ભાજપ-શિવસેના વચ્ચેની તકરારનો અંત, મહારાષ્ટ્ર નગરપાલિકાની ચૂંટણી એકસાથે લડવાનો નિર્ણય
મહારાષ્ટ્રની રાજનીતિમાં મહાયુતિ ગઠબંધન ભારતીય જનતા પાર્ટી (BJP) અને એકનાથ શિંદેની શિવસેના મુખ્ય પક્ષો વચ્ચેના આંતરિક તણાવને લઈને ચાલી રહેલી અટકળોનો અંત આવ્યો છે. આગામી મહારાષ્ટ્ર નગરપાલિકાની ચૂંટણીઓ પહેલા બંને સહયોગી પક્ષો વચ્ચેની ખેંચતાણ એટલી હદે વધી ગઈ હતી કે એવું માનવામાં આવતું હતું કે કદાચ તેઓ અલગ-અલગ ચૂંટણી લડી શકે છે. જોકે, હવે મુખ્યમંત્રી એકનાથ શિંદે અને નાયબ મુખ્યમંત્રી દેવેન્દ્ર ફડણવીસ વચ્ચે મોડી રાત્રે થયેલી એક મહત્વની બેઠક બાદ સંબંધોમાં ફરી હૂંફ જોવા મળી રહી છે, જે મહાયુતિ ગઠબંધન માટે એક સારા સમાચાર છે.
મહારાષ્ટ્રમાં આંતરિક રાજકીય ગરમાવા વચ્ચે, સીએમ એકનાથ શિંદે અને ડેપ્યુટી સીએમ દેવેન્દ્ર ફડણવીસે સોમવાર (8 ડિસેમ્બર)ની મોડી રાત્રે નાગપુરમાં એક બંધ બારણે એક બેઠક યોજાઈ હતી. લગભગ દોઢ કલાક સુધી ચાલેલી આ લાંબી ચર્ચા બાદ અંતે એવો નિર્ણય લેવામાં આવ્યો કે મહાયુતિ ગઠબંધન મહારાષ્ટ્ર નગરપાલિકાની ચૂંટણીઓ એકસાથે લડશે.
આ બેઠકમાં મુખ્યમંત્રી અને નાયબ મુખ્યમંત્રી ઉપરાંત ચંદ્રશેખર બાવનકુળે અને રવીન્દ્ર ચવ્હાણ પણ હાજર રહ્યા હતા. સૂત્રોના જણાવ્યા અનુસાર, મુંબઈ-થાણે સહિત સમગ્ર મહારાષ્ટ્રની મહાનગરપાલિકાની ચૂંટણીઓ સંયુક્ત રીતે લડવા પર સકારાત્મક ચર્ચા થઈ છે.
નિર્ણય લેવાયા બાદ, હવે મહાનગરપાલિકાની ચૂંટણીઓ માટે સ્થાનિક સ્તરે નેતાઓ વચ્ચે બેઠકો અને વાતચીતનો દોર શરૂ થશે. આ વાતચીત આગામી બે-ત્રણ દિવસોમાં શરૂ થવાની સંભાવના છે, જે ચૂંટણીલક્ષી રણનીતિ અને બેઠકોની વહેંચણી જેવા મુદ્દાઓ પર કેન્દ્રિત હશે. આ સંયુક્ત ચૂંટણી લડવાના નિર્ણયથી મહાયુતિ ગઠબંધનની એકતા જળવાઈ રહે તે સુનિશ્ચિત થયું છે, અને વિરોધી પક્ષોને કોઈ મોટો રાજકીય ફાયદો ઉઠાવવાનો મોકો નહીં મળે.
બેઠકનો સૌથી મહત્વનો મુદ્દો જે એકનાથ શિંદેની નારાજગીનું કારણ હતો, તે પણ ઉકેલાઈ ગયો છે. બેઠકમાં સ્પષ્ટ કરવામાં આવ્યું છે કે મહાયુતિના સહયોગી પક્ષો એકબીજાના નેતાઓને પોતાની પાર્ટીમાં શામેલ નહીં કરે. BJP અને શિવસેના (શિંદે જૂથ)ના પદાધિકારીઓ અને કાર્યકરોને એકબીજાની પાર્ટીમાં પ્રવેશ ન આપવા પર સહમતિ સધાઈ છે. જો કે આ બંને પક્ષો વચ્ચેના તણાવનું મુખ્ય કારણ પણ હતું. એકનાથ શિંદે BJPથી નારાજ હતા અને આ નારાજગી એટલી વધી ગઈ હતી કે શિંદેની શિવસેનાએ કેબિનેટ બેઠકનો બહિષ્કાર પણ કર્યો હતો.
શિંદે અને ફડણવીસ વચ્ચેની આ સમાધાન બેઠકમાં અન્ય વહીવટી મુદ્દાઓ પર પણ ચર્ચા કરવામાં આવી હોવાનું માનવામાં આવે છે. શિંદે જૂથના કેટલાક મંત્રીઓની એ બાબતે પણ નારાજગી હતી કે તેમની જાણ બહાર અથવા તેમના દ્વારા લેવાયેલા કેટલાક નિર્ણયો રદ કરવામાં આવી રહ્યા હતા.
માનવામાં આવે છે કે એકનાથ શિંદેની તમામ નારાજગીઓને દૂર કરવા અને ગઠબંધન વચ્ચે વિશ્વાસ પુનઃસ્થાપિત કરવા માટે આ લાંબી અને મહત્વપૂર્ણ બેઠક યોજવામાં આવી હતી. આ બેઠક બાદ બંને પક્ષો વચ્ચેના સંબંધોમાં સુધારો થયો છે, જે રાજ્યની રાજનીતિ માટે એક સ્થિરતાનો સંકેત છે.
આ પણ વાંચો…મહાયુતિમાં વિખવાદ અંગે ભાજપનો જવાબઃ કોઈ કાર્યકરો પક્ષને નુકસાન નથી પહોંચાડી રહ્યા…
