વિશ્વભરમાં આંતરરાષ્ટ્રીય શિક્ષણ માટેની અંગ્રેજી ભાષાની સૌથી સ્વીકૃત પરીક્ષાઓ પૈકીની એક, TOEFL (Test of English as a Foreign Language) ના નિર્માતા ETS (Educational Testing Service) એ TOEFL iBT (ઈન્ટરનેટ-આધારિત ટેસ્ટ)માં મોટા સુધારા જાહેર કર્યા છે. આ ફેરફારો 21 જાન્યુઆરી, 2026થી લાગુ કરવામાં આવશે.
આ સુધારેલી પરીક્ષામાં મલ્ટીસ્ટેજ અનુકૂલનશીલ પરીક્ષણ, ઝડપી પરિણામો અને પરીક્ષાર્થીઓ માટે સુધારેલી સુવિધાઓનો સમાવેશ થાય છે, જે વિશ્વભરના 13,000થી વધુ કેન્દ્રો પર વિદ્યાર્થીઓ માટે પરીક્ષાનો અનુભવ સારો બનાવશે.
અમદાવાદમાં યોજાયેલા ‘TOEFL એક્સપિરિયન્સ ડે’ પર ETSના સૂત્રો જણાવ્યા પ્રમાણે, સિડની રોડ્રિગ્સ ડી સૂઝાએ આ સુધારાઓની રૂપરેખા આપી હતી. 21 જાન્યુઆરી, 2026થી, ETS રીડિંગ અને લિસનિંગ વિભાગો માટે મલ્ટીસ્ટેજ અનુકૂલનશીલ ફોર્મેટ રજૂ કરશે. તેમણે સમજાવ્યું કે પરીક્ષાર્થીના પ્રદર્શનના આધારે ટેસ્ટ તે જ સમયે તેની જટિલતાને સમાયોજિત કરશે.
આ ઉપરાંત, પરીક્ષાની સામગ્રીમાં પરંપરાગત વિષયોને બદલે વધુ સુસંગત અને સાંસ્કૃતિક રીતે સુલભ સામગ્રીનો સમાવેશ કરવામાં આવશે, જે શૈક્ષણિક સેટિંગ્સમાં અંગ્રેજીના વાસ્તવિક ઉપયોગને વધુ સારી રીતે પ્રતિબિંબિત કરશે. ઉદાહરણ તરીકે, ભારતીય વિદ્યાર્થીઓ માટે ગ્રીક પૌરાણિક કથાઓ પરના પ્રશ્નો ટાળવામાં આવી શકે છે.
વિદ્યાર્થીઓ માટે સૌથી મોટો ફાયદો એ છે કે હવે ટેસ્ટનું પરિણામ વર્તમાન 7-9 દિવસની જગ્યાએ માત્ર 72 કલાકમાં આવી જશે. નવી ડિઝાઇનમાં વાસ્તવિક જીવનના સંચાર સંબંધિત પ્રશ્નોનો પણ સમાવેશ કરવામાં આવશે, જેમ કે ઈમેલ કેવી રીતે લખવો. જે વિદ્યાર્થીઓ ઘરેથી TOEFL ટેસ્ટ આપે છે તેમના માટે પણ એક મોટો સુધારો કરવામાં આવ્યો છે.
હાલમાં સુરક્ષા અને ચકાસણીને કારણે ચેક-ઇન પ્રક્રિયામાં 30 મિનિટ લાગે છે, જે 21 જાન્યુઆરીથી ઘટીને માત્ર 3-4 મિનિટ થઈ જશે. આ માટે, ETS એ હવે એક જ એપ્લિકેશનનો ઉપયોગ કરવાનું શરૂ કર્યું છે, જે તમામ સુરક્ષા અને ચકાસણી પ્રક્રિયાઓને સિંક કરે છે. આ ઉપરાંત, ટેસ્ટ સેન્ટર્સ પર હવે નોઇઝ કેન્સલેશન હેડફોન્સ પણ પ્રદાન કરવામાં આવશે અને ગુજરાતમાં કલોલ ખાતે એક નવું ટેસ્ટ સેન્ટર પણ શરૂ કરવામાં આવશે.
ઉલ્લેખનીય છે કે, ETS ભારતમાં લગભગ 90 ટેસ્ટ સેન્ટર્સનું સંચાલન કરે છે, જેમાંથી 20% (18-20) ગુજરાતમાં છે. ગુજરાતમાંથી TOEFL આપતા વિદ્યાર્થીઓમાં, 44% અમદાવાદમાંથી, 23% વડોદરામાંથી, 18% સુરતમાંથી અને બાકીના 15% રાજકોટ અને અન્ય ટિયર 2/3 શહેરોમાંથી આવે છે.
ગુજરાતના વિદ્યાર્થીઓ મોટાભાગે US (42%), કેનેડા (22%), UK (16%), ઓસ્ટ્રેલિયા (10%) અને EU અને મધ્ય પૂર્વ (10%) માં આંતરરાષ્ટ્રીય શિક્ષણ મેળવે છે. હવેથી TOEFL, પરંપરાગત 0-120 સ્કેલની સાથે, Common European Framework of Reference for Languages (CEFR) – A1 થી C2 સાથે સંરેખિત 1-6 ના નવા સ્કેલ પર પણ સ્કોર રિપોર્ટ કરવાનું શરૂ કરશે.
