સ્ટેટ બેંક ઓફ ઈન્ડિયાએ એમએસ ધોનીને બ્રાન્ડ એમ્બેસેડર તરીકે નિયુક્ત કર્યા
દિવાળી પહેલા સ્ટેટ બેંક ઓફ ઈન્ડિયા(SBI)એ દિગ્ગજ ભારતીય ક્રિકેટર અને પૂર્વ ક્રિકેટ કેપ્ટન મહેન્દ્ર સિંહ ધોનીને તેના નવા બ્રાન્ડ એમ્બેસેડર તરીકે જાહેર કર્યા છે.
એસબીઆઈના ચેરમેન દિનેશ ખરાએ કહ્યું કે અમે એસબીઆઈના બ્રાન્ડ એમ્બેસેડર તરીકે એમએસ ધોનીને નિયુક્ત કરતા ખૂબ જ આનંદ અનુભવીએ છીએ. તેમણે કહ્યું કે એસબીઆઈ સાથે ધોનીનું જોડાણ અમારી બ્રાન્ડને નવો અવતાર આપશે. આ ભાગીદારી સાથે અમારો ઉદ્દેશ્ય વિશ્વાસ, અખંડિતતા અને અતૂટ સમર્પણ સાથે રાષ્ટ્ર અને અમારા ગ્રાહકોની સેવા કરવાની અમારી પ્રતિબદ્ધતાને મજબૂત કરવાનો છે.
બેંકે એક નિવેદનમાં જણાવ્યું કે SBIના બ્રાન્ડ એમ્બેસેડર તરીકે, ધોની વિવિધ માર્કેટિંગ અને પ્રમોશનલ કેમ્પેઈનમાં મુખ્ય ભૂમિકા ભજવશે. તણાવપૂર્ણ પરિસ્થિતિઓમાં સંયમ જાળવવાની તેમની નોંધપાત્ર ક્ષમતા અને દબાણ હેઠળ સ્પષ્ટ રીતે વિચારવાની અને ઝડપી નિર્ણયો લેવાની તેમની ક્ષમતા તેમને SBI સાથે સમગ્ર દેશમાં તેના ગ્રાહકો અને હિતધારકો સાથે જોડાવા માટે આદર્શ પસંદગી બનાવે છે.
SBIએ કહ્યું કે આ ભાગીદારી વિશ્વસનીયતા અને નેતૃત્વના મૂલ્યોને પ્રતિબિંબિત કરતા તેના ગ્રાહકો સાથે ગાઢ સંબંધો બનાવવાની બેંકની પ્રતિબદ્ધતાનું પ્રતીક છે.
