(વાણિજ્ય પ્રતિનિધિ તરફથી)
મુંબઈઃ અમેરિકી ફેડરલ રિઝર્વ આગામી ડિસેમ્બર મહિનાની નીતિવિષયક બેઠકના અંતે વ્યાજદરમાં કાપ મૂકશે અને વૈશ્વિક બજારમાં પ્રવાહિતામાં વધારો થવાના આશાવાદ વચ્ચે ગઈકાલે વિશ્વ બજારમાં કોપર સહિતની ધાતુઓના ભાવમાં ઝડપી તેજી જોવા મળી હતી.
આમ વૈશ્વિક પ્રોત્સાહક અહેવાલે સ્થાનિક જથ્થાબંધ ધાતુ બજારમાં આજે સપ્તાહના અંતે એક માત્ર કોપર યુટેન્સિલ્સ સ્ક્રેપ તથા નિકલમાં જોવા મળેલા કિલોદીઠ અનુક્રમે રૂ. 13 અને રૂ. પાંચના ઘટાડાને બાદ કરતાં અન્ય તમામ ધાતુઓમાં સ્ટોકિસ્ટોની લેવાલી ઉપરાંત સાર્વત્રિક સ્તરેથી માગને ટેકે ભાવમાં કિલોદીઠ રૂ. એકથી 23 સુધીની તેજી જોવા મળી હતી.
બજારનાં સાધનોના જણાવ્યાનુસાર આજે સ્થાનિકમાં વૈશ્વિક પ્રોત્સાહક અહેવાલે સ્ટોકિસ્ટોની આક્રમક લેવાલી ઉપરાંત વપરાશકાર ઉદ્યોગ તથા સ્થાનિક ડીલરોની માગને ટેકે ટીનના ભાવ કિલોદીઠ રૂ. 23 વધીને રૂ. 3562, કોપર આર્મિચરના ભાવ કિલોદીઠ રૂ. 18 વધીને રૂ. 944, કોપર વાયરબારના ભાવ કિલોદીઠ રૂ. 16 વધીને રૂ. 1075, બ્રાસ શીટ કટિંગ્સના ભાવ કિલોદીઠ રૂ. 15 વધીને રૂ. 670, કોપર કેબલ સ્ક્રેપના ભાવ કિલોદીઠ રૂ. 12 વધીને રૂ. 971 અને કોપર સ્ક્રેપ હેવીના ભાવ કિલોદીઠ રૂ. નવ વધીને રૂ. 957ના મથાળે રહ્યા હતા.
વધુમાં આજે કોપર અને ટીનની આગેવાની હેઠળ અન્ય ધાતુઓમાં પણ સ્ટોકિસ્ટોની છૂટીછવાઈ લેવાલી તેમ જ ઔદ્યોગિક વપરાશકારોની માગને ટેકે ભાવમાં સુધારાતરફી વલણ જોવા મળ્યું હતું તેમાં બ્રાસ યુટેન્સિલ્સ સ્ક્રેપના ભાવ કિલોદીઠ રૂ. પાંચ વધીને રૂ. 603 અને એલ્યુમિનિયમ ઈન્ગોટ્સ, ઝિન્ક સ્લેબ અને લીડ ઈન્ગોટ્સના ભાવ કિલોદીઠ રૂ. એક વધીને અનુક્રમે રૂ. 278, રૂ. 312 અને રૂ. 185ના મથાળે રહ્યા હતા.
જોકે, આજે માત્ર કોપર યુટેન્સિલ્સ સ્ક્રેપ તથા નિકલમાં સ્ટોકિસ્ટોની નફારૂપી વેચવાલીનું દબાણ ઉપરાંત સાર્વત્રિક સ્તરેથી માગ નિરસ રહેતાં ભાવ અનુક્રમે કિલોદીઠ રૂ. 13 ઘટીને રૂ. 860 અને રૂ. પાંચ ઘટીને રૂ. 1333ના મથાળે રહ્યા હતા, જ્યારે એલ્યુમિનિયમ યુટેન્સિલ્સ સ્ક્રેપમાં ખપપૂરતી માગને ટેકે ભાવ કિલોદીઠ રૂ. 211ના મથાળે ટકેલા રહ્યા હતા.
