(અમારા પ્રતિનિધિ તરફથી)
મુંબઈ: અશ્લીલ ચેનચાળા કરનારા 65 વર્ષના વૃદ્ધ પડોશીને 12 વર્ષની બાળકીએ બરાબરનો પાઠ ભણાવ્યો હોવાની ઘટના પરેલ વિસ્તારમાં બની હતી. પડોશીની હરકતની ફરિયાદ માતાએ કાને ન ધરતાં બાળકીએ જ તેનો વીડિયો બનાવ્યો હતો, જેને આધારે પોલીસે વૃદ્ધની ધરપકડ કરી હતી.
આ પ્રકરણે બાળકીની માતાએ એન. એમ. જોશી માર્ગ પોલીસ સ્ટેશનમાં ફરિયાદ નોંધાવી હતી. ફરિયાદ અનુસાર આરોપી પોસ્ટ ઑફિસમાં કામ કરતો હતો અને હાલમાં નિવૃત્ત છે. બાળકીનો પરિવાર બિલ્ડિંગના બીજા માળે રહે છે અને આરોપી પણ એ જ માળનો રહેવાસી છે.
આપણ વાંચો: છોકરીઓનો પીછો કરી અશ્લીલ ચેનચાળા કરનારો સગીર પકડાયો
ફરિયાદમાં જણાવાયું હતું કે પહેલી વાર મે મહિનામાં આ ઘટના બની હતી. બાળકી કોમન પેસેજમાં ઊભી હતી ત્યારે તેને જોઈને આરોપીએ અશ્લીલ ચેનચાળા કર્યા હતા. એ સિવાય પડોશના જ એક ઘરમાં બાળકી ટ્યૂશને ગઈ હતી ત્યારે આરોપીએ તેના પગને અયોગ્ય સ્પર્શ કર્યો હતો.
બાળકીએ આ વાતની જાણ માતાને કરી હતી, પરંતુ માતાએ તેને ગંભીરતાથી લીધી નહોતી. પરિણામે બાળકીએ જ પડોશીને પાઠ ભણાવવાનું નક્કી કર્યું હતું.
આપણ વાંચો: ફોકસઃ અશ્લીલતા માત્ર એક ધારણા નથી, પરંતુ ગંભીર અપરાધ છે
તાજેતરમાં આરોપીએ ફરી શરમજનક કૃત્ય કરતાં બાળકીએ મોબાઈલ ફોનથી તેનો વીડિયો ઉતારી લીધો હતો. વીડિયો ક્લિપ જોઈ માતાને આઘાત લાગ્યો હતો. પતિ સાથે ચર્ચા કર્યા બાદ માતાએ પોલીસનો સંપર્ક સાધ્યો હતો. પોલીસે ભારતીય ન્યાય સંહિતાની સુસંગત કલમો અને પ્રોટેક્શન ઑફ ચિલ્ડ્રન ફ્રોમ સેક્સ્યુઅલ ઑફેન્સીસ (પોક્સો) ઍક્ટ હેઠળ ગુનો નોંધ્યો હતો.
પોલીસે આરોપીની ધરપકડ કર્યા બાદ નોટિસ બજાવી તેને છોડ્યો હતો. આરોપીએ અન્ય કોઈ બાળકી સામે આવા ચેનચાળા કર્યા છે કે કેમ તેની તપાસ પોલીસ કરી રહી છે.
