‘તેરે ઇશ્ક મેં…’ ફિલ્મે બે દિવસમાં કર્યું 33 કરોડનું કલેક્શન: જાણો કેવી છે ફિલ્મની સ્ટોરી
મુંબઈ: 2025માં રોમેન્ટિક ડ્રામા ફિલ્મોનો દબદબો યથાવત્ રહ્યો છે. ‘સૈયારા’ અને ‘એક દીવાને કી દીવાનીયાત’ જેવી ફિલ્મોની સફળતા બાદ, હવે અભિનેતા ધનુષ અને કૃતિ સેનન સ્ટારર રોમેન્ટિક ડ્રામા ફિલ્મ “તેરે ઇશ્ક મેં…” બોક્સ ઓફિસ પર ધૂમ મચાવી રહી છે. 28 નવેમ્બરના રોજ રિલીઝ થયેલી આ ફિલ્મને દર્શકો તરફથી જબરદસ્ત પ્રતિસાદ મળી રહ્યો છે. જેનો અંદાજ તેના શરૂઆતના બે દિવસના બોક્સ ઓફિસ કલેક્શન પરથી લગાવી શકાય છે.
“તેરે ઇશ્ક મેં…” ફિલ્મનું બોક્સ ઓફિસ કલેક્શન
ફિલ્મી વિશ્લેષકો પાસેથી મળતી માહિતી મુજબ, “તેરે ઇશ્ક મેં…” ફિલ્મનું પહેલા દિવસનું કલેક્શન રૂ. 16.50 કરોડ હતું. જ્યારે તેનું બીજા દિવસનું કલેક્શન રૂ. 17 કરોડથી વધુનું થયું હતું. આમ, માત્ર બે દિવસમાં ધનુષ અને કૃતિની આ ફિલ્મે રૂ. 33 કરોડથી વધુની કમાણી કરી લીધી છે. વિકેન્ડમાં આ કલેક્શનનો આંકડો હજુ પણ વધશે અને નવો રેકોર્ડ બનશે એવું ફિલ્મી સૂત્રો અનુમાન લગાવી રહ્યા છે.
ફિલ્મમાં ધનુષનો આક્રમક અંદાજ
‘તેરે ઇશ્ક મેં…’ એકતરફી અને અધૂરા પ્રેમની વાર્તા છે, જેને દર્શકો ખૂબ પસંદ કરી રહ્યા છે. ફિલ્મમાં ધનુષ અને કૃતિ સેનને શાનદાર અભિનય કર્યો છે. એવું દર્શકો જણાવી રહ્યા છે. ધનુષે ‘શંકર’ નામના એક એગ્રેસિવ લવર અને એરફોર્સના અધિકારીની ભૂમિકા ભજવી છે, જે મુક્તિ (કૃતિ સેનન)ના પ્રેમમાં છે. તેમની લવસ્ટોરી કોલેજમાં શરૂ થાય છે, પરંતુ મુક્તિ અન્ય કોઈ સાથે લગ્ન કરે છે, જેથી શંકરના ગુસ્સાખોર અને હિંસક બની જાય છે. એ.આર. રહેમાનનું મ્યુઝિક પણ ફિલ્મમાં પ્રાણ પૂરે છે. ફિલ્મમાં ઝીશાન અય્યુબ અને પરમવીર ચીમા પણ મુખ્ય ભૂમિકાઓમાં છે.
ઉલ્લેખનીય છે કે, ‘તેરે ઇશ્ક મેં…’ ફિલ્મ હિન્દી, તમિલ, તેલુગુ, મલયાલમ અને કન્નડ એમ પાંચ ભાષાઓમાં એકસાથે રિલીઝ થઈ હતી, જેમાં રૂ. 4.49 કરોડનું એડવાન્સ બુકિંગ થયું હતું. આ ફિલ્મને લઈને ટ્રેડ વિશ્લેષકોએ આગાહી કરી હતી કે આનંદ એલ. રાય દ્વારા દિગ્દર્શિત આ હાઈ રોમેન્ટિક ડ્રામા બ્લોકબસ્ટર સાબિત થશે.
આપણ વાંચો: રણવીર સિંહને દેવી-દેવતા અને ભૂત વચ્ચેનો ભેદ ખબર નથી? ચામુંડા માતાને ‘ફીમેલ ઘોસ્ટ’ કહેતા થયો વિવાદ
