મુંબઈ: મહારાષ્ટ્ર એન્ટિ-ટેરરિઝમ સ્ક્વોડે (એટીએસ) આંધ્ર પ્રદેશ પોલીસ સાથે જૉઈન્ટ ઑપરેશન હાથ ધરી નાશિક જિલ્લાના મહારાષ્ટ્રમાંથી દેશ વિરોધી પ્રવૃત્તિમાં કથિત રીતે સંડોવાયેલા શકમંદની ધરપકડ કરી હતી. માલેગાંવમાંથી સોમવારે પકડાયેલા આરોપીની ઓળખ તૌસીફ શેખ તરીકે થઈ હતી. આંધ્ર પ્રદેશમાં નોંધાયેલા એક કેસમાં ત્યાંની પોલીસ તેને શોધી રહી હતી, એમ એટીએસના અધિકારીએ જણાવ્યું હતું.
અધિકારીના જણાવ્યા મુજબ દેશના વિરોધમાં કટ્ટરવાદનો દુષ્પ્રચાર કરવાનો આરોપ શેખ પર છે. તે અમુક વિદેશી નાગરિકોના સંપર્કમાં પણ હોવાનું જાણવા મળ્યું હતું. આ કેસમાં આંધ્ર પ્રદેશ પોલીસે અગાઉ કેટલાક આરોપીઓની ધરપકડ કરી હતી. તેમની પૂછપરછમાં શેખનું નામ સામે આવ્યું હતું. ફરાર શેખની આંધ્ર પ્રદેશ પોલીસ શોધ ચલાવી રહી હતી.
શેખ મહારાષ્ટ્રના નાશિક જિલ્લામાં હોવાની આધારભૂત માહિતી આંધ્ર પ્રદેશ પોલીસને મળી હતી. માહિતીને આધારે પોલીસની એક ટીમ નાશિક પહોંચી હતી. મહારાષ્ટ્ર એટીએસની મદદથી આંધ્ર પ્રદેશ પોલીસે સોમવારે જૉઈન્ટ ઑપરેશન હાથ ધર્યું હતું. ઓળખ બદલીને માલેગાંવમાં રહેતા શેખને તાબામાં લેવાયો હતો. (પીટીઆઈ)
આ પણ વાંચો…ગુજરાત એટીએસે બેંગલુરુથી અલ-કાયદા સાથે સંકળાયેલી શમા પરવીનની ધરપકડ કરી…
