આજથી ગુજરાતના વાતાવરણમાં આવશે પલટો, ગાજવીજ સાથે પડશે વરસાદ…
અમદાવાદઃ ગુજરાતમાં ચૈત્ર માસમાં ચોમાસા જેવો માહોલ જામી શકે છે. હવામાન વિભાગ દ્વારા આગામી ત્રણથી ચાર દિવસ જુદા જુદા જિલ્લાઓમાં છૂટાછવાયા સ્થળોએ હળવાથી મધ્યમ વરસાદની આગાહી કરવામાં આવી છે. આજે વડોદરા, પંચ મહાલ, છોટા ઉદેપુર, દાહોદ, ભરૂચ, નર્મદા, સુરત, તાપી, નવસારી, દાદરા નગર હવેલીમાં હળવાથી મધ્યમ વરસાદની આગાહી છે. ગીર સોમનાથ, ભાવનગર, અમરેલી છૂટાછવાયા સ્થળોએ વરસાદની અને થંડરસ્ટોર્મની વોર્નિંગ છે.
2 એપ્રિલના રોજ સાબરકાંઠા, અરવલ્લી, મહીસાગરમાં હળવાથી મધ્યમ વરસાદની આગાહી છે. આ ઉપરાંત ભરૂચ, નર્મદા, સુરત, દાહોદ, છોટા ઉદેપુર, અમરેલી, ભાવનગર, ગીર સોમનાથ અને દીવમાં પણ કમોસમી વરસાદ વરસી શકે છે.
આ પણ વાંચો: Ahmedabad શહેરમાં કોર્પોરેશન દ્વારા અપાતું પાણી પીવાલાયક છે કે નહિ ? જાણો અહેવાલ
હવામાન નિષ્ણાત પરેશ ગોસ્વામીએ શું કરી છે આગાહી
હવામાન નિષ્ણાત પરેશ ગોસ્વામીએ ગુજરાતના દક્ષિણ અને સૌરાષ્ટ્રના વિસ્તારોમાં કમોસમી વરસાદ અને હીટવેવની આગાહી કરી છે. પાંચમી એપ્રિલ સુધી આ સ્થિતિ રહેશે. ગુજરાતના અનેક વિસ્તારોમાં હવામાનમાં પલટો આવ્યો છે ત્યારે હવામાન નિષ્ણાત પરેશ ગોસ્વામીએ ગુજરાતના અનેક વિસ્તારોમાં થંડરસ્ટ્રોમ સાથે કમોસમી વરસાદની આગાહી કરી છે. આ સાથે વરસાદની સાથે કેટલાક વિસ્તારોમાં હીટવેવની વોર્નિંગ પણ આપી છે
પરેશ ગોસ્વામીએ જણાવ્યું છે કે, મહારાષ્ટ્ર પર જે અસ્થિરતા બની હતી તેનો ટર્ફ ગુજરાત સુધી લંબાયો છે. જેના કારણે ગુજરાતના હવામાનમાં પલટો પણ આવ્યો છે. પહેલી તારીખથી થંડરસ્ટ્રોમ એક્ટિવિટી પણ થઈ શકે છે. જ્યાં થંડરસ્ટ્રોમ એક્ટિવિટી થાય તે વિસ્તારોમાં ગાજવીજ અને પવન સાથે વરસાદ થઈ શકે છે. પહેલી અને બીજી તારીખોમાં સૌરાષ્ટ્રના વિસ્તારોમાં હવામાનમાં પલટો આવશે.
આ પણ વાંચો: Gujarat Weather: ગરમીમાં વરસાદની આગાહીથી ધરતીપુત્રો બન્યા ચિંતિત, જાણો ક્યાં પડશે કમોસમી વરસાદ
બોટાદ, ભાવનગર, અમરેલી, ગીર સોમનાથ, જૂનાગઢ અને દક્ષિણ રાજકોટના ભાગોમાં છૂટાછવાયા વિસ્તારોમાં સામાન્ય માવઠાના ઝાપટાં પડે તેવી શક્યતાઓ છે. મોરબી, સુરેન્દ્રનગર, જામનગર, પોરબંદર જેવા વિસ્તારોમાં તેમાં માવઠાની શક્યતાઓ દેખાતી નથી. અહીં વાદળો બંધાઈ શકે છે અને એકલદોકલ વિસ્તારોમાં માવઠું થઈ શકે છે તે અપવાદરૂપ રહેશે.