મુખ્ય પ્રધાન એકનાથ શિંદે પહોંચ્યા લાલબાગચા રાજાના ચરણે
મુંબઈ: 11 દિવસનો ગણપતિ ઉત્સવ મંગળવારે સમાપ્ત થશે. જેમ જેમ અંતિમ વિસર્જનનો દિવસ નજીક આવી રહ્યો છે તેમ તેમ રાજ્યભરના ભક્તો પરંપરાગત ગણેશ મંડળોની મુલાકાત લેવા અને બાપ્પાના આશીર્વાદ લેવા ઉમટી રહ્યા છે.
મહારાષ્ટ્રના મુખ્ય પ્રધાન એકનાથ શિંદેએ પણ સોમવારે બપોરે તેમના આખા પરિવાર સાથે મુંબઈના અત્યંત પ્રસિદ્ધ લાલબાગચા રાજાની મુલાકાત લીધી હતી.
એકનાથ શિંદેની સાથે તેમની પત્ની, પુત્ર/સાંસદ શ્રીકાંત શિંદે, પુત્રવધૂ અને પૌત્ર રુદ્રાંશ હતા. શિંદેએ તેમના પરિવાર સાથે બાપ્પાની પૂજા કરી અને આરતી કરી હતી.
વીઆઈપી કલ્ચરના આક્રોશ વચ્ચે મુખ્ય પ્રધાનની મુલાકાત
મુખ્ય પ્રધાન એકનાથ શિંદેની લાલબાગચા રાજાની મુલાકાત એવા સમયે કરવામાં આવી હતી જ્યારે સામાન્ય ભક્તો અને વીઆઈપી સાથે વિરોધાભાસી વર્તન દર્શાવતા સોશિયલ મીડિયા પર ફરતા વાયરલ વીડિયો પછી લોકોમાં લાલબાગચા રાજાના વહીવટીમંડળ સામે આક્રોશ ભભૂકી રહ્યો છે.
આપણ વાંચો: લાલબાગચા રાજાને દ્વાર, જોવા મળ્યો અંબાણી પરિવાર સાદગી જોઇ લોકો બોલ્યા….
લોકોની નારાજગી વચ્ચે શિંદેએ તેમની મુલાકાતનું આયોજન કર્યું. રાજ્યના વડા તરીકે, મુખ્ય પ્રધાન પાસે તેમના કર્મચારીઓ અને સુરક્ષા કર્મચારીઓ વીઆઈપી મૂવમેન્ટને પગલે તેમની રક્ષા કરે છે.
દરમિયાન, શિંદેની લાલબાગચા રાજાની આ બીજી મુલાકાત છે. તેઓ ગયા અઠવાડિયે કેન્દ્રીય ગૃહ પ્રધાન અમિત શાહ સાથે અહીં ગણેશ દર્શન માટે આવ્યા હતા. અમિત શાહ ગયા અઠવાડિયે મુંબઈ સમાચારના કાર્યક્રમ માટે મુંબઈ આવ્યા તેના બીજા દિવસે લાલબાગ ગયા હતા.
આ પહેલાં રવિવારે મુખ્ય પ્રધાને સોશિયલ મીડિયા પ્લેટફોર્મ એક્સ પર ગણપતિ દર્શન માટે તેમના સત્તાવાર નિવાસસ્થાન ‘વર્ષા’ ની મુલાકાત લેનાર અનેક હસ્તીઓના ફોટા શેર કર્યા હતા. પરંપરા મુજબ 10-દિવસના ગણપતિ બાપ્પાનું મહારાષ્ટ્રના મુખ્ય પ્રધાનના સત્તાવાર નિવાસસ્થાન ‘વર્ષા બંગલો’ ખાતે સ્વાગત કરવામાં આવે છે. મંગળવારે બાપ્પાનું વિસર્જન કરવામાં આવશે.
