પાંચ વર્ષમાં એમએસઆરટીસીની ખોટ બમણાથી પણ વધીને 10,324 કરોડ
પરિવહન નિગમની નાણાકીય સ્થિતિ પર બહાર પાડવામાં આવેલા શ્વેતપત્રથી ઘટસ્ફોટ
મુંબઈઃ મહારાષ્ટ્ર રાજ્ય માર્ગ પરિવહન નિગમ (MSRTC)ની સંચિત ખોટ 2018-19 માં રૂ. 4,603 કરોડથી વધીને 2023-24માં રૂ. 10,324 કરોડ થઈ ગઈ છે, એમ રાજ્ય સંચાલિત બસ સેવા દ્વારા બહાર પાડવામાં આવેલા શ્વેતપત્રમાં જણાવ્યું હતું.
એક અધિકારીના જણાવ્યા મુજબ દેશના સૌથી મોટા રાજ્ય સંચાલિત પરિવહન ઉપક્રમનું સંચિત નુકસાન વધુ વધવાની શક્યતા છે કારણ કે કોર્પોરેશને નાણાકીય વર્ષ 2024-25 માટે રૂ. 1,217 કરોડનું અનઓડિટેડ નુકસાન નોંધાવ્યું છે.
ખોટમાં ચાલી રહેલી જાહેર પરિવહન સંસ્થાએ અહીં MSRTCના મુખ્યાલયમાં રાજ્યના પરિવહન પ્રધાન પ્રતાપ સરનાઈકની હાજરીમાં તેની નાણાકીય સ્થિતિ પર શ્વેતપત્ર બહાર પાડ્યું હતું.
અહીં ઉપસ્થિત MSRTCના વાઇસ ચેરમેન અને મેનેજિંગ ડિરેક્ટર માધવ કુસેકર પણ હાજર હતા. શ્વેતપત્ર મુજબ નાણાકીય વર્ષ 2023-24 ના અંત સુધીમાં MSRTCનું સંચિત નુકસાન વધીને રૂ. 10,324 કરોડ થયું હતું.
MSRTC અધિકારીઓના જણાવ્યા મુજબ, તેમણે શ્વેતપત્ર તૈયાર કરવા માટે 45 વર્ષના નાણાકીય ડેટાને ધ્યાનમાં લીધા છે અને આ સમયગાળા દરમિયાન, કોર્પોરેશન ફક્ત આઠ વર્ષ – 1987-88, 1990-91, 1994-95, 1995-96, 2006-07, 2007-08, 2008-09 અને 2009-10 માં નફામાં હતું.
સરનાઈકે જણાવ્યું હતું કે કોર્પોરેશન આઠ વર્ષ સુધી નફામાં રહ્યું હતું, અને તેમાંથી ચાર વર્ષ, રાજ્યના વર્તમાન નાણાં સચિવ, ઓ પી ગુપ્તા, એમએસઆરટીસીના વાઇસ ચેરમેન અને મેનેજિંગ ડિરેક્ટર હતા. તેમણે જણાવ્યું હતું કે, કોર્પોરેશન પાસે પહેલા 1 લાખથી વધુ કર્મચારીઓ અને 18,500 બસો હતી. હવે, કર્મચારીઓની સંખ્યા ઘટીને 87,000 અને બસો 14,500 થઈ ગઈ છે.
