પુણે: ટાઉન પ્લાનિંગ બોડીએ પુણેના એક આઇટી હબની આસપાસ ૧૩ સ્થળની ઓળખ કરી છે, જ્યાં બિલ્ડર અને અન્ય સંસ્થાઓએ નાળા અને ગટરોના કુદરતી પ્રવાહને અવરોધિત કર્યો છે અથવા તેને વાળ્યો છે, જેના પરિણામે આ મહિનાની શરૂઆતમાં જ પાણી ભરાવાની ગંભીર સ્થિતિ ઊભી થઈ છે.
પુણે મેટ્રોપોલિટન રિજન ડેવલપમેન્ટ ઓથોરિટી (પીએમઆરડીએ) ના અધિકારીઓએ જણાવ્યું હતું કે તેમણે હિંજેવાડી અને આસપાસના વિસ્તારોમાં થયેલ ઉલ્લંઘન માટે જવાબદાર લોકો સામે કાર્યવાહી શરૂ કરી છે અને કુદરતી ડ્રેનેજ સિસ્ટમને પુનઃસ્થાપિત કરવાની પ્રક્રિયા શરૂ કરી છે.
આ પણ વાંચો: મુંબઈ-પુણે એક્સપ્રેસવે: ભારે વાહનો માટે ઘાટમાં સ્પીડ લિમિટ વધશે?
૯ જૂનના રોજ ભારે વરસાદ બાદ હિંજેવાડી આઇટી પાર્ક વિસ્તારમાં નિર્માણાધીન મેટ્રો રૂટ પર ભારે પાણી ભરાઈ ગયું હતું, જેના પગલે સ્થાનિકો અને ટેક હબ ખાતે વિવિધ કંપનીઓમાં કામ કરતા લોકોએ ચિંતા વ્યક્ત કરી હતી. પીએમઆરડીએએ એક નિવેદનમાં જણાવ્યું હતું કે તેમણે ૧૩ એવી જગ્યાઓ ઓળખી કાઢી છે જ્યાં નાળા અને ગટરના કુદરતી પ્રવાહને વાળવામાં આવ્યો હતો.
“પીએમઆરડીએ અને એમઆઈડીસી (મહારાષ્ટ્ર ઔદ્યોગિક વિકાસ નિગમ) ની હદમાં આવતા ઘણા બિલ્ડરો, કંપનીઓ અને રહેવાસીઓએ એકપક્ષીય રીતે કુદરતી જળસ્ત્રોતોને અવરોધિત કર્યા છે અથવા વાળ્યા છે. ઘણા કિસ્સાઓમાં, અનધિકૃત બાંધકામો કરવામાં આવ્યા છે. સંબંધિત સંસ્થાઓને આ બાંધકામો દૂર કરવા અથવા કાર્યવાહીનો સામનો કરવા સૂચના આપવામાં આવી છે,” એમ તેમાં જણાવાયું છે.
