મસ્તરામની મસ્તીઃ શિયાળો શરૂ થતાં જ ઘરવાળીનો સ્વભાવ ગરમ કેમ થઈ જાય છે?

મિલન ત્રિવેદી

એ તમારે તમારા ભાઈબંધને કંઇ કહેવું છે કે હું પિયર જતી રહું?’ સવાર સવારમાં જ ચુનિયાની ઘરવાળી સવારની ઠંડીની જેમ મોબાઇલમાં ફરી વળી. મેં શાંત પાડતા કહ્યું હું ચુનિયાને સમજાવીશ. પણ મારે સમજાવવાનું શું છે?’

-તો ધાણીફૂટ ગોળીબારની જેમ મારા ભાભી તૂટી પડ્યા કે તમને બધી ખબર જ છે. અને મને તો ખાતરી છે કે તમે જ તેને ચડાવ્યા હશે.’ અરે . મને કશું ખબર નથી થયું છે શું? આ તો તમારો ફોન આવ્યો એટલે મને સમજાઈ ગયું કે ચુનિલાલ નો કાંઈક વાંક હશે. એટલે મેં કહ્યું. એમ કોઈના ધણીને સીધેસીધો વઢાઈ નહીં પહેલા કારણ જાણવું પડે…’

`આ શિયાળાની શરૂઆત થઈ છે ત્યાં તો મારા હાથમાં લિસ્ટ બનાવી અને પકડાવી દીધું. અડદીયા બનાવજો, ગુંદર પાક બનાવજો, મેથીપાક બનાવજો… તમને ખબર છે ને ગયા વર્ષે મેં આ તમામ વસ્તુ બનાવી હતી અને પછી એકે એક વસ્તુ કેવી બની કે આખી સોસાયટીમાં ઢંઢેરો ટીપ્યો હતો.’

`અડદીયાનો લોટ થોડો વધારે શેકાઈ ગયો તો કડક થઈ ગયા હતા… ગુંદર પાકમાં ભૂલથી મેં ગુંદરની આખી ટ્યૂબ ખાલી કરી નાખી હતી. ખાવાનો ગુંદર જુદો આવે છે તે કહેવું જોઈએ ને? ગોળને ભારોભાર મેથી લઈ અને મેથીપાક બનાવ્યો. ગોળના વાકે બે દાંત તમારા ભાઈના મેથીપાકમાં સલવાઈ ગયા તેમાં મારો વાંક? પેલી Youtube માં કેવો ગોળ લેવો તે થોડું જણાવે છે?’

ચાલુ ફોને હું ભૂતકાળમાં સરી ગયો. એક વર્ષ પહેલાં ચુનિયો આ તમામ પાક લઈ અને મારા ઘરે આવ્યો હતો:
`મિલનભાઈ, આખી જિંદગી કાર્યક્રમ કરતા રહેશો અને દોડાદોડી કરતા રહેશો. તમારી તબિયતનું પણ ધ્યાન રાખતા જાવ. આ લ્યો શિયાળુ પાક ખાવ.’
હરખ ભેર મેં એક આખો અડધો ઉપાડી લીધો અને મોઢામાં મુક્યો. ત્રણ કલાક સુધી ચગળ્યો ત્યારે ઓગળ્યો.

પછી થયું કે મેથીપાક ચાખ્યો … મેં મોઢામાં મૂકી અને હતી એટલી તાકાતથી બે દાંત વચ્ચે કટકાને ભીંસ્યો. કટક અવાજ આવ્યો. મારા બે દાંત મેથીપાકમાં ખૂંચી ગયા હતા. અને જિંદગીમાં આટલી કડવાણી મેં ખાધી ન હતી. પછીના બે દિવસ સુધી મોઢું કડવું રહ્યું. દર ત્રણ કલાકે ડોક્ટરના ડોઝની જેમ બે બે પેંડા ચગળીને ખાધા.

દુનિયાની જૂની આદત પ્રમાણે તે ખાવા પીવાનો શોખીન, પરંતુ આવડે કંઈ નહીં. ઘરેથી કોથમીર લેવા મોકલ્યો હોય તો ગામની લીલોતરી જોતો જાય અને શાકભાજીની લીલોતરી પણ ઉપાડતો આવે. પાપડી, તુવેર, રીંગણા, વટાણા, લીલી ડુંગળી, લીલુ લસણ, મેથીની ભાજી… અને મૂળ મુખ્ય મુદ્દો કોથમીર ભૂલી ગયો હોય.

