ફડણવીસના રાજીનામાની ઓફર અંગે કોંગ્રેસે આપી આ પ્રતિક્રિયા

મુંબઈઃ મહારાષ્ટ્રના નાયબ મુખ્ય પ્રધાન દેવેન્દ્ર ફડણવીસની લોકસભા ચૂંટણીમાં રાજ્યમાં ભાજપને મળેલા આંચકાને પગલે રાજીનામું આપવાની ઓફર માત્ર “નાટક” છે, એમ મહારાષ્ટ્ર કોંગ્રેસે જણાવ્યું હતું.

રાજ્ય કોંગ્રેસના પ્રવક્તા અતુલ લોંધેએ જણાવ્યું હતું કે ફડણવીસ “ગેરબંધારણીય સરકાર” ચલાવી રહ્યા છે અને બે પક્ષોને તોડીને સત્તામાં પાછા ફર્યા છે . રાજીનામું આપવાની તેમની ઈચ્છા માત્ર નાટક છે.

ફડણવીસે શિવસેના અને રાષ્ટ્રવાદી કોંગ્રેસ પાર્ટીના છૂટાછવાયા જૂથોને (મૂળ) પક્ષનું પ્રતીક અને નામ આપવા માટે સત્તાવાર મશીનરીનો ઉપયોગ કર્યો હતો. પરંતુ લોકોએ હવે આ બંને પક્ષો કોણ છે તે અંગે પોતાનો અભિપ્રાય આપી દીધો છે.
શું (વડા પ્રધાન) મોદી રાજીનામું આપશે? તેમણે એક નિવેદનમાં પૂછ્યું. એનસીપી (શરદચંદ્ર પવાર)ના પ્રવક્તા મહેશ તાપસેએ દાવો કર્યો હતો કે ફડણવીસે રાજીનામું આપવાનો પ્રસ્તાવ મૂક્યો હતો કારણ કે તેઓ મુખ્ય પ્રધાન એકનાથ શિંદે અને નાયબ મુખ્ય પ્રધાન અજિત પવારને કાઢવા માગતા હતા.

તાપસેએ વધુમાં જણાવ્યું હતું શિંદેની આગેવાની હેઠળની શિવસેના અને અજિત પવારની એનસીપીના મતો ભાજપમાં સ્થાનાંતરિત થયા નથી. ભાજપ જે શરદ પવારને રાજકીય રીતે ખતમ કરવા માંગતો હતો તેનો દાવ ઊંધો પડી ગયો છે.
એનસીપી (એસપી)ના અન્ય પ્રવક્તા ક્લાઈડ ક્રેસ્ટોએ ભાજપના નેતાની મજાક ઉડાવતા કહ્યું કે “સૂત્રો કહે છે કે દેવેન્દ્ર ફડણવીસ તેમના રાજકારણના યુગને સમાપ્ત કરવાની યોજના બનાવી રહ્યા છે.” ક્રેસ્ટો ૨૦૧૯માં ફડણવીસની ટિપ્પણીનો ઉલ્લેખ કરી રહ્યા હતા કે રાજકારણનો શરદ પવાર યુગ સમાપ્ત થઈ ગયો છે.

આ પણ વાંચો: Eknath શિંદે કરતાં Devendra Fadanvis અવ્વલઃ શું છે મામલો, જાણો?

કોંગ્રેસના નેતા અને વિધાનસભામાં વિપક્ષના નેતા વિજય વડેટ્ટીવારે જણાવ્યું હતું કે ફડણવીસ એક ખૂબ જ સક્ષમ નેતા હતા જે ૨૦૨૨માં જ્યારે ભાજપ-શિવસેનાની સરકાર બની ત્યારે મુખ્ય પ્રધાન બનવા માંગતા હતા, પરંતુ તેઓ ડેપ્યુટી સીએમ બન્યા હતા.

તેમણે કહ્યું હતું કે વર્તમાન સરકારના ખોટા કાર્યોને કારણે જ અમને લોકસભામાં સારી સંખ્યામાં બેઠકો મળી છે. તેઓએ તેમનું પ્રદર્શન ચાલુ રાખવું જોઈએ જેથી કરીને અમે વિધાનસભાની ચૂંટણી પણ જીતી શકીએ. મહારાષ્ટ્રમાં લોકસભા ચૂંટણીમાં ભાજપ અને સાથી પક્ષોને ૧૭ બેઠકો મળી હતી, જે ૨૦૧૯ની સરખામણીમાં અડધાથી પણ ઓછી છે , જ્યારે મહા વિકાસ અઘાડી ૪૮ બેઠકો માંથી ૩૦ બેઠકો જીતી હતી.

ફડણવીસે બુધવારે કહ્યું હતું કે તેઓ ભાજપના ખરાબ પ્રદર્શન માટે સંપૂર્ણ જવાબદારી સ્વીકારે છે અને પક્ષના નેતૃત્વને તેમને સરકારી ફરજોમાંથી મુક્ત કરવા વિનંતી કરશે જેથી તેઓ વિધાનસભા ચૂંટણી પર ધ્યાન કેન્દ્રિત કરી શકે.