ગુજરાત વિધાનસભાની કાર્યવાહીનું પ્રસારણ ‘જીવંત’ કરવા માટે કોંગ્રેસે અધ્યક્ષને લખ્યો પત્ર

ગાંધીનગર: ગુજરાત વિધાનસભા સત્રની કાર્યવાહીને જીવંત પ્રસારણ કરવાનો મુદ્દો ફરી ચર્ચામાં આવ્યો છે. દેશના અનેક રાજ્યોની વિધાનસભાની કાર્યવાહીનું પણ જીવંત પ્રસારણ કરવામાં આવતું હોય તો ગુજરાતમાં પણ વિધાનસભાની કાર્યવાહીનું જીવંત પ્રસારણ થાય તેમ જ ધારાસભ્યોએ કરેલી ચર્ચાની કોપી તેમને મળે તેવી માંગ કોંગ્રેસ નેતા અમિત ચાવડાએ ઉઠાવી છે. તેમણે આ અંગે વિધાનસભાના અધ્યક્ષ શંકર ચૌધરીને પત્ર લખ્યો છે.

મુદ્દા સરકારના ધ્યાન પર લાવે

કોંગ્રેસ નેતા અમિત ચાવડાએ પત્રમાં માંગ કરી છે કે, “ગુજરાતની પ્રજા પોતાના પ્રશ્નો-સમસ્યાઓ-સૂચનો-સુવિધાઓ અને સુશાસન માટે પોતાનો અવાજ રજૂ કરવા 182 વિધાનસભા વિસ્તારોમાંથી પોતાના પ્રતિનિધિને ચૂંટીને વિધાનસભામાં ચૂંટીને મોકલે છે.

આપણ વાંચો: ગુજરાત વિધાનસભાના બજેટ સત્રમાં ‘સીસીટીવી કાંડ’નો મુદ્દો ગાજ્યો, સરકારે આપ્યો જવાબ

વિધાનસભામાં ચૂંટાઈને આવતો પ્રજાનો પ્રતિનિધિ ચાહે કોઈપણ પક્ષનો કે વિસ્તારનો હોય તેનો સતત પ્રયત્ન રહે છે કે પોતાના વિસ્તારના લોકો અને ગુજરાતની જનતાનો અવાજ અને લાગણી-માંગણી વિધાનસભામાં રજૂ કરે અને સરકારના ધ્યાન પર લાવે.

પ્રજાના ટેક્સથી થાય છે ખર્ચ

તેમણે આગળ કહ્યું હતું કે દેશની પાર્લામેન્ટમાં સંસદની કાર્યવાહી તેમજ અનેક રાજ્યોની વિધાનસભાની કાર્યવાહીનું પણ જીવંત પ્રસારણ કરવામાં આવે છે. ગુજરાતમાં કોંગ્રેસ દ્વારા વખતોવખત વિધાનસભાની કાર્યવાહીનું જીવંત પ્રસારણની માંગણી કરવામાં આવી છે.

આપણ વાંચો: ગુજરાત વિધાનસભાના બજેટ સત્રનો કોંગ્રેસના હંગામાંથી પ્રારંભ…

પ્રજાના ટેક્સનાં પૈસાથી વિધાનસભાની સમગ્ર કાર્યવાહીનો ખર્ચ, તમામ ધારાસભ્યો અને મુખ્ય પ્રધાન સહીત મંત્રીમંડળના સભ્યો અને વિવિધ વિભાગોના અધિકારીઓને સુવિધાઓ પ્રજાના ટેક્સનાં પૈસામાંથી મળે છે. આથી પ્રજાના ચૂંટાયેલા પ્રતિનિધિઓ અને સરકારી તંત્ર વિધાનસભામાં કઈ રીતે પ્રજાની સુખાકારી-સુવિધા અને સુરક્ષા બાબતે કાર્યવાહી કરી રહ્યા છે તે જોવાનો અને જાણવાનો પ્રજાનો પણ અધિકાર બને છે.

માહિતી તરફથી મળતા વીડિયો એકતરફી

તે ઉપરાંત સાથોસાથ ધારાસભ્યો પણ પોતાના વિસ્તારના પ્રશ્નો અને વિકાસ માટે જે ચર્ચા કરે છે તેની માહિતી જનતા સુધી પહોંચાડે તે જરૂરી છે. તેમણે કહ્યું હતું કે માહિતી વિભાગ દ્વારા જે વિધાનસભાની કાર્યવાહીના અંશો “લોકશાહીના ધબકાર”ના સ્વરૂપે મોકલવામાં આવે છે તે અધૂરા-એકતરફી અને પક્ષપાત પૂર્વકના તેમ જ અમુક વીડિયો રાજકીય એજન્ડાને ઉજાગર કરતાં હોય છે.

જેનાથી વિપક્ષને આ બાબતે અન્યાય થાય છે. તેમણે માંગ કરી છે કે ગુજરાત વિધાનસભાની કાર્યવાહીનું જીવંત પ્રસારણ ચાલુ સત્રથી જ શરુ કરવામાં આવે અને વિધાનસભાની ચર્ચાના અધ્યક્ષે માન્ય કરેલ પ્રવચનોની વીડિયોની નકલ સભ્યોને આપવાની માંગ કરી છે.