બેઇજિંગ: ચીનના દક્ષિણપશ્ચિમ યુનાન પ્રાંતની રાજધાની કુનમિંગમાં એક ભયાનક ટ્રેન અકસ્માત સર્જાયો હોવાનું જાણવા મળ્યું છે. આ દુર્ઘટનામાં 11 રેલ્વે કર્મચારીઓના ઘટનાસ્થળે જ મોત થયા અને બે અન્ય ગંભીર રીતે ઘાયલ થયા છે. અકસ્માત અંગે ચાઇના રેલ્વે કુનમિંગ ગ્રુપ કંપની લિમિટેડ દ્વારા માહિતી પણ શેર કરવામાં આવી છે. આ અકસ્માત કુનમિંગના લુયાંગઝેન રેલ્વે સ્ટેશન નજીક થયો છે. રેલવે ટ્રેકની રિપેર કામગારી ચાલી રહી હતી તે દરમિયાન એક માલગાડીએ કામદારોને ટક્કર મારી હતી.
સવારે 4:30 વાગ્યાની આસપાસ આ અકસ્માત સર્જાયો
આ રેલવે અકસ્માત અંગે વાત કરવામાં આવે તો, આજે સવારે 4:30 વાગ્યાની આસપાસ આ અકસ્માત સર્જાયો હતો. ઘાયલોને સારવાર માટે સત્વરે હોસ્પિટલ ખસેડવામાં આવ્યાં હતાં. આ અકસ્માતમાં 11 રેલવે કર્મચારીઓના મોત થયાં છે. જ્યારે બે કર્મચારીઓ ગંભીર રીતે ઘાયલ થયાં છે, તેઓ પણ અત્યારે જિંદગી અને મરણ વચ્ચે જંગ લડી રહ્યાં છે. ચાઈના સરકાર દ્વારા આ મામલે તપાસ કરી કડક પગલા લેવાના આદેશ આપી દેવામાં આવ્યાં હોવાનું સૂત્રો દ્વારા જાણવા મળ્યું છે.
આ પણ વાંચો : સાઉદી અરેબિયામાં ગોઝારો બસ અકસ્માત; 42 ભારતીય યાત્રાળુનાં મોત
સુરક્ષા પ્રોટોકોલના ઉલ્લંઘનના કારણે અકસ્માત થયો
અકસ્માત અંગેની પ્રાથમિક માહિતી પ્રમાણે આ અકસ્માત સુરક્ષા પ્રોટોકોલનું ઉલ્લંઘન અને સિગ્નલિંગ નિષ્ફળતા સૂચવે છે. રેલ્વે અધિકારીઓએ સ્પષ્ટતા કરી કે અકસ્માત બાદ લુઆંગઝેન સ્ટેશન પર ટ્રેન કામગીરી થોડા કલાકોમાં પુનઃસ્થાપિત કરવામાં આવી હતી. આ અકસ્માતના કારણે કોઈ પણ પેસેન્જર ટ્રેનને અસર થઈ નથી. ચીનમાં આ પહેલા પણ રેલવે અકસ્માતો થયેલા છે. આ પહેલા 2024માં એક ટ્રેન અકસ્માતમાં 9 કર્મચારીઓનો જીવ ગયો હતો. તે દરમિયાન રેલવે વિભાગ દ્વારા મૃતકોના પરિવારને સહાય અને ઘાયલો માટે સારવારનો સંપૂર્ણ ખર્ચો આપવાની જાહેરાત કરવામાં આવી હતી.
