મુંબઈ: આકર્ષક વળતરની ખાતરી અને મોંઘીદાટ બાઈક તેમ જ સોના-ચાંદીની વસ્તુઓની ગિફ્ટ્સની લાલચે 2000 જેટલા રોકાણકારો સાથે 4.41 કરોડ રૂપિયાની કથિત છેતરપિંડી કરવા બદલ પોલીસે મહિલા સહિત બે જણ વિરુદ્ધ ગુનો નોંધ્યો હતો.
વડાલામાં રહેતી મધુરા ભોલે (45)એ નોંધાવેલી ફરિયાદને આધારે દાદર પૂર્વની ભોઈવાડા પોલીસે નામદેવ નવલે અને અલકા મહાડિક વિરુદ્ધ ગુનો નોંધ્યો હતો.
ભોઈવાડા પોલીસના જણાવ્યા અનુસાર મધુરાએ પહેલાં આરોપીઓની સ્કીમમાં નાણાં રોક્યાં હતાં. પછી તે આરોપીઓ માટે એજન્ટ તરીકે પણ કામ કરતી હતી. મધુરા ભાડેના ફ્લૅટમાં રહેતી હતી ત્યારે જૂન, 2023માં તેની ઓળખાણ મહાડિક સાથે થઈ હતી.
મહાડિક દ્વારા દાદર પૂર્વની ઑફિસમાંથી એક ટ્રેડિંગ ફર્મ દ્વારા પ્રમોટ કરાતી ઈન્વેસ્ટમેન્ટ સ્કીમ્સ વિશે જાણકારી અપાઈ હતી. ઊંચા વળતરોની લાલચ આપવામાં આવતાં મધુરા ભોલેએ રોકાણ કરવાનું શરૂ કર્યું હતું. પછી તેને એજન્ટ બનાવી દેવાઈ, જેમાં તે જે લાવે એ દરેક રોકાણકાર દીઠ તેને 10 ટકા કમિશનની લાલચ અપાઈ હતી. પછી તેની ઓળખાણ સંસ્થાના કથિત સંસ્થાપક નવલે સાથે કરાવાઈ હતી.
પોલીસ અધિકારીએ જણાવ્યું હતું કે વિવિધ યોજનાઓ, બમ્પર ઑફરો, લકી ડ્રો અને બાઈક્સ, સોના તેમ જ ચાંદીની ગિફ્ટ્સથી ભોલે પ્રભાવિત થઈ હતી. કંપનીએ તહેવારો દરમિયાન પ્રચાર કર્યો હતો અને યોજનાઓ લોકોને સમજાવવા યુટ્યૂબ ચૅનલનો ઉપયોગ કર્યો હતો. ફરિયાદી ભોલેએ બાદમાં અનેક મહિલાઓ અને સ્વરોજગારી મહિલાઓને યોજનામાં રોકાણ કરવા સમજાવી હતી, જેમાં રોકાણ સામે તેને કમિશન મળતું હતું.
એપ્રિલ, 2025માં ભોલે 100થી વધુ રોકાણકાર લાવી હતી, પરંતુ તે પછી તેને દાળમાં કંઈક કાળું હોવાનું જણાયું હતું. ત્યાર બાદ કંપની દ્વારા વળતર આપવાનું બંધ કરાયું હતું, જેથી રોકાણકારોએ નવલે પાસે જવાબ માગવાનું શરૂ કર્યું. નવલેએ દાવો કર્યો હતો કે શૅરબજારમાં અસ્થિરતાને કારણે ભંડોળ ઉપાડી શક્યો નથી.
જોકે બાદમાં આરોપીએ ઑફિસ બંધ કરી દીધી અને રોકાણકારોના કૉલ રિસીવ કરવાનું પણ ટાળ્યું હતું, જેને પગલે ભોલેએ પોલીસનો સંપર્ક સાધ્યો હતો.
તપાસમાં પોલીસને જાણવા મળ્યું હતું કે બન્ને આરોપીએ ભોેલે જેવા 40 એજન્ટની મદદથી 2000 રોકાણકાર સાથે 4.41 કરોડ રૂપિયાની છેતરપિંડી કરી હતી. પોલીસે બન્ને વિરુદ્ધ ગુનો નોંધી તેમની શોધ હાથ ધરી હતી.
(પીટીઆઈ)
આ પણ વાંચો…સાત વર્ષથી નાસતો ફરતો છેતરપિંડી કેસનો આરોપી, ક્રાઈમ બ્રાન્ચે આ રીતે કરી ધરપકડ
