મુંબઈવાસીઓ માટે ખાસ ભેટ: ઉરણ રૂટ પર નવી ૧૦ સબર્બન લોકલ ટ્રેન સેવાને મંજૂરી…
મુંબઈઃ મહારાષ્ટ્રના મુખ્ય પ્રધાન દેવેન્દ્ર ફડણવીસે આજે ઉરણ રૂટ પર નવી સબર્બન લોકલ ટ્રેન સેવાઓને મંજૂરી આપવાની જાહેરાત કરી, તેને “મુંબઈવાસીઓ માટે ખાસ ભેટ” ગણાવી. રેલ્વે મંત્રાલય તરફથી મળેલા પત્રને શેર કરતા મુખ્ય પ્રધાને પ્રદેશમાં સ્થાનિક ટ્રેન કનેક્ટિવિટી વધારવાની તેમની વિનંતી સ્વીકારવા બદલ વડા પ્રધાન નરેન્દ્ર મોદી અને કેન્દ્રીય રેલવે પ્રધાન અશ્વિની વૈષ્ણવનો આભાર માન્યો હતો.
સોશિયલ મીડિયા પર એક્સની પોસ્ટમાં ફડણવીસે જણાવ્યું હતું કે આ પગલાથી દૈનિક મુસાફરોને ઘણો ફાયદો થશે અને નવી મુંબઈ અને આસપાસના વિસ્તારોમાં રહેતા લોકો માટે મુસાફરી સરળ બનશે. મંજૂરીમાં તારઘર અને ગવહન સ્ટેશનો પર સ્ટોપેજનો પણ સમાવેશ થાય છે, જે સ્થાનિક મુસાફરોની લાંબા સમયથી માંગણીઓ છે.
3 ડિસેમ્બરના રેલવે બોર્ડ દ્વારા કરવામાં આવેલી સત્તાવાર જાહેરાત મુજબ પોર્ટ લાઇન રૂટ પર કુલ 10 નવી ઉપનગરીય સેવાઓને મંજૂરી આપવામાં આવી છે. આમાં નેરુલ-ઉરણ-નેરુલ: 4 સેવાઓ, બેલાપુર-ઉરણ-બેલાપુર: 6 સેવાનો સમાવેશ થાય છે. મહારાષ્ટ્ર સરકાર દ્વારા 25 સપ્ટેમ્બર 2025 મોકલવામાં આવેલા પ્રસ્તાવને મંજૂરી આપતા આ આ નિર્ણય લેવામાં આવ્યો છે, જેમાં જાહેર સુવિધા માટે ઉપનગરીય રેલ કનેક્ટિવિટીમાં સુધારો કરવાની માંગ કરવામાં આવી હતી.
તારઘર અને ગવહન સ્ટેશનો પર સ્ટોપેજ
રેલવે બોર્ડે પોર્ટ લાઇન ઉપનગરીય સેવાઓ માટે તારઘર અને ગવહન સ્ટેશનો પર સ્ટોપેજને પણ મંજૂરી આપી છે. આનાથી ઉરણ કોરિડોર પર ઝડપથી વિકસતા રહેણાંક અને ઔદ્યોગિક ક્ષેત્રોના મુસાફરોને રાહત મળશે તેવી અપેક્ષા છે, જેઓ હાલમાં રોડ ટ્રાન્સપોર્ટ પર આધાર રાખે છે. નવી સેવાઓ અને સ્ટોપેજ ઉપરાંત, મંત્રાલયે નેરુલ-ઉરણ અને બેલાપુર-ઉરણ બંને વિભાગો પર પોર્ટ લાઇન સેવાઓની ઝડપ વધારવાની પણ મંજૂરી આપી છે. રેલ્વે અધિકારીઓને સૂચના આપવામાં આવી છે કે તેઓ શક્ય તેટલી વહેલી તકે ફેરફારો લાગુ કરે અને જાહેર જાગૃતિ માટે વ્યાપક પ્રચાર કરે.
રેલવે બોર્ડે આ બાબતને “સૌથી મહત્વની” ગણાવી છે અને મધ્ય રેલવેના અધિકારીઓને પાલન અને તાત્કાલિક કાર્યવાહી કરવા નિર્દેશ આપ્યો છે. આ નિર્ણયનું સ્વાગત કરતા સીએમ ફડણવીસે જણાવ્યું હતું કે વધારાની સેવાઓ અને નવા સ્ટોપેજથી ભીડ ઓછી થશે અને નવી મુંબઈ અને ઉરણ વચ્ચે મુસાફરી કરતા હજારો મુસાફરોને રાહત મળશે.
આ પણ વાંચો…મુંબઈ-નાશિક લોકલ ટ્રેનનું સપનું થશે સાકાર: કસારા-મનમાડ સમાંતર રેલવે લાઇનને મંજૂરી
