રેડી રેકનર્સના દર નક્કી કરતી વખતે સ્થાનિક પરિસ્થિતિને ધ્યાનમાં લેવી જોઈએ, 10 થી 15 ટકા વધારાની વાતો
પાયાવિહોણી: બાવનકુળે
(અમારા પ્રતિનિધિ તરફથી)
મુંબઈ: રેડી રેકનરના દર અંગે રાજ્યભરમાં હાલમાં એક સર્વે ચાલી રહ્યો છે. છેલ્લા કેટલાક વર્ષોમાં, કેટલાક વિસ્તારોમાં રેડી રેકનર દરમાં વધારો થયો છે, જ્યારે અન્ય વિસ્તારોમાં દર સ્થિર રાખવામાં આવ્યા છે. 2023-24 અને 2024-25માં કોઈ ભાવ વધારો થયો નથી.
કેટલાક મીડિયા અહેવાલોમાં 10-15 ટકાના ભાવ વધારા અંગે ચર્ચા થઈ રહી છે, પરંતુ મહેસૂલ પ્રધાન ચંદ્રશેખર બાવનકુળેએ બુધવારે વિધાન પરિષદમાં એવી સ્પષ્ટતા કરી હતી કે આ અહેવાલો પાયાવિહોણા છે.
વિધાન પરિષદના સભ્યો સુનિલ શિંદે, એડવોકેટ અનિલ પરબ, સચિન આહિરે મિલકતોની ખરીદી અને વેચાણ સમયે વસૂલવામાં આવતી સ્ટેમ્પ ડ્યુટીમાં વધારા અંગેનો મુદ્દો ઉપસ્થિત કર્યો હતો.
આપણ વાંચો: સસ્તાંને બદલે થયું મોંઘુ! મ્હાડાના ઘરોની કિંમત ઘટવાને બદલે વધી…
રાજ્યના કોઈપણ ભાગમાં અચાનક ભાવ વધારવાનો સરકારનો કોઈ ઈરાદો નથી, પરંતુ રાજ્યમાં ભાવવધારો નક્કી કરતી વખતે સ્થાનિક પરિસ્થિતિઓ, વિકાસ દર અને પુરવઠા અને માગણી જેવા પરિબળોને ધ્યાનમાં લેવામાં આવે છે. દરેક જિલ્લામાં કલેક્ટરની અધ્યક્ષતામાં એક સમિતિ હોય છે, જે સ્થાનિક પ્રતિનિધિઓ અને નિષ્ણાતોની સલાહના આધારે આ દર નક્કી કરે છે. બાવનકુળેએ જણાવ્યું હતું કે જરૂરિયાત મુજબ કેટલાક સ્થળે દરોમાં ઘટાડો પણ કરવામાં આવી રહ્યો છે.
મુંબઈના વિવિધ ભાગોમાં વિવિધ પ્રકારની સંપત્તિઓ છે, જેમાં બહુમાળી ઇમારતો, એસઆરએ પ્રોજેક્ટ્સ અને ઝૂંપડપટ્ટી પુનર્વસન યોજનાઓ વચ્ચે મોટો તફાવત છે. તેથી, દરેક ક્ષેત્ર માટે અલગ ‘વેલ્યુ ઝોન’ નક્કી કરવામાં આવે છે. રેડી રેકનર રેટ નક્કી કરતી વખતે, ગરીબ અને મધ્યમ વર્ગ સાથે કોઈ અન્યાય ન થાય તેની કાળજી લેવામાં આવશે. એમ બાવનકુળેએ જણાવ્યું હતું.
રાજ્ય સરકાર આ સંદર્ભમાં જનતાની ફરિયાદો અને સૂચનોને ગંભીરતાથી લઈ રહી છે, અને આ સંદર્ભમાં 9 જાન્યુઆરી, 2025 ના રોજ એક બેઠક યોજાઈ છે.
બાવનકુળેએ એવી પણ અપીલ કરી હતી કે જો કોઈ પાસે 1 એપ્રિલ પહેલા કોઈ સૂચનો હોય તો તેઓ સરકારને સુપરત કરે. સરકાર કોઈપણ ક્ષેત્રમાં કિંમતોમાં વધુ પડતો વધારો કરશે નહીં અને જો જરૂરી હોય તો, કેટલેક સ્થળે કિંમતો ઘટાડવાનું પણ વિચારશે.