મહારાષ્ટ્રના ગોંદિયામાં 89 લાખના ઈનામી 11 નક્સલીઓએ કર્યું આત્મસમર્પણ
પૂર્વીય મહારાષ્ટ્રના ગોંદિયા જિલ્લામાંથી સુરક્ષા એજન્સીઓ માટે એક અત્યંત મહત્વપૂર્ણ સારા સમાચાર સામે આવ્યા છે. અહીં પ્રતિબંધિત ભાકપા (માઓવાદી) સંગઠનના ‘દરેકસા દલમ’ (Darekasa Dalam)ના વડા અનંત ઉર્ફે વિનોદ સય્યના સહિત કુલ 11 નક્સલીઓએ પોલીસ સમક્ષ આત્મસમર્પણ કર્યું છે. આ નક્સલીઓ પર સરકારે સામૂહિક રીતે 89 લાખ રૂપિયાનું મોટું ઇનામ જાહેર કર્યું હતું. ગઢચિરોલી રેન્જના પોલીસ નાયબ મહાનિરીક્ષક (DIG) અંકિત ગોયલે પત્રકાર પરિષદમાં જણાવ્યું કે આ દરેકસા દલમ MMC (મહારાષ્ટ્ર, મધ્ય પ્રદેશ અને છત્તીસગઢ) ક્ષેત્રનું સૌથી સક્રિય અને ખતરનાક એકમ હતું, જેના પતનને સુરક્ષા દળોની મોટી જીત ગણવામાં આવે છે.
સૂત્રોની જાણકારી પ્રમાણે મહારાષ્ટ્ર-મધ્ય પ્રદેશ-છત્તીસગઢ સ્પેશિયલ ડિવિઝનલ કમિટી (MMC) દ્વારા 1 જાન્યુઆરી, 2026 સુધી શરણાગતિ સ્વીકારવા માટેની બીજી શાંતિ અપીલના બીજા જ દિવસે બની છે. પીપલ્સ લિબરેશન ગુરિલ્લા આર્મી (PLGA)ના આખા દરેકસા દલમે શુક્રવારે રાત્રે ગોંદિયામાં પોલીસ સમક્ષ શસ્ત્રો હેઠા મૂક્યા હતા. આ દલમનું નેતૃત્વ વિકાસ નાગપુરે ઉર્ફે અનંત કરી રહ્યો હતો, જે દરેકસા સ્પેશિયલ ઝોનલ કમિટીનો સભ્ય અને રાજનાંદગાંવ-ગોંદિયા-બાલાઘાટ ડિવિઝનનો પ્રમુખ હતો. પોલીસ રેકોર્ડ મુજબ, અનંત પર એકલા 25 લાખ રૂપિયાનું ઇનામ જાહેર કરવામાં આવ્યું હતું.
આ પણ વાંચો: છત્તીસગઢના સુકમામાં પંદર નક્સલીઓએ આત્મસમર્પણ કર્યું, પાંચ મહિલા પણ સામેલ
આ નક્સલી જૂથનું આત્મસમર્પણ સુરક્ષા દળોના સંયુક્ત અને સતત દબાણનું પરિણામ છે. તાજેતરમાં, નક્સલી અનંતે મહારાષ્ટ્ર, મધ્ય પ્રદેશ અને છત્તીસગઢના મુખ્યમંત્રીઓ અને ગૃહમંત્રીઓને પત્ર લખીને વિખેરાયેલા ગુરિલ્લાઓને એકઠા થઈ આત્મસમર્પણ કરવા માટે 34 દિવસ સુધી સુરક્ષા અભિયાન રોકવાની અપીલ કરી હતી. જોકે, સુરક્ષા એજન્સીઓએ આ પ્રસ્તાવ ફગાવી દીધો અને સંયુક્ત ઓપરેશન ચાલુ રાખ્યું. પોલીસ અધિકારીઓના જણાવ્યા અનુસાર, ત્રણેય રાજ્યોના સંયુક્ત દબાણ, સરકારી વિકાસ કાર્યોની અસર અને શાંતિ અપીલે આ આખા યુનિટને હથિયાર મૂકવા માટે મજબૂર કર્યા છે.
આત્મસમર્પણ કરનારા માઓવાદીઓએ પોલીસને મોટી માત્રામાં દારૂગોળો સોંપ્યો છે. દલમના વડા અનંતે પોતાની AK-47 રાઇફલ, બે મેગેઝિન અને બે મોબાઇલ ફોન જમા કરાવ્યા. આ ઉપરાંત, દલમ કમાન્ડર નાગસૂ ઉર્ફે ગોલૂએ SLR રાઇફલ અને મહિલા કેડર રાનો ઉર્ફે રામે યેશુ નરોટેએ INSAS રાઇફલ જમા કરાવી હતી. ગોંદિયાના એસપી ગોરખ ભામરેએ સ્પષ્ટતા કરી કે આત્મસમર્પણ કરનારા તમામ માઓવાદીઓને મહારાષ્ટ્ર અને કેન્દ્ર સરકારની આત્મસમર્પણ અને પુનર્વસન નીતિ હેઠળ તમામ લાભો આપવામાં આવશે, જે તેમને સમાજના મુખ્ય પ્રવાહમાં જોડાવામાં મદદ કરશે.
