી, એમ કેન્દ્રીય ગૃહ પ્રધાન અમિત શાહે જણાવ્યું હતું.
અમિત શાહે આ ટિપ્પણી ઓલ ઇન્ડિયા સ્પીકર્સ કોન્ફરન્સને સંબોધિત કરતી વખતે કરી હતી. સંસદનું ચોમાસુ સત્ર ત્રણ દિવસ પહેલા પૂર્ણ થયું હતું અને વિપક્ષના વિરોધને કારણે વારંવાર વિક્ષેપો અને સ્થગિત રહેવાને કારણે ખૂબ જ ઓછું કામકાજ થયું હતું.
આ પણ વાંચો: PM-CMને હટાવવાનાં બિલ મુદ્દે અમિત શાહનું સ્પષ્ટ નિવેદન: ‘જેલમાં રહીને કોઈ સરકાર ન ચલાવી શકે!’
ગૃહ પ્રધાને એમ પણ કહ્યું કે જ્યારે સંસદમાં મર્યાદિત દલીલ કે ચર્ચા થાય છે ત્યારે રાષ્ટ્ર નિર્માણમાં ગૃહના યોગદાન પર અસર પડે છે. લોકશાહીમાં ચર્ચા થવી જ જોઇએ. પરંતુ કોઇના સંકુચિત રાજકીય લાભ માટે વિપક્ષના નામે ગૃહને કામ કરવા ન દેવું યોગ્ય નથી.
તેમણે જણાવ્યું કે વિપક્ષે હંમેશાં સંયમ રાખવો જોઇએ. પરંતુ જો વિપક્ષના નામે ગૃહને રોજબરોજ અથવા સત્ર-દર-સત્ર ચલાવવા દેવામાં ન આવે તો તે યોગ્ય નથી. દેશે તેના વિશે વિચારવું પડશે. લોકોએ તેના વિશે વિચારવું પડશે અને ચૂંટાયેલા પ્રતિનિધિઓએ તેના વિશે વિચારવું પડશે.
આ પણ વાંચો: બિહારમાં 890 કરોડના ખર્ચે સીતામાતાનું ભવ્ય મંદિર બનાવાશે, ચૂંટણી પૂર્વે અમિત શાહે કર્યો શિલાન્યાસ…
શાહે જણાવ્યું કે બધી ચર્ચાઓનો કોઇને કોઇ અર્થ હોવો જોઇએ અને દરેક વ્યક્તિએ અધ્યક્ષ પદની ગરિમા અને સન્માન વધારવાની દિશામાં કામ કરવું જોઇએ. તેમણે કહ્યું કે આપણે લોકોના મુદ્દાઓ ઉઠાવવા માટે એક પૂર્વગ્રહરહિત પ્લેટફોર્મ પૂરું પાડવા માટે કામ કરવું જોઇએ. શાસક અને વિપક્ષ બંને પક્ષો તરફથી દલીલો વાજબી હોવી જોઇએ. આપણે ગૃહનું કાર્ય સંબંધિત ગૃહના નિયમો અને વિનિયમો અનુસાર થાય તેની ખાતરી કરવી પડશે.
