જમ્મુ-કાશ્મીરના શોપિયાં જિલ્લાના અલશીપોરા વિસ્તારમાં સોમવારે મોડી રાત્રે સુરક્ષા દળો અને આતંકવાદીઓ વચ્ચે અથડામણ શરૂ થઈ હતી. એન્કાઉન્ટર દરમિયાન સુરક્ષા દળોએ બે આતંકીઓને ઠાર કર્યા હતા. એન્કાઉન્ટર બાદ જમ્મુ-કાશ્મીર પોલીસ અને ભારતીય સેનાનું સર્ચ ઓપરેશન ચાલી રહ્યું છે. કાશ્મીર પોલીસે સોશિયલ મીડિયા પ્લેટફોર્મ એક્સ પર આ માહિતી આપી હતી.
જમ્મુ-કાશ્મીર પોલીસના જણાવ્યા અનુસાર માર્યા ગયેલા આતંકવાદીઓની ઓળખ આતંકવાદી સંગઠન લશ્કર-એ-તૈયબાના મોરીફત મકબૂલ અને જાજીમ ફારૂક ઉર્ફે અબરાર તરીકે થઈ હતી. અહેવાલો મુજબ આતંકવાદી અબરાર કાશ્મીરી પંડિત સંજય શર્માની હત્યામાં સામેલ હતો. હજુ વધુ આતંકવાદીઓ છુપાયેલા હોવાની આશંકાએ પોલીસ અને સુરક્ષા દળો સર્ચ ઓપરેશન ચલાવી રહ્યા છે.
આ પહેલા બુધવારે સુરક્ષા દળોએ કુલગામ જિલ્લાના કુજ્જર વિસ્તારમાં એક ઘરમાં છુપાયેલા બે આતંકીઓને ઠાર માર્યા હતા. માર્યા ગયેલા આતંકવાદીઓની ઓળખ બાસિત અમીન ભટ અને ફૈઝલ સાકિબ અહેમદ લોન તરીકે થઈ હતી. બંને સ્થાનિક હાવુરા વિસ્તારના રહેવાસી હતા.
દક્ષિણ કાશ્મીરના અનંતનાગ જિલ્લાના વત્રીગામ વનિહામા વિસ્તારમાં બુધવારે સાંજે અજાણ્યા આતંકવાદીઓ દ્વારા ધોરણ 10ના વિદ્યાર્થીની ગોળી મારીને હત્યા કરવામાં આવી હતી. વિદ્યાર્થીને ગંભીર હાલતમાં હોસ્પિટલમાં દાખલ કરવામાં આવ્યો હતો. વિદ્યાર્થીની ઓળખ વત્રીગામના રહેવાસી સાહિલ બશીર તરીકે થઈ હતી. સાહિલનું ગુરુવારે હોસ્પિટલમાં મૃત્યુ થયું હતું.