પાલઘર: કેમિકલ ફૅક્ટરીમાં ધડાકો થતાં એક કર્મચારીનું મૃત્યુ થયું હતું, જ્યારે ચાર જણ જખમી થયા હોવાની ઘટના પાલઘરમાં બની હતી.
પાલઘર જિલ્લા ડિઝાસ્ટર મૅનેજમેન્ટ સેલના ચીફ વિવેકાનંદ કદમે જણાવ્યું હતું કે ઘટના ગુરુવારની સાંજે 7.30 વાગ્યાની આસપાસ લિંબાની સોલ્ટ ઈન્ડસ્ટ્રીઝમાં બની હતી. બ્લાસ્ટ થયો ત્યારે ઘટનાસ્થળે પાંચ કર્મચારી કામ કરતા હતા.
ફૅક્ટરીમાં મેટલ અને ઍસિડ મિક્સિગંનું કામ ચાલી રહ્યું હતું, જે હાઈલી રિઍક્ટિવ પ્રોસેસ હોય છે. આ પ્રક્રિયા દરમિયાન અચાનક ધડાકો થયો હતો. ધડાકાને કારણે એક કર્મચારીનું ઘટનાસ્થળે જ મોત નીપજ્યું હતું.
આ પણ વાંચો: કેમિસ્ટ્રીમાં માસ્ટર ઑફ સાયન્સ કરનારા ગુજરાતીની અયોધ્યામાં ડ્રગ્સ ફૅક્ટરી
અધિકારીએ જણાવ્યું હતું કે આ ઘટનામાં બે કર્મચારી ગંભીર રીતે દાઝ્યા હતા. સારવાર માટે તેમને હૉસ્પિટલમાં દાખલ કરાયા હતા. અત્યારે બન્ને આઈસીયુમાં હોવાનું જાણવા મળ્યું હતું.
ધડાકાને કારણે અન્ય બે કર્મચારીને નજીવી ઇજા થઈ હતી. સારવાર બાદ તેમનાં સ્વાસ્થ્ય સુધારા પર હોવાનું પોલીસનું કહેવું છે.
દરમિયાન બ્લાસ્ટની માહિતી મળતાં પોલીસ, ફાયર બ્રિગેડ અને ડિઝાસ્ટર મૅનેજમેન્ટના અધિકારીઓ ઘટનાસ્થળે પહોંચી ગયા હતા. તાત્કાલિક કાર્યવાહી કરવામાં આવતાં પરિસ્થિતિ નિયંત્રણમાં હોવાનું કહેવાય છે. આ પ્રકરણે સ્થાનિક પોલીસ વધુ તપાસ કરી રહી છે.
(પીટીઆઈ)
