ડિજિટલ અરેસ્ટનો ભય બતાવી વૃદ્ધા પાસેથી 20 કરોડ રૂપિયા પડાવ્યા: બેની ધરપકડ
મુંબઈ: આધાર કાર્ડનો ઉપયોગ મની લોન્ડરિંગમાં થયો હોવાનું જુઠ્ઠાણું ચલાવીને દક્ષિણ મુંબઈમાં રહેતી 86 વર્ષની સિનિયર સિટિઝન પાસેથી સાયબર ઠગે ખાસ્સા 20 કરોડ રૂપિયા પડાવ્યા હોવાનું સામે આવ્યું હતું.
આ કેસની તપાસ દરમિયાન સાઉથ રિજન સાયબર સેલે બે આરોપીને પકડી પાડ્યા હતા, જેમાંથી એક ઈન્ટરનૅશનલ સિન્ડિકેટનો સભ્ય હોઈ તેણે ટેલિગ્રામ પર 13 વિદેશી નાગરિકનું એક ગ્રૂપ બનાવ્યું હોવાનું પોલીસને જાણવા મળ્યું હતું.
પોલીસે ધરપકડ કરેલા બન્ને આરોપીની ઓળખ શાયન જમીલ શેખ (20) અને રાઝીક આઝમ બટ (20) તરીકે થઈ હતી. શેખ મલાડનો રહેવાસી છે અને છેતરપિંડીથી પ્રાપ્ત કરાયેલી રકમમાંથી અમુક તેના બૅન્ક ખાતામાં જમા થઈ હતી. મીરા રોડમાં રહેતો આરોપી બટ ઈન્ટરનૅશનલ સિન્ડિકેટનો સભ્ય હોવાની શક્યતા પોલીસે વ્યક્ત કરી હતી.
આપણ વાંચો: ડિજિટલ એરેસ્ટ ફ્રોડ: સિનિયર સિટિઝન પાસેથી સાયબર ઠગે 71 લાખ પડાવ્યા…
પોલીસ ફરિયાદ અનુસાર 26 ડિસેમ્બર, 2024થી ત્રીજી માર્ચ, 2025 દરમિયાન આ સાયબર ફ્રોડ થયું હતું. આરોપીઓએ જ ફરિયાદીના આધાર કાર્ડ અને વ્યક્તિગત માહિતીનો ઉપયોગ કરીને એક રાષ્ટ્રીય બૅન્કમાં ખાતું ખોલાવ્યું હતું. પછી આ ખાતાનો ઉપયોગ મની લોન્ડરિંગ માટે થયો હોવાનું ફરિયાદીને કહેવામાં આવ્યું હતું.
સૌપ્રથમ ડિસેમ્બર, 2024માં આરોપીએ ફરિયાદીને કૉલ કર્યો હતો. આરોપીએ પોતાની ઓળખ પોલીસ અધિકારી તરીકે આપી હતી. આધાર કાર્ડનો ઉપયોગ મની લોન્ડરિંગ માટે થયો હોવાથી ગુનો નોંધી ડિજિટલ અરેસ્ટની આરોપીએ ચીમકી આપી હતી. ફરિયાદી અને તેના કુટુંબીજનો પર પણ ગુનો નોંધવાનો ભય આરોપીએ દાખવ્યો હતો. બાદમાં વિવિધ કારણો રજૂ કરી ફરિયાદીને સમયાંતરે 20.25 કરોડ રૂપિયા ટ્રાન્સફર કરવાની ફરજ પાડવામાં આવી હતી.
આપણ વાંચો: ‘ડિજિટલ એરેસ્ટ’ કરી સાયબર ઠગે વૃદ્દા પાસેથી 14 લાખ રૂપિયા પડાવ્યા
સગાની સલાહ પછી પોતે છેતરાઈ હોવાનું જણાતાં વૃદ્ધાએ સાયબર પોલીસનો સંપર્ક સાધ્યો હતો. તપાસમાં પોલીસને જાણવા મળ્યું હતું કે ફરિયાદીએ વિવિધ બૅન્ક ખાતાંમાં નાણાં ટ્રાન્સફર કર્યાં હતાં. આરોપી શેખના બૅન્ક ખાતામાં 4.99 લાખ રૂપિયા જમા થયા હતા. પોલીસે શેખને શોધી કાઢી તેને તાબામાં લીધો હતો.
શેખે આપેલી માહિતી પરથી બટને પકડી પાડવામાં આવ્યો હતો. આરોપીનો એક સાથી ફરાર હોવાથી પોલીસ તેની શોધ ચલાવી રહી છે. બટે 13 વિદેશી નાગરિકના સમાવેશવાળું ટેલિગ્રામ પર એક ગ્રૂપ બનાવ્યું હતું. આ ગ્રૂપ પર ભારતીય બૅન્ક ખાતાંને લગતી માહિતી પૂરી પાડવામાં આવી હોવાનું તપાસમાં જણાયું હતું. સાયબર ફ્રોડ સંબંધી આ ખાતાં હોવાનું પોલીસનું માનવું છે.