અમેરિકાની G20 યજમાનીમાં દક્ષિણ આફ્રિકાને નહીં મળે આમંત્રણ! તમામ સબ્સિડી પર લગાવી રોક, જાણો શું છે કારણ
વોશિંગ્ટન: અમેરિકાના રાષ્ટ્રપતિ ડોનાલ્ડ ટ્રમ્પે દક્ષિણ આફ્રિકા (સાઉથ આફ્રિકા) પર આકરા પગલાં લીધા છે. તાજેતરમાં દક્ષિણ આફ્રિકાની યજમાનીમાં યોજાયેલ G20 શિખર સંમેલનમાં યુનાઇટેડ સ્ટેટ્સ ઑફ અમેરિકા (USA) શામેલ થયું ન હતું. ટ્રમ્પ પ્રશાસને દક્ષિણ આફ્રિકાની સરકાર પર દેશમાં ખ્રિસ્તીઓ અને અન્ય શ્વેત સમુદાયોની હત્યાઓ પર મૌન સેવવાનો અને દોષિતો સામે કાર્યવાહી ન કરવાનો ગંભીર આરોપ લગાવ્યો હતો. આ મામલે ટ્રમ્પે માત્ર G20ના બહિષ્કાર સાથે, એક મોટો નિર્ણય લીધો છે. જેના હેઠળ દક્ષિણ આફ્રિકાને હવે અમેરિકામાં યોજાનાર G20 સમિટનું આમંત્રણ નહીં મળે અને તમામ અમેરિકી સહાયતા પણ બંધ કરી દેવાઈ છે.
અમેરિકાના રાષ્ટ્રપતિ ડોનાલ્ડ ટ્રમ્પે આ સંદર્ભે 28 નવેમ્બર સોશિયલ મીડિયા પ્લેટફોર્મ ‘X’ પર એક પોસ્ટ શેર કરીને સત્તાવાર માહિતી આપી હતી. ટ્રમ્પે જણાવ્યું હતું કે, “અમેરિકાએ દક્ષિણ આફ્રિકામાં યોજાયેલી G20 શિખર બેઠકમાં ભાગ ન લેવાનું કારણ એ હતું કે દક્ષિણ આફ્રિકાની સરકાર આફ્રિકાનર્સ (Afrikaners) અને ડચ, ફ્રેન્ચ અને જર્મન મૂળના અન્ય લોકો વિરુદ્ધ થઈ રહેલા ભયાનક માનવાધિકાર ઉલ્લંઘનોને સ્વીકારી પણ નથી રહી કે ન તો તેને સંબોધિત કરી રહી છે.” તેમણે સ્પષ્ટ શબ્દોમાં આક્ષેપ કર્યો કે ત્યાં શ્વેત લોકોની હત્યાઓ થઈ રહી છે અને તેમની જમીનો તથા ખેતરો છીનવી લેવામાં આવી રહ્યા છે.
આ ઘટનાઓને ધ્યાને રાખીને ટ્રમ્પ પ્રશાસન તરફથી દક્ષિણ આફ્રિકા પર આકરું વલણ અપનાવવામાં આવ્યું છે. ટ્રમ્પે તેમની પોસ્ટમાં કહ્યું કે, “G20 શિખર સંમેલનના સમાપન દિવસે દક્ષિણ આફ્રિકાએ G20ની અધ્યક્ષતા સોંપવા માટે સમારોહમાં હાજર અમારા અમેરિકી દૂતાવાસના એક વરિષ્ઠ પ્રતિનિધિને સ્વીકારવાનો ઇનકાર કરી દીધો હતો.” આ કારણોસર, ટ્રમ્પના નિર્દેશ પર, દક્ષિણ આફ્રિકાને વર્ષ 2026 માં અમેરિકાના ફ્લોરિડાના મિયામી શહેરમાં યોજાનારા G20 સંમેલન માટે હવે આમંત્રિત કરવામાં નહીં આવે. વધુમાં, ટ્રમ્પે ભારપૂર્વક જણાવ્યું કે દક્ષિણ આફ્રિકાએ વિશ્વ સમક્ષ સાબિત કર્યું છે કે તે સભ્યપદ માટે યોગ્ય દેશ નથી, અને તેથી અમેરિકા દ્વારા આપવામાં આવતી તમામ સહાયતા અને સબસિડીઓ તાત્કાલિક અસરથી બંધ કરવામાં આવી રહી છે.
નોંધનીય છે કે આ વર્ષે G20 શિખર સંમેલન 2025નું આયોજન દક્ષિણ આફ્રિકા દ્વારા જોહાનિસબર્ગમાં કરવામાં આવ્યું હતું. આ સંમેલનમાં વિશ્વના અનેક દિગ્ગજ નેતાઓ શામેલ થયા હતા. તેમાં ભારત તરફથી વડા પ્રધાન નરેન્દ્ર મોદી, ઇટાલીના વડા પ્રધાન જ્યોર્જિયા મેલોની, બ્રિટનના વડા પ્રધાન કીર સ્ટાર્મર સહિત કેનેડા, ઑસ્ટ્રેલિયા, જાપાન, સાઉથ કોરિયા, નેધરલેન્ડ અને જમૈકાના ટોચના નેતાઓએ ભાગ લીધો હતો. જોકે, આ સંમેલનમાં અમેરિકાએ સંપૂર્ણપણે બહિષ્કાર કર્યો હતો અને રાષ્ટ્રપતિ ડોનાલ્ડ ટ્રમ્પે ભાગ લીધો ન હતો. આ નિર્ણય આંતરરાષ્ટ્રીય રાજકારણમાં દક્ષિણ આફ્રિકા માટે એક મોટો આંચકો માનવામાં આવે છે.
