‘એક નાનું બાળક આવવાનું છે’: રણદીપ હુડા અને લિન લૈશરામે મેરેજ એનિવર્સરી પર ફેન્સને આપી ખુશ ખબર
મુંબઈ: બોલીવુડ અભિનેતા રણદીપ હુડાએ 2023માં અભિનેત્રી લિન લૈશરામ સાથે લગ્ન કર્યા હતા, આજે તેમની લગ્નની બીજી એનિવર્સરી છે. આજનો દિવસ આ દંપતીના ચાહકો માટે થાસ છે. કારણ કે, રણદીપ હુડા અને લિન લૈશરામે પોતાના ચાહકો સાથે એક મોટી ખુશખબર શેર કરી છે.
ટૂંક સમયમાં બનશે માતા-પિતા
રણદીપ હુડાની પત્ની લિન લૈશરામ ગર્ભવતી છે અને આ દંપતીએ સોશિયલ મીડિયા પર પોસ્ટ કરીને સત્તાવાર જાહેરાત કરી છે. ઇન્સ્ટાગ્રામ પર એક ફોટો શેર કરીને તેમણે લખ્યું છે કે, “બે વર્ષનો પ્રેમ, એડવેન્ચર અને હવે… એક નાનું બાળક આવવાનું છે.”
રણદીપ હુડા અને લિન લૈશરામે 29 નવેમ્બર, 2023ના રોજ મણિપુરના ઇમ્ફાલ ખાતે પરંપરાગત રીતે લગ્ન કર્યા હતા. જે ચર્ચાનું કેન્દ્ર બન્યા હતા. તેમના લગ્નને આજે બે વર્ષ પૂર્ણ થયા છે. આ જાહેરાત બાદ તરત જ તેમના ચાહકો અને ફિલ્મ ઇન્ડસ્ટ્રીના મિત્રોએ તેમને શુભેચ્છાઓ પાઠવવાનું શરૂ કરી દીધું હતું.
ફેઝલ મલિક, ગીતિકા વૈદ્ય, અંજલી આનંદ, સંજય સૈની સહિતના કલાકારોએ તેઓની પોસ્ટના કોમેન્ટ બોક્સમાં શુભેચ્છાઓ પાઠવી હતી.
ઉલ્લેખનીય છે કે, રણદીપ હુડાની પત્ની લિન લૈશરામ પણ એક અભિનેત્રી છે. તેણે બોલીવુડની ઘણી ફિલ્મોમાં કામ કર્યું છે. 2007માં લિને ફિલ્મ ‘ઓમ શાંતિ ઓમ’ માં એક નાનો રોલ કર્યો હતો. ત્યારબાદ તે ‘જાને જાન’, ‘મેરી કોમ’, અને ‘એક્સોન’ જેવી ફિલ્મોમાં પણ જોવા મળી હતી.
