સરકારના નિર્ણય સામે MARD, IMA અને MSRDA દ્વારા કાળી પટ્ટી પહેરીને વિરોધઃ ગુરુવારે રાજ્યવ્યાપી હડતાળની ચીમકી
મુંબઈ: રાજ્ય સરકાર દ્વારા આધુનિક દવા પ્રમાણપત્ર અભ્યાસક્રમ (સીસીએમપી) પૂર્ણ કરનારા હોમિયોપેથી ડોક્ટરોને એલોપેથીની પ્રેક્ટિસ કરવાની પરવાનગી આપવા સામે ઇન્ડિયન મેડિકલ એસોસિએશન અને મહારાષ્ટ્ર સિનિયર રેસિડેન્ટ ડોક્ટર એસોસિએશન (એમએસઆરડીએ) દ્વારા ૧૮ સપ્ટેમ્બરે એક દિવસીય હડતાળનો સંકેત આપવામાં આવ્યો છે. આ સંદર્ભમાં, રાજ્યના રેસિડેન્ટ ડોક્ટર્સના સંગઠન, સેન્ટ્રલ માર્ડે મંગળવારે રાજ્યની તમામ સરકારી હોસ્પિટલોમાં કાળી પટ્ટી બાંધીને સરકારના નિર્ણયનો વિરોધ કર્યો હતો.
સરકારના આ નિર્ણય સામે રાજ્યના એલોપેથી ડોક્ટરોના વિવિધ સંગઠનો આક્રમક બન્યા છે. આઇએમએ અને એમએસઆરડીએ જેવા સંગઠનોએ ૧૮ સપ્ટેમ્બરે રાજ્યવ્યાપી હડતાળ પાડવાની ચેતવણી આપી છે. અન્ય સંગઠનોએ પણ આ નિર્ણયનો સખત વિરોધ કર્યો છે.
આ સંદર્ભમાં, સોમવારે સેન્ટ્રલ અને બીએમસી માર્ડના પદાધિકારીઓ તબીબી શિક્ષણ વિભાગના મુખ્ય સચિવ, તબીબી શિક્ષણ કમિશનર અને તબીબી શિક્ષણ ડિરેક્ટોરેટના ડિરેક્ટરને મળ્યા હતા અને સીસીએમપી અભ્યાસક્રમ પૂર્ણ કરનારા હોમિયોપેથી ચિકિત્સકોની એમએમસી માંથી નોંધણી રદ કરવાની માગ કરી હતી.
આ બેઠક પછી, બીએમસી માર્ડ, સેન્ટ્રલ માર્ડ અને ઇન્ટર્ન મેડિકલ સ્ટુડન્ટ્સના સંગઠન, અસ્મી એ સંયુક્ત રીતે આ નિર્ણયનો ૧૬ સપ્ટેમ્બરે કાળી પટ્ટી બાંધીને વિરોધ કર્યો હતો. આ મુજબ, નાગપુર, છત્રપતિ સંભાજી મહારાજ નગર, ગોંદિયા, પુણેમાં બીજેએમસી, કેઈએમ, નાયર, કૂપર અને શિવ હોસ્પિટલના ડોક્ટરોએ કાળી પટ્ટી બાંધીને કામ કર્યું હતું. જોકે આ આંદોલનથી તબીબી સેવામાં કોઈ અવરોધ ન આવે અને તમામ આરોગ્ય સેવાઓ સામાન્ય રીતે ચાલુ રહે તેની ડોક્ટરોએ કાળજી લીધી હતી.
