મહાયુતિ સરકારના શપથ ગ્રહણની તારીખ, સ્થળ અને સમય પણ નક્કી; પરંતુ મુખ્ય પ્રધાન કોણ બનશે?

(અમારા પ્રતિનિધિ તરફથી)
મુંબઈ: રાજ્ય વિધાનસભાની ચૂંટણીની પ્રક્રિયા પૂર્ણ થઈ ગઈ છે અને પરિણામ જાહેર થયાને હવે 8 દિવસ વીતી ગયા છે. રાજ્યની જનતાએ મહાયુતિ સરકારને એકતરફી વોટ આપી જંગી બહુમતી આપી છે. જો કે, તેમ છતાં, સરકારની સ્થાપનાના નિર્ણયને લઈને મહાયુતિમાં નારાજગીનું નાટક જોવા મળી શકે છે.

એવું કહેવામાં આવી રહ્યું છે કે પહેલા મુખ્ય પ્રધાન અને પછી ગૃહ પ્રધાનપદની દાવેદારીને લઈને મહાયુતિમાં ગજગ્રાહ ચાલી રહ્યો છે. હવે આખરે સરકારની સ્થાપનાનો સમય આવી ગયો હોવાનું સૂત્રો પાસેથી જાણવા મળ્યું હતું. જો કે મહાયુતિ દ્વારા તારીખ, સમય અને સ્થળ નક્કી કરી નાખવામાં આવ્યું છે, પરંતુ મુખ્યમંત્રી કોણ હશે તે અંગેનો નિર્ણય હજુ જાહેરાત કરવામાં આવી નથી.

રાજ્યમાં નવી સરકારનો શપથ ગ્રહણ સમારંભ પાંચમી ડિસેમ્બરે યોજાશે અને તેના માટે મહાયુતિ દ્વારા મુંબઈના આઝાદ મેદાનની જગ્યા નક્કી કરવામાં આવી છે. આધારભૂત સૂત્રોના જણાવ્યા અનુસાર નવી સરકારનો શપથ ગ્રહણ સમારોહ બપોરે 12 થી 1 વાગ્યાની વચ્ચે યોજાશે.

આપણ વાંચો: વિધાનસભાની ચૂંટણીમાં રાજકીય પરિવારના ઉમેદવારોનો દબદબો, પણ જીત્યા ૩૦ ટકા

એવું પણ કહેવાય છે કે આ શપથ ગ્રહણ સમારોહમાં દેશના ભાજપના તમામ દિગ્ગજ નેતાઓ હાજર રહેશે. તે પહેલા આ શપથ ગ્રહણ સમારોહને અનુલક્ષીને બીજી કે ત્રીજી ડિસેમ્બરે તમામ ભાજપના વિધાનસભ્યોની એક મહત્વપૂર્ણ બેઠક યોજાશે. સૂત્રોએ એવી માહિતી આપી છે કે આ બેઠકમાં કેબિનેટના કેટલાક પ્રધાનોનાં નામ પણ નક્કી થઈ શકે છે.

દરમિયાન, શપથ ગ્રહણ સમારોહનો કાર્યક્રમ નક્કી થઈ ગયો હોવા છતાં, મહાયુતિ દ્વારા હજુ સુધી રાજ્યના મુખ્યમંત્રી કોણ હશે તેની જાહેરાત કરવામાં આવી નથી. સૂત્રોનું કહેવું છે કે ગુરુવારે કેન્દ્રીય ગૃહપ્રધાન અમિત શાહ સાથેની બેઠકમાં મુખ્યપ્રધાન ભાજપના જ હશે અને તેના માટે દેવેન્દ્ર ફડણવીસના નામ રેસમાં મોખરે છે, પરંતુ ભાજપ કે મહાયુતિ તરફથી હજુ સુધી કોઈ સત્તાવાર જાહેરાત કરવામાં આવી નથી.

બીજી તરફ અઢી વર્ષ સુધી મુખ્ય પ્રધાન રહેલા એકનાથ શિંદે પણ મુખ્ય પ્રધાનપદ માટે આગ્રહી હોવાનું કહેવાય છે, પરંતુ ભાજપ દ્વારા તેમને નાયબ મુખ્ય પ્રધાનપદની ઓફર આપવામાં આવી છે. સૂત્રોના જણાવ્યા અનુસાર, શિંદેએ આ પ્રસ્તાવને ફગાવી દીધો છે. એવું પણ કહેવામાં આવી રહ્યું છે કે જો એકનાથ શિંદેને રાજ્યનું ગૃહપ્રધાન પદ મળે તો તેઓ મુખ્ય પ્રધાનપદની જીદ છોડી દેવા તૈયાર છે, પરંતુ શું ભાજપ મહત્વનું ગૃહ ખાતું છોડશે? આ પણ જોવું જરૂરી બનશે.

આપણ વાંચો: રાજ્ય વિધાનસભાની ચૂંટણીના પરિણામો, રાજ્યપાલને સુપરત કરવામાં આવી ગેઝેટની નકલ

નગર વિકાસ વિભાગ માટે પણ દાવો

આ તમામ સંજોગોમાં મહાયુતિએ શપથ ગ્રહણ સમારોહનો સમય નક્કી કર્યો છે. સૂત્રોએ જણાવ્યું છે કે રાજ્યની નવી સરકાર પાંચમી ડિસેમ્બરે મુંબઈના આઝાદ મેદાનમાં શપથ લઈ શકે છે. મહાયુતિ દ્વારા જોકે હજુ સુધી કોઈ સત્તાવાર જાહેરાત કરવામાં આવી નથી. પરંતુ ત્રીજી ડિસેમ્બરે ભાજપના વિધાનસભ્યોની મહત્વની બેઠક બાદ સત્તાવાર જાહેરાત કરવામાં આવશે તેમ સૂત્રોએ જણાવ્યું છે.

દરમિયાન, વિધાનસભાના અધ્યક્ષ રાહુલ નાર્વેકરે શનિવારે શિરડીની મુલાકાત દરમિયાન મીડિયા સાથે વાત કરતા કહ્યું છે કે રાજ્યની નવી સરકારનો શપથ ગ્રહણ સમારોહ પાંચમીએ યોજાશે, જેને લઈને રાજકીય ચર્ચાઓ તેજ થઈ ગઈ છે. રાજ્યના મુખ્યમંત્રી કોણ બનશે? જોકે, શપથવિધિ દરમિયાન કેટલા કેબિનેટ મંત્રીઓને શપથ ગ્રહણ કરવામાં આવશે તેનું ચિત્ર ત્રીજી ડિસેમ્બરની બેઠક બાદ જ સ્પષ્ટ થશે.