Central Railwayના આ સ્ટેશન પર ગુજરાતીમાં પ્રિન્ટ થઈને આપી Railway Ticket?
લોકલ ટ્રેન એ મુંબઈગરાની લાઈફલાઈન છે અને ઘણી વખત આ લાઈફલાઈનને કારણે જ મુંબઈગરાઓ ત્રસ્ત થઈ જતાં હોય છે એમાં પણ ખાસ કરીને મધ્ય રેલવેના પ્રવાસીઓના ભાગે તો હાલાકિ જ આવે છે. ટ્રેનો મોડી પડવી, ભીડ થવી, દરવાજા પર લટકીને પ્રવાસ કરવો આ બધું તો મધ્ય રેલવેના પ્રવાસીઓ માટે રોજનું જ થઈ ગયું છે. પરંતુ હાલમાં મધ્ય રેલવે ફોર અ ચેન્જ એક નવા અને લેટેસ્ટ કારણે ચર્ચામાં આવી છે. આવો જોઈએ શું છે આખી ઘટના…
મધ્ય રેલવેના ડોંબિવલી સ્ટેશન પર ડોંબિવલીથી ઘાટકોપર માટે ટિકિટ લેનારા પ્રવાસીને ગુજરાતીમાં રેલવે ટિકિટ પ્રિન્ટ કરીને આપવામાં આવતા સોશિયલ મીડિયા પર આ ટિકિટનો ફોટો તૂફાન વાઈરલ થઈ રહ્યો છે. જોકે, મધ્ય રેલવેના અધિકારી દ્વારા હર હંમેશની જેમ દોષનો ટોપલો બગડેલાં પ્રિન્ટર પર ઢોળીને હાથ ઊંચા કરી દીધા હતા.
ડોંબિવલી સ્ટેશન પરથી ટિકિટ ખરીદનાર પ્રવાસીને અંગ્રેજીની નીચે ગુજરાતી લિપીમાં ડોંબિવલીથી ઘાટકોપર દ્વિતિય શ્રેણી એવું લખેલી ટિકિટ આપવામાં આવી હતી. સોશિયલ મીડિયા પર આ ટિકિટનો ફોટો તૂફાન વાઈરલ થઈ રહ્યો છે. આ ટિકિટ ડોંબિવલી સ્ટેશન પરથી છઠ્ઠી માર્ચના ખરીદવામાં આવી છે.
ડોંબિવલીમાં આવેલા વિવિધ રાજકીય પક્ષો દ્વારા આ વિવાદાસ્પદ ટિકિટને લઈને ઉગ્ર પ્રતિક્રિયાઓ આપવામાં આવી રહી છે. જોક, ભાજપ અને મહાયુતિના સમર્થકો આ ટિકિટ ગુજરાતી લિપીમાંથી છાપવામાં આવી એવો દાવો કરી રહ્યા છે.
મધ્ય રેલવેના અધિકારીઓને જ્યારે આ ટિકિટ વિશે પૂછવામાં આવ્યું ત્યારે તેમણે એવું કારણ આપ્યું હતું કે ટિકિટ પ્રિન્ટ કરી રહેલાં પ્રિન્ટરમાં ટેક્નિકલ એરર આવી રહ્યું હતું અને એને કારણે મરાઠી ભાષામાં છપાયેલી ટિકિટ ગુજરાતી ભાષામાં છપાઈ હોવાનો આભાસ થઈ રહ્યો છે એવી સ્પષ્ટતા કરવામાં આવી છે. જોકે, તેમ છતાં અનેક લોકોને અધિકારીઓ દ્વારા કરવામાં આવેલી આ સ્પષ્ટતા ખાસ કંઈ હજમ થઈ હોય એવું લાગી રહ્યું નથી.
