50% ટેરિફ બાદ પણ ટ્રમ્પનું પેટ ન ભરાયું? સેકન્ડરી સૈંક્શન લગાવવાની તૈયારી…
અમેરિકાના રાષ્ટ્રપતિની ટેરિફ નીતિએ વિશ્વભરમાં કુતુહલ જગાવ્યો છે. લાંબી ચર્ચા વિચારણાના દોર બાદ અમેરિકાએ ભારત પર આખરે 25 ટકા ટેરિફ લાદવાનો નિર્ણય જાહેર કર્યો હતો. પરંતુ આ ટેરિફ લગાડ્યા બાદ પણ તેને વધારાના સેકન્ડરી સૈંક્શન લાગુ કરવા માટે સંકેતો આપ્યા છે. જે ભારતના નિકાસકારો માટે ચિંતાનો વિષય છે. આ નિવેદન તેમણે ભારત પર 25% વધારાનો ટેરિફ જાહેર કર્યાના આઠ કલાક બાદ આપ્યું હતું. આ નિર્ણયનો હેતુ ભારત દ્વારા રશિયન તેલની ખરીદી બંધ કરાવવાનો છે, જેને અમેરિકા રાષ્ટ્રીય સુરક્ષાનો મુદ્દો ગણાવે છે. આ નિર્ણયથી ભારત-અમેરિકા વેપાર સંબંધો પર અસર પડી શકે છે, અને તેની ચર્ચા આંતરરાષ્ટ્રીય સ્તરે થઈ રહી છે.
ડોનાલ્ડ ટ્રંપે ભારત પર 30 જુલાઈએ 25% ટેરિફ લગાવવાની જાહેરાત કરી હતી, અને જ્યારે 6 ઓગસ્ટે વધુ 25% ટેરિફ ઉમેરવાનો નિર્ણય જાહેર કર્યો. આનાથી ભારત પર કુલ 50% બેઝલાઇન ટેરિફ લાગુ થવાની જાહેરાત ડોનાલ્ડ ટ્રંપ દ્વારા કરવામાં આવી હતી. ઉલ્લેખનીય છે કે પ્રથમ 25% ટેરિફ 7 ઓગસ્ટથી અમલમાં આવશે, જ્યારે વધારાનો 25% ટેરિફ 27 ઓગસ્ટથી લાગુ થશે. ટ્રંપે જણાવ્યું કે ભારત રશિયન તેલ ખરીદી ચાલુ રાખીને યુક્રેન યુદ્ધને “ઇંધણ” પૂરું પાડે છે. તેમણે ચીન સહિત અન્ય દેશો પર પણ આવા સેન્ક્શન્સ લાગુ કરવાના સંકેત આપ્યા છે.
ભારત પર ટેરિફનું કારણ
સૂત્રોની જાણકારી પ્રમાણે ટ્રમ્પ વહીવટનું કહેવું છે કે ભારતે રશિયન તેલની ખરીદી બંધ કરવાનો ઇનકાર કર્યો છે, જે અમેરિકાની રાષ્ટ્રીય સુરક્ષા માટે ચિંતાનો વિષય છે. વ્હાઇટ હાઉસના વેપાર સલાહકાર પીટર નવારોએ જણાવ્યું કે આ ટેરિફ રાષ્ટ્રીય સુરક્ષા સાથે જોડાયેલો મુદ્દો છે. ટ્રંપે ભારત પર આરોપ લગાવ્યો કે તે રશિયન તેલ ખરીદી દ્વારા યુદ્ધને આર્થિક રીતે ટેકો આપે છે. જોકે, ચીન પણ રશિયન તેલનું મોટું આયાતકાર છે, પરંતુ તેના પર હાલ 90 દિવસની રોક સાથે ટેરિફ લગાવવામાં આવ્યું છે.
ભારતે અમેરિકાના આ નિર્ણયની કડક ટીકા કરી છે અને તેને “અત્યંત દુર્ભાગ્યપૂર્ણ” ગણાવ્યું છે. ભારતના વિદેશ મંત્રાલયે જણાવ્યું કે આ નિર્ણય ભારતની ઊર્જા સુરક્ષા અને રાષ્ટ્રીય હિતોની વિરુદ્ધ છે. ભારતે સ્પષ્ટ કર્યું કે તેનું ક્રૂડ ઓઇલ આયાત બજાર આધારિત છે અને તેનો હેતુ 140 કરોડ નાગરિકોની ઊર્જા જરૂરિયાતો પૂરી કરવાનો છે. ભારતે એમ પણ કહ્યું કે વિશ્વના અન્ય દેશો પણ પોતાના રાષ્ટ્રીય હિતોને ધ્યાનમાં રાખીને આવા નિર્ણયો લે છે, તેથી ફક્ત ભારતને નિશાન બનાવવું “અન્યાયી અને બિનઆધારભૂત” છે.
અમેરિકાના આ નિર્ણયથી ભારત અને અન્ય દેશો સાથેના વેપાર સંબંધો પર અસર પડી શકે છે. ભારતે જણાવ્યું છે કે તે પોતાના રાષ્ટ્રીય હિતોનું રક્ષણ કરવા માટે જરૂરી પગલાં લેશે. ટ્રંપના આ પગલા રશિયા સાથેના વેપારી સંબંધોને નિશાન બનાવે છે, પરંતુ ચીન જેવા અન્ય દેશો પર પણ આવા ટેરિફ લાગુ થઈ શકે છે. આ ઘટનાક્રમ આગામી દિવસોમાં આંતરરાષ્ટ્રીય વેપાર અને રાજદ્વારી સંબંધો પર નોંધપાત્ર અસર કરી શકે છે.
આ પણ વાંચો…યુએસના વિઝા માટે $15,000 નો બોન્ડ પોસ્ટ કરવો ફરજીયાત બનશે! જાણો આ પાયલોટ પ્રોગ્રામના નિયમો વિષે
