મિલન ત્રિવેદી
ચુનિયાના માથા ઉપર ઢીમડા જોઈ અને થોડું આશ્ચર્ય થયું અને ચિંતા પણ થઈ.
મેં પૂછ્યું કે ચુનીલાલ આ શું થયું?’ તમને ના પાડી છે કે ભાભી સાથે બહુ મગજમારી નહીં કરવાની એટલી હદ સુધી જ સામે બોલવાનું કે તેના મારના નિશાન જાહેર ન થાય.’
મિલનભાઈ એક પતિ પત્નીનો માર ખાય તો ગર્વ ભેર કરી શકે કે `જીવનની સમી સાંજે મારે જખ્મોની યાદી જોવી હતી બહુ ઓછા નામ જોઈ શક્યો અંગત અંગત નામ હતા…, પરંતુ આ તો સમાચાર સાંભળી અને મને થયું કે આ શું એમ પ્રશ્નાર્થમાં જ જાતે દીવાલ સાથે માથાં પછાડ્યા અને ઢીમડા ઉપસાવ્યા.’
આટલી વાત સાંભળ્યા પછી મારે એને એક ચા પીવડાવવાની ફિક્સ છે. ચા પીતા પીતા તેણે કહ્યું કે `આજે હું કોર્ટે ગયો હતો. જિંદગીમાં પતિ પત્નીના કેસ લડાતા જોયા છે પરંતુ ક્યારેય તમે પ્રેમીઓના કેસ લડાતા જોયા છે?’
શેરબજારમાં નિફ્ટી 1000 પોઇન્ટ તૂટે અને ત્યાર પછી શેર બજારની ઓફિસની બહાર મોઢા લટકાવેલા ટોળા બેઠા હોય એવડું ટોળું કોર્ટમાં પહેલીવાર જોયું.
મેં કીધું વાતમાં મોણ નાખ્યા વગર સીધી વાત કર મુદ્દો શું હતો?
અરે મિલનભાઈ બંનેનું બ્રેકઅપ થઈ ગયું હતું અને જજ પણ 50 વટી ગયો હતો એટલે રસપ્રચુર થઈ અને પ્રશ્ન પૂછતો હતો.’ હા તો મિસ લીલી તમારી શું ફરિયાદ છે તમારે શું કામ બ્રેકઅપ કરવું છે?’
એટલે લીલીએ કહ્યું કે `તે છેલ્લા એક મહિનાથી કંજૂસ થઈ ગયો છે. દર અઠવાડિયે અમારે એકવાર હોટલમાં જમવાનું નક્કી થયું હતું છેલ્લા એક મહિનાથી તે મને લઈ ગયો નથી. મિલોર્ડ છેલ્લી ગિફ્ટ આપી એને દોઢ મહિનો થયો.
પહેલા ગાડી લઈને આવતો હતો અને હવે ટૂ-વ્હિલર પર બેસાડી અને લોંગ ડ્રાઈવ તો જવા દો. શેરી ગલીમાં આટા પણ મરાવતો નથી. એટલે તાત્કાલિક એને કહું કે મારો પીછો છોડે.’
જજ સાહેબે બંટીને પૂછ્યું બોલબંટી તું શા માટે તેને છોડવા નથી માગતો?’ બંટીએ કહ્યું કેનહીં છોડુ. છેલ્લા છ મહિનાથી દર અઠવાડિયાની જગ્યાએ દર ત્રણ દિવસે હોટલમાં જમવાની જીદ કરી મને લૂંટ્યો છે. મારા ક્રેડિટ કાર્ડનું ઓવરડ્યું અમે નક્કી કર્યું હતું કે સાથે ભરશું પરંતુ છેલ્લા ઘણા મહિનાથી તેણે એક પણ હપ્તો શેર નથી કર્યો. આગલો હિસાબ ક્લિયર કરે તો છોડવા માટે હું કંઈક વિચારું.’
`મેં જેટલી વાર મોબાઈલ રિચાર્જ કરાવી દીધો છે તે બીજો કોઈ ન કરે. રિચાર્જ ઉપરાંત ઓટીટી પ્લેટફોર્મ પણ મારા ખર્ચે રિચાર્જ કર્યું છે અને હજુ છ મહિના બાકી છે તેને પાસવર્ડ બદલી નાખ્યો અને મને પણ જોવા નથી દેતી મારા પૈસા અને મને લાભ નહીં તો કહો મી લોર્ડ હું તેને કઈ રીતે છોડી શકું?’
લીલીએ વકીલ ઓબ્જેક્શન લે તે પહેલા કહ્યું `આઈ ઓબ્જેક્ટ મી લોર્ડ જ્યાં સુધી બીજો બોયફ્રેન્ડ ન મળે ત્યાં સુધી તેના રિચાર્જના પૈસા હું કઈ રીતે પાછા આપી શકું અને હું એસ્યોર્ડ કરું છું કે એક તગડો બકરો સોરી બોયફ્રેન્ડ મળે કે તરત જ હું તેના ક્રેડિટ કાર્ડના અને તમામ ઓટીટીના પૈસા પણ પરત કરી દઈશ.’
બંટીએ વચ્ચે બોલતા કહ્યું કે `જજસાહેબ હું પણ માંડ માંડ મળ્યો હતો અને હવે તેને પૈસાદાર બકરો શોધવો છે તો મારે કેટલી રાહ જોવી? અને હજુ મેં આપેલી ગીફ્ટોની તો કોઈ વાત જ નથી ઉચ્ચારતા. ભલે વપરાયેલી હોય હું ગુજરી બજારમાં અડધા ભાવે વહેંચી નાખીશ અને રોકડા કરીશ મિ લોર્ડ પરત અપાવો.’
જજ આ બધી વાત સાંભળી અને બે ગ્લાસ પાણી પી ગયા. જજને પણ તેનો ભૂતકાળ યાદ આવી ગયો હોય તેમ અંગત રીતે લીલીને કહ્યું `તમારે પર્સનલ લોન લઈ અને આ હિસાબ તાત્કાલિક ચુકતે કરી દેવો જોઈએ. તમારા મમ્મીને પણ આવી આદત હતી.’
ચુનીલાલ કહે `હું તો સ્તબ્ધ થઈ ગયો કે સાલુ કેટલા વર્ષે ક્યાં કનેક્શન નીકળે છે? અને કોર્ટે જ્યારે હુકમ કર્યો કે છોકરાને વ્યાજ સહિત તેના ખર્ચના પૈસા આપી દેવા ત્યારે જજના મોઢા ઉપર જે ખુશી હતી તેના પરથી એવું લાગ્યું કે આ જજે 25 વર્ષ પહેલાંનો ગુસ્સો અને વેર બીજી પેઢીએ જોરદાર રીતે વાળ્યું. હવે મને કહો કે હું માથા પછાડું કે નહીં?’
હું પણ વિચારે ચડ્યો કે કોર્ટ પાસે હવે લોકો કેવા પ્રકારના પ્રશ્નોમાં ન્યાયની અપેક્ષા રાખી રહ્યા છે? અને આ નવી પેઢીને થયું છે શું?
વિચારવાયુ
આજની પેઢીએ તેમના વિજાતીય ફ્રેન્ડ માટે ઓળખાણ કરાવતી વખતે કહેવું પડે છે કે આ મારો કે મારી `જસ્ટ ફ્રેન્ડ’ છે.
