રાજકારણીઓ ચૂંટણી જીતવા લોન માફીના વચનો આપે છે, લોકો ભોળવાઈ જાય છે: મહારાષ્ટ્રના પ્રધાનનું વિવાદાસ્પદ નિવેદન

મુંબઈ: મહારાષ્ટ્રના સહકાર પ્રધાન બાબાસાહેબ પાટીલે કથિત ટિપ્પણીથી વિવાદ ઉભો કર્યો છે. તેમણે કહ્યું કે લોકો લોન માફીથી ભ્રમિત થઈ ગયા છે, અને તેમણે સ્પષ્ટપણે સ્વીકાર્યું કે રાજકારણીઓ ચૂંટણી જીતવા માટે આવા વચનો આપે છે. પાટીલે એમ પણ કહ્યું હતું કે લોકોએ નક્કી કરવું જોઈએ કે તેઓ મત માંગવા આવતા નેતાઓ પાસેથી ખરેખર શું ઇચ્છે છે. નાયબ મુખ્યપ્રધાન અજિત પવારના નેતૃત્વ હેઠળના રાષ્ટ્રવાદી કોંગ્રેસ પાર્ટી (એનસીપી) ના પ્રધાને એક જાહેર કાર્યક્રમ દરમિયાન આ ટિપ્પણી કરી હતી.

બાબાસાહેબ પાટીલના આ નિવેદનની શાસક સાથી પક્ષો સહિત વિવિધ પક્ષો તરફથી ટીકા કરવામાં આવી હતી. ભાજપના નેતા અને મહેસૂલ પ્રધાન ચંદ્રશેખર બાવનકુલેએ જણાવ્યું હતું કે રાજ્યના કેટલાક ભાગોમાં ભારે વરસાદ અને પૂરને પગલે ખેડૂતો ગંભીર નાણાકીય સંકટનો સામનો કરી રહ્યા છે, તેથી કોઈએ પણ લોન માફીના મુદ્દા પર બેફામ નિવેદનો ન કરવા જોઈએ.

આ પણ વાંચો : મહારાષ્ટ્રના પ્રધાને મરાઠી લોકો વિરુદ્ધ ટિપ્પણી કરવા બદલ ભાજપના સાંસદની ટીકા કરી

મહાયુતિ ગઠબંધનના ચૂંટણી ઢંઢેરામાં સ્પષ્ટપણે પાત્ર ખેડૂતો માટે લોન માફીનો ઉલ્લેખ કરવામાં આવ્યો હતો. ખરેખર જરૂરિયાતમંદ ખેડૂતોને આ લાભ મળવો જોઈએ. રાજ્યભરમાં એક સર્વે હાથ ધરવામાં આવી રહ્યો છે, અને ઉમેર્યું હતું કે એકવાર તે પૂર્ણ થઈ જાય પછી યોગ્ય નિર્ણય લેવામાં આવશે.

શિવસેનાના પ્રધાન સંજય શિરસાટે જણાવ્યું હતું કે મુખ્યપ્રધાન દેવેન્દ્ર ફડણવીસ અને નાયબ મુખ્યપ્રધાન એકનાથ શિંદે અને અજિત પવારે ભૂતકાળમાં સૂચનાઓ આપી હતી કે વિવાદાસ્પદ નિવેદનો ન આપવા જોઈએ. મુખ્યપ્રધાન ચોક્કસપણે આવા નિવેદનોની નોંધ લેશે, એમ શિરસાટે ઉમેર્યું.

આ પણ વાંચો : હિન્દી-મરાઠી વિવાદ: માશેલકર સમિતિનો અહેવાલ વિધાનસભામાં રજૂ કરવામાં આવશે

સપ્ટેમ્બરમાં ભારે વરસાદ અને પૂરથી રાજ્યભરમાં ૬૮.૬૯ લાખ હેક્ટર જમીન પર પાકનો નાશ થયો હતો, જેના કારણે લાખો ખેડૂતો મુશ્કેલીમાં મુકાયા હતા.

રાજ્ય સરકારે મંગળવારે ભારે નુકસાન સહન કરનારા ખેડૂતો માટે ૩૧,૬૨૮ કરોડ રૂપિયાના વળતર પેકેજની જાહેરાત કરી હતી. ઉલ્લેખનીય છે કે, વિપક્ષી પાર્ટીઓ પાકના નુકસાનને ધ્યાનમાં રાખીને રાજ્યના ખેડૂતો માટે લોન માફીની માંગ કરી રહ્યા છે.