મુંબઈ: વિવાદનું સમાધાન લાવવા આવેલા બે જૂથના લોકો વચ્ચે પોલીસ સ્ટેશનમાં જ ગાળાગાળી અને મારામારી શરૂ થઈ ગઈ હતી. મારપીટમાં મહિલાઓ પણ સામેલ થઈ હતી અને અધિકારીઓની મધ્યસ્થીથી મામલો શાંત પડ્યો હતો. આ ઘટનાનો વીડિયો બાદમાં સોશ્યલ મીડિયા પર વાયરલ થયો હતો.
પોલીસના જણાવ્યા મુજબ ઘટના મંગળવારે નાલાસોપારાના તુલિંજ પોલીસ સ્ટેશનમાં બની હતી. રહેવાસીઓનાં બે જૂથ વચ્ચે વિવાદ થયો હતો, જેને પગલે બન્ને જૂથના લોકો ફરિયાદ કરવા પોલીસ સ્ટેશને આવ્યા હતા. પોલીસ અધિકારી બન્ને જૂથના લોકો સાથે ઔપચારિક ચર્ચા કરે તે પહેલાં જ તેમની વચ્ચે ઉગ્ર દલીલો થવા માંડી હતી.
જોતજોતાંમાં બન્ને પક્ષના લોકો ગાળાગાળી કરવા માંડ્યા હતા અને પછી વાત મારામારી સુધી પહોંચી હતી. પુરુષો પંચ અને લાત એકબીજાને મારી રહ્યા હતા તો મહિલાઓ પણ મારપીટમાં ઊતરી હતી. પોલીસ સ્ટેશનમાં હાજર લોકોમાંથી એકે આ ઘટનાનું વીડિયો રેકોર્ડિંગ કરી લીધું હતું. બાદમાં એ વીડિયો સોશ્યલ મીડિયા પર વાયરલ થયો હતો.
પોલીસ સ્ટેશનમાં દંગલ મચાવનારાઓને છૂટા પાડી તેમને સમજાવવાનો પ્રયાસ અધિકારીઓ કરી રહ્યા છે, પરંતુ પોલીસની સમજાવટ છતાં મોટે મોટેથી ગાળાગાળી કરવામાં આવતી હોવાનું વીડિયોમાં નજરે પડે છે. આ પ્રકરણે પોલીસે આપસમાં મારામારી કરનારાઓ વિરુદ્ધ તાત્કાલિક કોઈ ગુનો નોંધ્યો નહોતો. તેમની વચ્ચે કયો વિવાદ હતો તેની પોલીસ તપાસ કરી રહી છે. (પીટીઆઈ)
