મુંબઈ એરપોર્ટનો નવો રેકોર્ડ: એક દિવસમાં સૌથી વધુ 1,036 હવાઈ ટ્રાફિકનું સંચાલન
મુંબઈનું છત્રપતિ શિવાજી મહારાજ આંતરરાષ્ટ્રીય એરપોર્ટ દેશના સૌથી વ્યસ્ત એરપોર્ટમાનું એક છે. દરરોજ લાખો મુસાફરો અહીંથી અવરજવર કરે છે. છત્રપતિ શિવાજી મહારાજ આંતરરાષ્ટ્રીય એરપોર્ટે (CSMIA) 21 નવેમ્બર 2025ના એક નવો ઓપરેશનલ બેન્ચમાર્ક પ્રાપ્ત કર્યો છે, જેમાં 24 કલાકના સમયમાં 1,036 એર ટ્રાફિક મૂવમેન્ટ નોંધાઈ. આ આંકડો 11 નવેમ્બર, 2023ના સ્થાપિત 1,032 ATMના એરપોર્ટના અગાઉના રેકોર્ડને વટાવી ગયો.
1,036 ફ્લાઇટ્સના નવા રેકોર્ડમાં ટેક-ઓફ અને લેન્ડિંગ બંનેનો સમાવેશ થાય છે. આ સિદ્ધિ ખાસ કરીને વિશ્વના સૌથી વ્યસ્ત સિંગલ-રનવે એરપોર્ટ તરીકેની તેની અનોખી મર્યાદાને ધ્યાનમાં રાખીને CSMIA ને વૈશ્વિક સ્તરે સૌથી વધુ કાર્યરત એરપોર્ટ્સમાંના એક તરીકે સ્થાન આપે છે. આ સિદ્ધિ શિયાળા અને તહેવારોની મોસમમાં વધુ માંગનું સીધું પરિણામ છે, જે ભારતના ઉડ્ડયન ક્ષેત્રને નવી ક્ષિતિજો તરફ લઈ જાય છે.
વિમાનોની અવરજવર ઉપરાંત, તે જ દિવસે એરપોર્ટ પર મુસાફરોની અવરજવરનો રેકોર્ડ પણ નોંધાયો હતો. 21 નવેમ્બરના રોજ કુલ 1,70,488 મુસાફરની અવરજવર નોંધાઈ હતી. આ વર્ષે 11 જાન્યુઆરીના રોજ નોંધાયેલા 1,70,516 એક દિવસીય મુસાફરોની સંખ્યા કરતાં આ સંખ્યા થોડી ઓછી હતી. આમાં સ્થાનિક રૂટ પર 1,21,527 અને આંતરરાષ્ટ્રીય રૂટ પર 48,961 મુસાફરોએ મુસાફરી કરી હતી.
CSMIA એક વિશિષ્ટ ક્રોસ-રનવે ગોઠવણી સાથે કાર્ય કરે છે, જે જટિલ હવાઈ ટ્રાફિક વ્યવસ્થાપનને સરળ બનાવે છે. એરપોર્ટ તેના સંકલિત ડિજિટલ-ફર્સ્ટ અભિગમ અને માળખાગત વ્યવસ્થાપનને કારણે લગભગ 1,70,000 મુસાફરોને સેવા આપવાની સાથે દરરોજ 1,000 થી વધુ ATM ને હેન્ડલ કરવાની ક્ષમતા ધરાવે છે.
આ ઓપરેશનલ સિદ્ધિ ટેકનોલોજીમાં સુધારો અને સુવ્યવસ્થિત પ્રક્રિયાઓને આભારી છે, જે એરલાઇન્સ માટે હાઇ-સ્પીડ અને કાર્યક્ષમ ટર્નઅરાઉન્ડ સમય સુનિશ્ચિત કરે છે. એક મુખ્ય લોજિસ્ટિક્સ હબ તરીકે, એરપોર્ટ ભારતના સૌથી મોટા એર કાર્ગો ટર્મિનલ્સમાંથી એકનું પણ સંચાલન કરે છે, જે રાષ્ટ્રના આર્થિક માળખામાં તેના મહત્વને દર્શાવે છે.
આપણ વાંચો: મહારાષ્ટ્રમાં રોડ કનેક્ટિવિટી સુધારવા માટે એડીબીએ 400 મિલિયન ડોલરની લોન મંજૂર કરી
