(અમારા પ્રતિનિધિ તરફથી)
મુંબઈ: મુંબઈના છત્રપતિ શિવાજી મહારાજ ઈન્ટરનૅશનલ ઍરપોર્ટ પર કસ્ટમ્સ વિભાગના એઆઈયુ અને ડીઆરઆઈએ કરેલી બે અલગ અલગ કાર્યવાહીમાં ગુજરાતી સહિત બેની ધરપકડ કરી અંદાજે 12 કરોડ રૂપિયાનો ગાંજો જપ્ત કર્યો હતો.
ધરપકડ કરાયેલા બન્ને આરોપીની ઓળખ શૈલેષ ઉકાભાઈ વાંકર (26) અને મુનીર કુઝિયીલ (41) તરીકે થઈ હતી. શૈલેષ ગુજરાતના ગાંધીનગર ખાતે ઉમિયાનગરનો વતની છે, જ્યારે મુનીર કેરળનો રહેવાસી હોવાનું અધિકારીએ જણાવ્યું હતું.
મલયેશિયા ઍરલાઈનની ફ્લાઈટમાં મલયેશિયાથી આવનારા પ્રવાસી શૈલેષ પાસે પ્રતિબંધિત ડ્રગ્સ હોવાની માહિતી ઍર ઈન્ટેલિજન્સ યુનિટ (એઆઈયુ)ને મળી હતી. માહિતીને આધારે મંગળવારની રાતે મુંબઈ ઍરપોર્ટ પર શૈલેષને રોકવામાં આવ્યો હતો. તેની પાસેની ટ્રોલી બૅગની તપાસ કરવામાં આવતાં કપડાંની વચ્ચે સંતાડેલાં પ્લાસ્ટિકનાં પાંચ પૅકેટ્સ મળી આવ્યાં હતાં.
આપણ વાંચો: અમદાવાદના રહેવાસી પાસેથી 9.66 કરોડનો ગાંજો જપ્ત…
તપાસ કરતાં પૅકેટ્સમાં હાઈડ્રોપોનિક ગાંજો હોવાનું જણાયું હતું. અંદાજે પાંચ કરોડ રૂપિયાનો ગાંજો જપ્ત કરી આરોપીની ધરપકડ કરવામાં આવી હતી.
દરમિયાન મંગળવારની રાતે જ ડિરેક્ટરેટ ઑફ રેવેન્યૂ ઈન્ટલિજન્સ (ડીઆરઆઈ)ના અધિકારીઓએ ભારતીય નાગરિક મુનીરને રોક્યો હતો. બૅન્ગકોકથી અબુધાબી થઈને મુંબઈ પહોંચેલા મુનીર પાસેની ટ્રોલી બૅગની તપાસ કરવામાં આવી હતી.
બૅગમાં કપડાં વચ્ચેથી પ્લાસ્ટિકની થેલીનાં 35 પાઉચ મળી આવ્યાં હતાં. તપાસ કરતાં પાઉચમાં ગાંજો હોવાનું જણાયું હતું. મુનીર પાસેથી સાત કરોડ રૂપિયાથી વધુનો ગાંજો જપ્ત કરવામાં આવ્યો હતો.
