અમદાવાદ: અમદાવાદ મ્યુનિસિપલ કોર્પોરેશન (એએમસી)એ છેલ્લા 10 વર્ષમાં નવા રહેણાંક અને કમર્શિયલ બિલ્ડિંગ્સમાં પાણીના મીટર લગાવવા માટે ₹ 50 કરોડ વસૂલ્યા હતા, પરંતુ 2014ના પોતાના જ ઠરાવનું ઉલ્લંઘન કરીને એક પણ મીટર ઇન્સ્ટોલ કરવામાં નિષ્ફળ રહ્યું હતું.
અમદાવાદ મ્યુનિસિપલ કોર્પોરેશનની સ્થાયી સમિતિએ તમામ નવા બિલ્ડિંગ્સ માટે પાણીના મીટર ઇન્સ્ટોલ કરવાનું ફરજિયાત બનાવ્યું હતું, અને એવું ઠરાવવામાં આવ્યું હતું કે મીટર વગર બિલ્ડિંગ યુઝ પરમિશન સર્ટિફિકેટ આપવામાં આવશે નહીં. જોકે, મીટર લગાવ્યા વિના જ સર્ટિફિકેટ ઇશ્યુ કરી દેવામાં આવ્યા, જેના કારણે એક દાયકા સુધી નિયમનું પાલન થઈ શક્યું નથી.
આપણ વાંચો: અમદાવાદમાં વકફના નામે રૂ.100નું કૌભાંડ! 5 નકલી ટ્રસ્ટીઓની ધરપકડ; Video
આ સમસ્યાનું મૂળ કારણ વિભાગીય વિવાદ છે. સેન્ટ્રલ સ્ટોર્સ વિભાગ અને પાણી ઉત્પાદન વિભાગ વચ્ચે મીટર કોણે ખરીદવા તે અંગે વિવાદ ચાલી રહ્યો છે. સૂત્રોએ જણાવ્યું કે, સેન્ટ્રલ સ્ટોર્સના અધિકારીઓ કહે છે કે પાણી ઉત્પાદન વિભાગ તેને ખરીદશે, જ્યારે પાણી ઉત્પાદન વિભાગના અધિકારીઓ દાવો કરે છે કે ખરીદીની જવાબદારી સેન્ટ્રલ સ્ટોર્સની છે.
આ મડાગાંઠના કારણે કોઈ ટેન્ડર બહાર પાડવામાં આવ્યું નથી. અમદાવાદ મ્યુનિસિપલ કોર્પોરેશને 2015-16માં સેન્ટ્રલ સ્ટોર્સ દ્વારા 10,000 પાણીના મીટર ખરીદ્યા હતા, પરંતુ ત્યારથી અત્યાર સુધી કોઈ ખરીદી થઈ નથી.
અન્ય એક સૂત્રએ જણાવ્યું કે, 2014ના ઠરાવ મુજબ, શહેરમાં નવા બિલ્ડિંગ્સ માટે બીયુ સર્ટિફિકેટ માટે અરજી કરતી વખતે બિલ્ડરોએ પ્રતિ યુનિટ ₹ 150 ચૂકવવાના હોય છે. ટાઉન ડેવલપમેન્ટ વિભાગ આ ફી વસૂલ કરીને પાણી ઉત્પાદન વિભાગમાં જમા કરાવે છે, જેને પાણીનું કનેક્શન આપતી વખતે મીટર ઇન્સ્ટોલ કરવાના હોય છે.
આપણ વાંચો: 2 હજાર કરોડનું એસટી કૌભાંડ
જોકે, જ્યારે સેન્ટ્રલ સ્ટોર્સ વિભાગ પાણી ઉત્પાદન વિભાગને મીટર સપ્લાય કરવામાં નિષ્ફળ જાય છે, ત્યારે ઇન્સ્ટોલેશનની પ્રક્રિયા અટકી જાય છે, જેનાથી વહીવટી મડાગાંઠ ઊભી થાય છે. બીજી એક જટિલતા એ છે કે એએમસી 10 વર્ષથી કોઈ વ્યાપક જળ નીતિને મંજૂરી આપી શક્યું નથી.
સૂત્રોના કહેવા પ્રમાણે, કોઈ નીતિ ન હોવાના કારણે પાણીના ચાર્જ નક્કી થયા નથી. દર નક્કી કર્યા વિના મીટર લગાવવાનો કોઈ અર્થ નથી. સૂત્રોના કહેવા પ્રમાણે ચૂંટાયેલા પ્રતિનિધિઓએ નવી જળ નીતિને અંતિમ સ્વરૂપ આપ્યું નથી, જે સુધારેલા પાણીના ચાર્જ લાગુ કરવા અને સંરક્ષણ હેતુઓ માટે મીટર ઇન્સ્ટોલ કરવાને યોગ્ય ઠેરવી શકે.
2014ના ઠરાવ પછી, કેટલાક બિલ્ડિંગ્સમાં પાયલોટ ધોરણે મીટર ઇન્સ્ટોલ કરવામાં આવ્યા હતા, પરંતુ ફીની વસૂલાત ચાલુ હોવા છતાં આ કાર્યક્રમ પાછળથી તરછોડી દેવામાં આવ્યો હતો.
