‘વિમાન ઉતરીને અચાનક પાછું આકાશમાં ચાલ્યું ગયું’: રણવીર કપૂરની બહેનને થયો ભયાનક અનુભવ
મુંબઈ: રણવીર કપૂરની બહેન રિદ્ધિમા કપૂર સાથે તાજેતરમાં એક ભયાનક ઘટના ઘટી હતી. રિદ્ધિમા પોતાની દીકરી સાથે વિમાનમાં બેસીને દિલ્હીથી મુંબઈ જઈ રહી હતી. આ દરમિયાન એક એવી ક્ષણ આવી હતી, જ્યારે રિદ્ધિમા કપૂર અને તેની દીકરી સહિત દરેકના શ્વાસ થંભી ગયા હતા. આ મુસાફરીમાં રિદ્ધિમા કપૂર સાથે અનુપમ ખેર અને ક્રિકેટર અજીંક્ય રહાણે પણ હતા.
રિદ્ધિમા કપૂરે સોશિયલ મીડિયા પર આપી માહિતી
દિલ્હીથી મુંબઈ જઈ રહેલી ફ્લાઇટમાં અનુપમ ખેર અને અજિંક્ય રહાણે સાથે રણવીર કપૂરની બહેન રિદ્ધિમા કપૂર સાહની અને તેની દીકરી સમારા સાહની પણ યાત્રા કરી રહ્યા હતા. આ દરમિયાન ફ્લાઈટમાં કંઈક એવું બન્યું હતું, જેનાથી તમામ મુસાફરો ગભરાઈ ગયા હતા. આ અંગે રિદ્ધિમા કપૂરે ઇન્સ્ટાગ્રામ પર સ્ટોરી શેર કરીને જણાવ્યું કે, “આજે મેં અને મારી દીકરીએ એક એવી ક્ષણ અનુભવી, જેને હું ક્યારેય ભૂલી શકીશ નહીં. અમારું વિમાન જમીન પર ઉતરીને અચાનક પાછું આકાશમાં ચાલ્યું ગયું.”
રિદ્ધિમા કપૂરે આગળ લખ્યું કે, “થોડી સેકંડ માટે અમારા શ્વાસ થંભી ગયા હતા. જ્યારે તે(સમારા) ગભરાયેલી આંખોથી મને જોઈ રહી હતી. મેં તેનો હાથ જકડીને પકડી રાખ્યો હતો. હું માત્ર તેના માટે મક્કમતાથી ચૂપચાપ પોતાના શ્વાસને કંટ્રોલમાં રાખવાનો પ્રયાસ કરી રહી હતી.”
અનુપમ ખેરે જણાવ્યો પોતાનો અનુભવ
અનુપમ ખેરે પણ અજિંક્ય રહાણે સાથેનો પોતાનો વીડિયો શેર કરીને જણાવ્યું કે, “પ્રિય અજિંક્ય રહાણે! દિલ્હીથી મુંબઈ સુધી તમારી સાથેની યાત્રા કરીને ઘણુ સારું લાગ્યું. હું હંમેશા એક શાનદાર ખિલાડી તરીકે તમારી સરાહના કરતો આવ્યો છું. પરંતુ તમારી વિનમ્રતા અને સાદગી પણ બહુ ગમી. માફ કરશો. મારી ભાષા અને વાતચીત એકદમ બરાબર હતી, જ્યાં સુધી અમારું વિમાન જમીન પર ઉતર્યું ન હતું, પરંતુ જેવું તે ફરીથી ઉડ્યું કેટલાક શુદ્ધ હિંદી શબ્દો આપમેળો મોંમાંથી નીકળી ગયા.”
અનુપમ ખેરે આગળ જણાવ્યું કે, “એ ભયાનક ક્ષણે મને એક સભ્ય માણસ રહેવા દીધો નહીં. પરંતુ સારી વાત એ છે કે, હવે અમે બંને આ યાત્રાને એકથી વધુ બાબતોને લઈને યાદ રહેશે. હંમેશા પ્રેમ અને પ્રાર્થના. જય હિંદ.”
