મુંબઈ-નાશિક લોકલ ટ્રેનનું સપનું થશે સાકાર: કસારા-મનમાડ સમાંતર રેલવે લાઇનને મંજૂરી
મુંબઈ: કસારા-મનમાડ સમાંતર રેલ્વે લાઇનને કેન્દ્ર સરકારે મંજૂરી આપી હોવાથી મુંબઈ-નાશિક લોકલ માટેનો માર્ગ મોકળો થયો છે. ૧૩૧ કિમીનો આ પ્રોજેક્ટ મુસાફરીને ઝડપી, સલામત અને વધુ અનુકૂળ બનાવશે અને બંને શહેરો વચ્ચે રેલ સેવામાં નોંધપાત્ર સુધારો થશે.
આ પ્રોજેક્ટનો ખર્ચ અંદાજે ૪,૫૦૦ કરોડ રૂપિયા થશે. આ લાઇન માટે જિલ્લાના પાંચ તાલુકાના ૪૪ ગામમાં જમીન સંપાદન કરવું જરૂરી છે. હાલમાં, મુંબઈથી ભુસાવલ રૂટ મધ્ય રેલવેનો સૌથી વ્યસ્ત રૂટ છે. આ રૂટ પર દરરોજ ૭૦થી ૭૫ એક્સપ્રેસ, મેલ અને માલગાડીઓ દોડે છે, પરંતુ ફક્ત બે જ રેલવે ટ્રેક હોવાથી ટ્રેનો ઘણીવાર મોડી પડે છે.
આ પણ વાંચો : રેલવેમાં દિવસભર આ કારણસર લોકલ ટ્રેનો મોડી દોડતી રહી હતી, જાણો કારણ?
રેલવે મંત્રાલયે પ્રસ્તાવિત રૂટને મંજૂરી આપી દીધી છે, જે ઇગતપુરી, નાશિક, નિફાડ, ચાંદવાડ અને નંદગાંવ તાલુકામાંથી પસાર થશે. સરકારે ગેઝેટમાં જમીન સંપાદન માટે જરૂરી કાર્યવાહી નોંધાવી છે અને ટૂંક સમયમાં વિગતવાર સૂચના જારી કરવામાં આવશે.
અગાઉ, કલ્યાણથી કસારા અને મનમાડથી ભુસાવલ રૂટ પર ત્રીજી અને ચોથી લેન તૈયાર કરવામાં આવી રહી છે. હવે કસારાથી મનમાડ રૂટ પર કામ શરૂ થશે. મુંબઈ-નાશિક લોકલ સેવા શરૂ કરવા માટે પણ આ એક મહત્વપૂર્ણ પગલું હશે અને નાશિકવાસીઓનું સ્વપ્ન સાકાર થશે.
