બ્લૅકમેઈલિંગને કારણે ત્રણ કરોડ રૂપિયા ગુમાવ્યા પછી સીએનો આપઘાત: બે વિરુદ્ધ ગુનો

મુંબઈ: સાંતાક્રુઝમાં બ્લૅકમેઈલિંગને કારણે ત્રણ કરોડ રૂપિયા ગુમાવ્યા બાદ સતત તાણમાં રહેતા ચાર્ટર્ડ એકાઉન્ટન્ટે કથિત આત્મહત્યા કરતાં પોલીસે બે જણ વિરુદ્ધ ગુનો નોંધ્યો હતો. ગૅ સંબંધના વીડિયો સોશ્યલ મીડિયામાં વાયરલ કરવાની ધમકી આપી બન્ને જણ સીએ પાસેથી નાણાં પડાવતા હતા.

વાકોલા પોલીસ સ્ટેશનના અધિકારીએ જણાવ્યું હતું કે સાંતાક્રુઝ પૂર્વના યશવંત નગરમાં રહેતા સીએ રાજ લીલા મોરે (32)એ શનિવારની રાતે ઘરમાં જ ઝેર ઘોળ્યું હતું. તેના ઘરમાંથી ત્રણ પાનાંની સુસાઈડ નોટ મળી હતી, જેમાં તેને બ્લૅકમેઈલ કરવા સંબંધી માહિતી વિગતવાર નોંધવામાં આવી હતી.

સુસાઈડ નોટ અનુસાર રાહુલ પરવાની અને સબા કુરેશીએ છેલ્લા 18 મહિનામાં મોરે પાસેથી ત્રણ કરોડ રૂપિયા પડાવ્યા હતા. તપાસમાં જાણવા મળ્યું હતું કે મોરે અને પરવાની એક સોશ્યલ મીડિયા સાઈટ પર મળ્યા હતા. બાદમાં બન્ને વચ્ચે અનેક વાર ગૅ સંબંધ બંધાયા હતા, જેના વીડિયો પરવાનીએ બનાવ્યા હતા. પછી પરવાનીએ કુરેશી સાથે મળીને મોરેને બ્લૅકમેઈલ કરવાનું શરૂ કર્યું હતું. વીડિયો ક્લિપ્સ સોશ્યલ મીડિયા પર વાયરલ કરવાની ધમકી મોરેને આપવામાં આવતી હતી, એમ પોલીસ અધિકારીએ જણાવ્યું હતું.

આ પણ વાંચો: સેક્સ્ટોર્શનમાં ફસાયેલા શિક્ષકે બદનામીના ડરથી અટલ સેતુ પરથી દરિયામાં ઝંપલાવ્યું

આરોપીઓ જાણતા હતા કે મોરે પ્રતિષ્ઠિત કંપનીમાં કામ કરતો હતો અને કરોડો રૂપિયા શૅરબજારમાં રોક્યા હતા. આરોપીઓ મોરેની કાર લઈ ગયા હતા અને નાણાં ટ્રાન્સફર કરવાની ફરજ પાડી હતી. આ રકમ તેણે કંપનીના ખાતામાંથી ટ્રાન્સફર કરી હતી, એવું તપાસમાં જણાયું હતું.

દરમિયાન પરવાની અને કુરેશી મોરેના ઘરે ગયા હતા અને તેની માતા સાથે મારપીટ પણ કરી હતી. આ ઘટના બાદ તે હતાશ થઈ ગયો હતો. માનસિક તાણમાં તેણે આપઘાત કર્યો હોવાનું પોલીસનું કહેવું છે. પરિવારજનોનાં નિવેદન અને સુસાઈડ નોટને આધારે પોલીસે આત્મહત્યા માટે ઉશ્કેરવાનો ગુનો નોંધી તપાસ હાથ ધરી હતી. (પીટીઆઈ)