એ પછી ઘરે આવી અને ઢગલો કરે અને ઓર્ડર કરે `આજે શાક માર્કેટમાં લીલા શાકભાજી જોઈ અને તને ઊંધિયું ખવડાવવાનું મન થયું.’
ભાભી ખુશ ખુશાલ થઈ જાય અને તેને લાગે કે હમણાં બધું ફોલીને આપશે. ચુનિયો બધું ખોલીને આપે ફોલવાનું ભાભીએ.

ઊંધિયું તો માંડ એક ટંક ચાલે, પરંતુ કપડાં ત્રણ-ચાર દિવસ ચાલે.

આ પણ વાંચો…મસ્તરામની મસ્તીઃ આપણને ગમતું ભવિષ્ય લખે તે જ્યોતિષ ઉત્તમ…

માંડ શાંતિ થઈ હોય ત્યાં એક દિવસ પાછો લીલી હળદર, આંબા હળદર, આમળા, બીટ, ગાજર, દુધી… લઈ આવે અને `તારા પિયરેથી બધા આવવાના છે તો આ બધાના જ્યૂસ બનાવી રાખ તાં સાં લાગે.’ આવો કોણીએ ગોળ લગાડી આઠ દસ દિવસ સુધી પોતે જ જ્યુસ ઠપકારી જાય.

શિયાળાના આવા માલમલીદા ખાઈ ચુનિયો લાલ ગલગોટા જેવો થઈ જાય અને ભાભી બળતરા કરી કરી અડધા થઈ જાય.
મને યાદ છે અમારા પાડોશીને ઘરે શિયાળામાં તલની ચીકી બનાવી હતી. કંઈક નવીન કરવા માટે થાળીમાં પાથરવાની જગ્યાએ નાની નાની ગોળીઓ વાળી હતી.

કોઈને દેવાનો જીવ ચાલે નહીં, પરંતુ આખો દિવસ ચગળ્યા પછી પણ તલની ગોળી ઓગળી નહીં એટલે સોસાયટીના છોકરાઓને ભેગા કરી બધાને વહેંચી દીધી.
છોકરાઓ ઉનાળાની શરૂઆત સુધી તેનાથી લખોટી રમ્યા હતા…!

અમારી સોસાયટીમાં રહેતા પથુભા દરબાર એની બે નાળી બંદૂક લઇ તેમના ઘરે ગયા હતા. 2025 તલની ગોળીઓ લઈ ફાયરિગ પ્રેક્ટિસ કરી હતી.
ચુનિયાના ઘરે બનેલો ગુંદર પાક બાળકોને હોમવર્કમાં આવેલા પ્રોજેક્ટમાં વસ્તુ ચોંટાડવા કામ આવ્યો હતો.
ઓળાના રીંગણા લઇ અને ઘરવાળી સામે ઢગલો કરો અને કહો કે આજે ઓળો બનાવજે ત્યારે એક મિનિટ માટે તો ઘરવાળીને મનમાં થતું હશે કે ભઠ્ઠામાં આને શેકું?

ઠંડીની શરૂઆત થઈ ગઈ છે. ઘરે ઘરે શિયાળાનાં વ્યંજનો બનવાના શરૂ થશે, પરંતુ વ્યંજનો ખાવા માટે વપરાવવા જોઈએ મ્યુઝિયમમાં રાખવા માટે નહીં આટલી સમજ દરેક બનાવનારે કેળવવી જોઈએ.
આપણે પુષોએ તો ઓર્ડર કરી દીધો બહેનોને પણ ખોટા પ્રયોગો કરવા ઉશ્કેરવા નહીં.

વિચારવાયુ:
ચુનિયા, આ સ્વેટર પહેરીને, હાથમાં છત્રી લઈને ક્યાં ચાલ્યો?
ચુનિયો: એ. સી. લેવા
આને કહેવાય મિક્સ ઋતુની મોજ…

આ પણ વાંચો…મસ્તરામની મસ્તીઃ લગ્ન એટલે વરસાદ ને છૂટાછેડા એટલે માવઠું