શું શમિતા શેટ્ટી રિલેશનશિપમાં છે? દીપેશ શર્મા સાથેના સંબંધો પર અભિનેત્રીએ મૌન તોડ્યું

મુંબઈ: બોલીવુડની સુંદર અભિનેત્રી શમિતા શેટ્ટીએ તાજેતરમાં 2 ફેબ્રુઆરીના રોજ પોતાનો 47મો જન્મદિવસ અત્યંત ધામધૂમથી ઉજવ્યો હતો. આ ખાસ પ્રસંગે તેની બહેન શિલ્પા શેટ્ટી અને જીજુ રાજ કુન્દ્રા સહિતના અંગત મિત્રો હાજર રહ્યા હતા. જોકે, આ સેલિબ્રેશનમાં ટેકનો આર્ટિસ્ટ દીપેશ શર્માની હાજરીએ સોશિયલ મીડિયા પર નવી ચર્ચા જગાવી છે. શમિતા અને દીપેશને સાથે જોઈને ચાહકોમાં એવી અટકળો તેજ થઈ હતી કે શું આ બંને એકબીજાને ડેટ કરી રહ્યા છે?

પોતાની પર્સનલ લાઈફ વિશેની અફવાઓ વધતી જોઈને શમિતા શેટ્ટીએ પોતે જ ઈન્સ્ટાગ્રામ પર સ્પષ્ટતા કરી છે. તેણે પોતાની ઈન્સ્ટા સ્ટોરીમાં લખ્યું કે, “હું અત્યારે સિંગલ છું. સાચી મિત્રતાને ખોટી રીતે સમજવાનું બંધ કરો, આ બધી વાતો તદ્દન બકવાસ છે.” શમિતાના આ નિવેદને તેની અને દીપેશ વચ્ચેના અફેરની વાતો પર પૂર્ણવિરામ મૂકી દીધું છે. શમિતા હંમેશા પોતાની લાઈફ વિશે ખુલીને વાત કરવા માટે જાણીતી છે.

આ ડેટિંગ અફવાઓ પાછળનું કારણ દીપેશ શર્માની એક પોસ્ટ હતી. દીપેશે શમિતાના બર્થડેની કેટલીક તસવીરો શેર કરી હતી, જેમાં તે અભિનેત્રીની ખૂબ નજીક જોવા મળ્યો હતો. તેણે કેપ્શનમાં લખ્યું હતું કે, “હેપ્પી બર્થડે મારી હંમેશાની ખુશીનું રહસ્ય, જે મારી બધી સ્ટોરી જાણવા છતાં સાથે છે. લવ યુ, માય શમ્સ્ટર.” આ રોમેન્ટિક કેપ્શન અને તસવીરો જોઈને ફેન્સે માની લીધું હતું કે બંને વચ્ચે કંઈક ચાલી રહ્યું છે, પણ હવે શમિતાએ તેને માત્ર ‘મિત્રતા’ ગણાવી છે.

કોણ છે આ ટેકનો આર્ટિસ્ટ દીપેશ શર્મા?

દીપેશ શર્મા મુંબઈ સ્થિત એક જાણીતા ટેકનો આર્ટિસ્ટ અને ડીજે છે. તે ‘ટુમોરોલેન્ડ’ જેવા વિશ્વ વિખ્યાત મ્યુઝિક ફેસ્ટિવલ્સમાં પરફોર્મ કરી ચૂક્યો છે અને ગોવામાં પણ તેનો પોતાનો ક્લબ છે. સોશિયલ મીડિયા પર તેની મોટી ફેન ફોલોઈંગ છે અને તે બોલીવુડના ઘણા સેલેબ્સ સાથે મિત્રતા ધરાવે છે. શમિતા સાથેની તેની મિત્રતા પણ ઘણી જૂની છે, જેને લોકોએ પ્રેમ માની લીધો હતો.

શમિતા શેટ્ટી ક્યારેય પોતાના સંબંધો છુપાવતી નથી. ‘બિગ બોસ OTT’ દરમિયાન રાકેશ બાપટ સાથેના તેના સંબંધો ખૂબ ચર્ચામાં રહ્યા હતા. જોકે, શો પૂરો થયાના થોડા સમય બાદ બંનેનું બ્રેકઅપ થઈ ગયું હતું. રાકેશ સાથે અલગ થયા પછી પણ શમિતાએ તેની સાથે સારી મિત્રતા જાળવી રાખી છે. હાલમાં શમિતા પોતાની પ્રોફેશનલ લાઈફ પર ધ્યાન આપી રહી છે.