વિકાસકાર્યનું લોકાર્પણ: કચ્છ જિલ્લાના મુખ્ય મથક ભુજ શહેરમાં વડા પ્રધાન નરેન્દ્ર મોદીના હસ્તે વિવિધ વિકાસકાર્યના લોકાર્પણ પ્રસંગે ગુજરાતના મુખ્ય પ્રધાન ભૂપેન્દ્ર પટેલ સહિત મહાનુભાવો ઉપસ્થિત હતા (પીટીઆઈ)
—
(અમારા પ્રતિનિધિ તરફથી)
અમદાવાદ: ગુજરાતના બે દિવસીય પ્રવાસે આવેલા વડા પ્રધાન નરેન્દ્ર મોદીએ બીજા દિવસે કચ્છને બાર વિવિધ વિકાસ પ્રકલ્પના રૂપમાં રૂ. પાંચ હજાર કરોડની ભેટ આપી હતી. આ સાથે તેમણે વર્ષ ૨૦૦૧ના ભૂકંપે વેરેલા વિનાશ બાદ ફરી બેઠા થયેલા કચ્છના લોકોના જોમ અને જુસ્સાને વખાણ્યો હતો. વર્ષ ૨૦૦૧માં આવેલા ભૂકંપમાં જીવ ગુમાવેલા લોકોની યાદમાં ઊભા કરવામાં આવેલા સ્મૃતિવનને તેમણે ખુલ્લું મૂક્યું હતું. તેમણે જણાવ્યું હતું કે સ્મૃતિવન મૃતકોને અંજલિ છે અને કચ્છના લોકોની ખુવારી બાદ ફરી ઊભા થવાની ખુમારીને સલામ છે. મુખ્ય પ્રધાનના કાર્યકાળમાં મોદીએ જ આ વન બનાવવાનો વિચાર રજૂ કર્યો હતો. તેમણે આખા મ્યુઝિયમની લટાર મારી હતી. સ્મૃતિવન રૂ. ૪,૪૦૦ કરોડના ખર્ચે ઊભું કરવામાં આવ્યું છે. આ સાથે તેમણે સરદાર સરોવર પ્રોજેક્ટની કચ્છની કેનાલનું પણ ઉદ્ઘાટન કર્યું હતું, જે ૯૪૮ ગામને સિંચાઈ અને પીવા માટે પાણી પૂરું પાડશે, તેમ માનવામાં આવે છે. આ સાથે સરહદ ડેરીના ઓટોમેટિક મિલ્ક પ્રોસેસિંગ પ્લાન્ટ, ભુજ ખાતે રિજનલ સાયન્સ સેન્ટર, ગાંધીધામ ખાતે ડૉ. બાબાસાહેબ આંબેડકર ક્ધવેન્શન સેન્ટર, અંજાર ખાતે વીર બાળ સ્મારક અને ભુજના નખત્રાણા ખાતે બે સબસ્ટેશનના પણ વર્ચ્યુઅલી ઉદ્ઘાટન કર્યા હતા.
ભુજ ખાતે વિવિધ વિકાસકાર્યોને વર્ચ્યુઅલી ઉદ્ઘાટન કર્યા બાદ વડા પ્રધાન મોદીએ વિશાળ જનમેદનીને સંબોધી હતી. તેમણે કહ્યું હતું કે ગુજરાતને બદનામ કરવાના અને અહીં આવતા રોકાણને રોકવાના ઘણા ષડ્યંત્રો થયા હતા, પરંતુ ગુજરાતે પ્રગતિનો નવો માર્ગ પસંદ કર્યો. ૨૦૦૧ના કચ્છમાં આવેલા ભૂકંપ બાદ ચારેકોર વિનાશ વેરાયેલો હતો ત્યારે મેં કચ્છને ફરી નવનિર્મિત કરવાની વાત કરી હતી અને તે માટે અમે ઘણી મહેનત પણ કરી. આજે એ પરિણામ તમે જોઈ રહ્યા છો. તે સમયે કચ્છ ફરી ઊભું નહીં થાય તેમ કહેનાર ઘણા હતા, પરંતુ લોકોએ આખી તસવીર બદલી નાખી. તેમણે એમ પણ જણાવ્યું હતું કે હાલમાં તમને ભારતમાં ઘણી મર્યાદાઓ જણાશે, પરંતુ ૨૦૪૭ બાદ ભારત એક વિકસિત દેશ બની જશે, તેવું દૃશ્ય હું જોઈ રહ્યો છું.
