પાલઘર: બોગસ દસ્તાવેજો રજૂ કરીને 111 કરોડ રૂપિયાની ઉચાપતનો પ્રયાસ એક જાહેર ક્ષેત્રની બૅન્કના અધિકારીની સતર્કતાને કારણે નિષ્ફળ બન્યો હતો. પોલીસે આ મામલે વિક્રમગડ નગર પંચાયતના પ્રમુખની ધરપકડ કરી હતી.
અધિકારીના જણાવ્યા મુજબ આરોપી નીલેશ ઉર્ફે પિન્કા રમેશ પડવલે નગર પંચાયતનો પ્રમુખ હોવાની સાથે ઓ. વી. ક્ધસ્ટ્રક્શન કંપનીની માલિકી પણ ધરાવે છે.
પોલીસની ટીમે શુક્રવારે તેની થાણે પરિસરમાંથી ધરપકડ કરી હતી
સ્ટેટ બૅન્ક ઑફ ઈન્ડિયા (એસબીઆઈ)ની જવ્હાર શાખામાં સાતમી નવેમ્બરે ક્ધસ્ટ્રક્શન કંપનીને નામે 111.63 કરોડ રૂપિયાનો ડિમાન્ડ ડ્રાફ્ટ જારી કરવા માટે જાહેર બાંધકામ વિભાગ (પીડબ્લ્યુડી)નો બોગસ રિક્વેસ્ટ લેટર રજૂ કરવામાં આવ્યો ત્યારે આ કાવતરું સામે આવ્યું હતું.
ડિમાન્ડ લેટર અને તેની સાથેના ચેક પર પીડબ્લ્યુડીના એક્ઝિક્યુટિવ એન્જિનિયર અને એકાઉન્ટન્ટની સહીઓ હતી. જોકે લેટરની ચકાસણી દરમિયાન બૅન્કના અધિકારીને શંકા ગઈ હતી. તેમાં ‘કરોડ’ને બદલે બિલિયન શબ્દનો ઉપયોગ કરવા સાથે અનેક વિસંગતિ જણાઈ આવી હતી. વળી, પત્ર લેખનની શૈલી પણ અત્યંત અલગ હતી, જેને આધારે આ મામલો બહાર આવ્યો હતો.
બૅન્કના કર્મચારીએ પહેલાં ઈ-મેઈલ દ્વારા આ વિનંતીની ચકાસણી કરાઈ હતી, પરંતુ કોઈ પ્રતિસાદ મળ્યો નહોતો. પછી કર્મચારી પોતે જવ્હાર પીડબ્લ્યુડી ઑફિસમાં ગયો હતો, જ્યાં અધિકારીઓએ ગૂંચવણભર્યા અને વિરોધાભાસી જવાબ આપ્યા હતા.
પછી એસબીઆઈના મૅનેજરો એક્ઝિક્યુટિવ એન્જિનિયરને મળ્યા હતા, જેણે લેટર પર તેની સહી ન હોવાનું કહેતાં આ કાવતરું ઉઘાડું પડ્યું હતું. આ પ્રકરણે પોલીસે તપાસ હાથ ધરતાં પડવલેની ભૂમિકા સામે આવતાં તેની ધરપકડ કરાઈ હતી. પોલીસે પડવલે સહિત યજ્ઞેશ અંબિરે વિરુદ્ધ ગુનો નોંધી વધુ તપાસ હાથ ધરી હતી.
(પીટીઆઈ)
આ પણ વાંચો…પત્નીને આત્મહત્યા માટે ઉશ્કેરવા બદલકોન્સ્ટેબલ પતિ અને સાસરિયાંની ધરપકડ
