બિહારમાં વિચિત્ર અરજીઓનો સિલસિલો: ‘શ્વાન’ બાદ હવે ‘ટ્રેક્ટર’નું રહેઠાણ પ્રમાણપત્ર માંગ્યું!
બિહાર: હવે શ્વાનના પણ રહેઠાણ પ્રમાણપત્ર બનાવવા લાગ્યા છે. બિહારમાં શ્વાનના રહેઠાણનું પ્રમાણપત્ર બન્યા બાદ હવે સોનાલિકા ટ્રેક્ટરનું રહેઠાણ પ્રમાણપત્ર બનાવવા માટે અરજી આવી છે. આ મામલો પૂર્વ ચંપારણ જિલ્લાના મોતીહારીનો છે, જ્યાં નકલી નામ, સરનામું અને ફોટોનો ઉપયોગ કરીને રહેઠાણ પ્રમાણપત્ર માટે અરજી કરવામાં આવી હતી. આ અરજી જિલ્લાના કોટવા ઝોન ઓફિસના નામે ઓનલાઈન સબમિટ કરવામાં આવી હતી, પરંતુ તેની વાસ્તવિકતા સામે આવ્યા બાદ વહીવટીતંત્રમાં ખળભળાટ મચી ગયો હતો.
‘પિતાનું નામ સ્વરાજ ટ્રેક્ટર અને માતાનું નામ કાર દેવી’
આ વિચિત્ર અરજીમાં અરજદારનું નામ “સોનલિકા ટ્રેક્ટર”, પિતાનું નામ “સ્વરાજ ટ્રેક્ટર” અને માતાનું નામ “કારદેવી” લખેલું છે. એટલું જ નહીં, અરજદારે પોતાના ફોટાને બદલે ફિલ્મ અભિનેત્રી “મોનાલિસા” નો ફોટો અપલોડ કર્યો છે. સરનામાની કોલમમાં, ગામનું નામ “ખેત”, ઝોન “કોટવા”, પોલીસ સ્ટેશન “છોડાદાનો” અને જિલ્લો “પૂર્વ ચંપારણ” લખેલું છે.
આ નકલી અરજી વહીવટીતંત્રના ધ્યાનમાં આવતા જ મોતીહારી જિલ્લા મેજિસ્ટ્રેટ સૌરભ જોરવાલે તાત્કાલિક અરજદારની ઓળખ કરી અને કેસ નોંધીને તેની ધરપકડ કરવાનો આદેશ આપ્યો. ઉપરાંત, આ અરજી તાત્કાલિક અસરથી રદ કરવામાં આવી છે.
ડીએમએ તેને એક ગંભીર ષડયંત્ર અને વહીવટી પ્રક્રિયા સાથે છેડછાડ ગણાવી અને કહ્યું કે આવી પ્રવૃત્તિઓ કોઈપણ સંજોગોમાં સહન કરવામાં આવશે નહીં. તેમણે સંબંધિત અધિકારીઓને ઓનલાઈન અરજીઓની સંપૂર્ણ તપાસ કરવા અને આવા કિસ્સાઓ પર કડક નજર રાખવા નિર્દેશ આપ્યો છે.
આ ઘટનાએ એ પણ પ્રશ્ન ઉઠાવ્યો છે કે સર્ટિફિકેટ સિસ્ટમની ઓનલાઈન પ્રક્રિયામાં હજુ પણ કેટલી ખામીઓ છે, જેનો ઉપયોગ કેટલાક તોફાની તત્વો મજાક કે છેતરપિંડી માટે કરી રહ્યા છે. હવે જોવાનું છે કે પોલીસ તપાસમાં આ વ્યક્તિની ઓળખ અને ઈરાદો શું છે તે બહાર આવે છે કે નહીં.
આપણ વાંચો: ભારતમાં વાઘના મોતનો ચોંકાવનારો ખુલાસો: પચાસ ટકાથી વધુ મૃત્યુ અભયારણ્યોની બહાર!
નોંધનીય છે કે તાજેતરમાં જ શ્વાનનું પ્રમાણપત્ર બનાવવામાં આવ્યું હોવાના સમાચાર આવ્યા હતા. જેમાં અરજદારનું નામ ડોગ બાબુ હતું. આ મામલો મસૌરીનો છે. જિલ્લાના ઉચ્ચ અધિકારીઓને આ વાતની જાણ ત્યારે થઈ જ્યારે શ્વાનનું રહેણાંક પ્રમાણપત્ર સોશિયલ મીડિયા પર વાયરલ થયું. આમાં અરજદારના ફોટાને બદલે શ્વાનનો ફોટો હતો. જ્યારે આ વિવાદાસ્પદ પ્રમાણપત્ર સોશિયલ મીડિયા પર વાયરલ થયું, ત્યારે વિભાગીય અધિકારીઓ જાગ્યા હતા અને મામલો વધુ વકર્યા બાદ તેને રદ કરવામાં આવ્યું હતું.