અહીં બાર અલગ અલગ પ્રોજેક્ટના લોકાર્પણ માટે આવેલા મોદીએ કચ્છની ધરા પર ઓવારી જઈ કહ્યું હતું કે મને કચ્છના રણમાં ભારતનું તોરણ દેખાય છે. કચ્છમાં આજે પાણી, વીજળી, માર્ગ અને ડેરી સાથે સંકળાયેલા વિવિધ પ્રોજેક્ટના ખાતમુહૂર્ત તેમજ લોકાર્પણ થયા છે, જે કચ્છના વિકાસ માટે ડબલ એન્જિન સરકારની પ્રતિબદ્ધતા દર્શાવે છે. કચ્છ કોઈ સ્થાન નથી, કચ્છ તો જીવતી જાગતી ચેતના છે. કચ્છે ગુજરાતના વિકાસને પણ ગતિ આપી છે. વડા પ્રધાને કચ્છના લોકોના પ્રેમને બિરદાવ્યો હતો અને ભૂકંપ બાદ કચ્છના પુન:નિર્માણ માટે કચ્છના લોકોના જોશથી દુનિયાને પ્રેરણા મળી છે, તેમ જણાવ્યું હતું. કચ્છની ધરતી પર નર્મદાના પાણી આવશે એવી કોઈને કલ્પના ન હતી. આજે કચ્છના ગામેગામ મા નર્મદાના પાણી પહોંચતા થયા છે. કચ્છ ફળ ઉત્પાદનમાં ગુજરાતમાં નંબર વન થયું છે. સરહદ ડેરીના માધ્યમથી આજે કચ્છના પશુપાલકોને વાર્ષિક રૂ.૮૦૦ કરોડની આવક થાય છે. કચ્છનો વિકાસ શૈક્ષિણક સંસ્થાઓ, રિસર્ચ સંસ્થાઓ માટે સંશોધનનો વિષય બન્યો છે. તેમણે મુખ્ય પ્રધાન ભૂપેન્દ્રભાઈ પટેલના નેતૃત્વમાં ગુજરાત આગળ વધી રહ્યું હોવાનો વિશ્ર્વાસ વ્યક્ત કર્યો હતો.
સવારે ભુજ એરપોર્ટ આવ્યા બાદ રોડ શો યોજાયો હતો. મોદીના રોડ શોમાં હજારોની જનમેદની હાજર રહી હતી. રોડની બન્ને બાજુ લોકોએ તિરંગા સાથે મોદીનું સ્વાગત કર્યું હતું. વડા પ્રધાને તેમની શૈલી મુજબ કારનો દરવાજો ખોલી લોકોનું અભિવાદન ઝીલ્યું હતું. આ સાથે તેમણે કારમાંથી ઊતરી થોડું ચાલીને પણ લોકો સાથે હાથ મિલાવ્યા હતા.
કચ્છથી પરત ફરી ગાંધીનગર ખાતે તેમણે મારુતિ સુઝુકીના ભારતમાં ૪૦ વર્ષ પૂર્ણ થયા તે પ્રસંગે યોજાયેલા કાર્યક્રમમાં હાજરી આપી હતી. તેમણે આ પ્રસંગે ભારત અને જાપાનના સંબંધો અંગે વાત કરતા જણાવ્યું હતું કે મારુતિ-સુઝુકીની મજબૂત ભાગીદારીનું પણ પ્રતીક છે. ગયા આઠ વર્ષમાં બન્ને દેશો વચ્ચેના સંબંધોએ નવી ઊંચાઈને આંબી છે. ગુજરાત-મહારાષ્ટ્રની બુલેટ ટ્રેન અને ઉત્તર પ્રદેશનું રુદ્રાક્ષ સેન્ટર જેવી વિકાસની ઘણી યોજનાઓ ભારત-જાપાનની મિત્રતાના ઉદાહરણો છે. તેમણે જાપાનના ભૂતપૂર્વ વડા પ્રધાન સ્વર્ગીય શિંજો આબેને યાદ કર્યા હતા અને તેમના ગુજરાત પ્રવાસની યાદ તાજી કરી હતી. તેમણે ઈલેક્ટ્રોનિક વાહનોને એક શાંતિપૂર્ણ ક્રાંતિની શરૂઆત કહી હતી.
જાહેર કાર્યક્રમો બાદ ગાંધીનગર ખાતે વડા પ્રધાને પક્ષના નેતાઓ સાથે સંગઠન સંદર્ભે ચર્ચા કરી હોવાનું પણ જાણવા મળ્યું હતું.
