ઓપિનિયન : જીડીપીમાં મહિલાઓનો ફાળો આટલો ઓછો?

-સી. એ. પ્રકાશ દેસાઈ

મેકેન્ઝી ગ્લોબલ ઇન્સ્ટિટયૂટના વૈશ્વિક અર્થવ્યવસ્થામાં નારીના રોલ અંગે જે રિપોર્ટ છે તેમાં જાણવા મળે છે કે સાઉથ એશિયામાં અને વિશ્વમાં નારીનો રોલ શું છે. શું હોવો જોઇએ અને તેનાથી વૈશ્વિક અર્થવ્યવસ્થામાં શું ફરક પડી શકે છે.

હોલિવૂડની મહાન કોમેડિયન મહિલા જોન રિવર્સ જે સપ્ટેમ્બર 2014માં લગભગ 80 વર્ષની ઉંમરે મૃત્યુ પામી તે હંમેશાં કહેતી હતી કે જો તેણે તેણી જાતને ઘરના કામકાજમાં કે જે ડોમેસ્ટિક મેડ કરી શકે તેમાં જ ગુજારી હોત તો તે આજે સફળ કોમેડિયન, ટીવી હોસ્ટ, ટીવી એંકર, રાઇટર અને પ્રોડયુસર ના હોતે.

આ પણ વાંચો: ઓપિનિયન: શીન ચેંગની અદ્ભુત સફળતા એ એક વાત સાબીત કરી છે કે…

મેકેન્ઝી તેના રિપોર્ટમાં જણાવે છે કે સાઉથ એશિયામાં 90 ટકા નારીઓની જિંદગી ક્લિનિંગ, કુકિંગની અનપેઇડ જેવી થેંકલેસ જોબમાં જ પૂરી થઇ જાય છે. ભારતના ટોટલ વર્કફોર્સમાં નારીઓની સંખ્યા જૂજ છે અને કુલ જીડીપીમાં તેનો ફાળો માત્ર 17 ટકા જ છે.

જયારે ચીનની કુલ જીડીપીમાં નારી શક્તિનો ફાળો 41 ટકા છે.

રિપોર્ટ વધુમાં જણાવે છે કે વિકાસશીલ અને વિકસિત દેશોમાં પણ હજુ પણ નારીઓને નોકરીમાં પ્રમોશન, પગાર અને જોબ કવોલિટીમાં પુરુષ કર્મચારીના પ્રમાણમાં સહન કરવું
પડે છે.

સાઉથ એશિયામાં નારીઓ ઘર, બાળકો, ઘરના સભ્યોની સંભાળ, રસોઇ અને ઘરકામ કરે છે તેનું મૂલ્ય રૂપિયામાં તોલવુ બહુ મુશ્કેલ છે અને તે રકમ જીડીપીમાં જોડી નથી શકાતી. કારણ કે તે અનપેઇડ જોબ છે! રિપોર્ટમાં જણાવ્યું છે કે જો આ નારીઓ બહાર જોબ કરે તો તેઓ કમાશે તેટલું જ નહીં પણ ઘરકામ કરનારી મહિલાઓને કામ મળશે અને આમ ડબલ રોજગાર પેદા કરી શકાશે. લોકોનું જીવનધોરણ સુધરશે તેટલું જ નહીં પણ દેશની જીડીપીમાં આના કારણે 5 ટકા જેટલો વધારો થઇ શકશે.

આ પણ વાંચો: વિશ્વભરમાં ફેલાઇ રહ્યો છે સ્વદેશી કલ્ચરનો પવન?

આ રીતે જો દુનિયાના બધા દેશોમાં નારીઓ ઘરકામ છોડીને કે તેની સાથે બહાર જોબ કરવા લાગે તો દુનિયાની જીડીપી 28.4 ટ્રિલિયન ડૉલર્સની થઇ શકે છે અને જે તે દેશોની કુલ જીડીપીમાં 5 ટકાથી લઇને 20 ટકા જેટલો તોતિંગ વધારો કરી તેઓની આર્થિક સ્થિતિમાં આમૂલય પરિવર્તન લાવી શકે છે. નારીઓના કામ કરવાથી જે તે દેશ કે સમૂહની આર્થિક સ્થિતિમાં ફાયદો થઇ શકે છે. તેનો અંદાજ નીચે મુજબ છે. દા. ત. ભારતમાં જો નારીઓ ઘરકામની સાથે અથવા ઘરકામમાં બીજા કર્મચારીઓને રાખીને જોબ કરે તો આર્થિક ફાયદો 60 ટકા સુધી થઇ
શકે છે.

ભારતમાં શિક્ષિત, અર્ધશિક્ષિત કે અશિક્ષિત નારીઓને ઘરની ચાર દીવારીમાં જિંદગી ગુજારવા મજબૂર કરવામાં અજ્ઞાનતા, સામાજિક પછાતતા, શંકાશીલ સ્વભાવ કે જો નારીઓ બહાર જોબ કરીને પૈસા કમાશે તો સ્વતંત્ર કે આઝાદ થઇ જાશે કે પછી ઘરની આર્થિક સ્થિતિ સારી હોવાના કારણે નારીઓની આવક બિનજરૂરી છે તેવા ઘણા કારણો છે. પણ આ બધાના કારણે સામાજિક અને આર્થિક નુકસાન બહુ મોટું થઇ રહ્યું છે. કારણકે તેનાથી દેશ સમાજના એક મોટા વર્ગની શૈક્ષણિક અને બુદ્ધિધનનો લાભ ગુમાવી રહ્યો છે. આપણે જોઇ શકીએ છીએ કે વિદેશમાં અને દેશમાં કેટલીય બૅન્ક્સ જેવી કે સ્ટેટ બૅન્ક ઑફ ઇન્ડિયા, એક્સિસ બૅન્ક, આઇસીઆઇસીઆઇ બૅન્ક, એચએસબીસી બૅન્ક, બાયોફોન કંપની અને પેપ્સીકોલા જેવી કંપનીઓમાં નારીઓ ઉચ્ચ હોદા પર બેસીને અમૂલ્ય સેવાઓ આપી રહી છે.

આ પણ વાંચો: ઓપિનિયન: શા માટે ટ્રમ્પની નીતિઓ ચર્ચાના ચકડોળે?

અફસોસની વાત તો એ છે કે ભારતમાં 70 અને 80ના દશકાઓમાં 17 વર્ષ મહિલા વડાં પ્રધાન અને કેટલાય રાજયોમાં મહિલા મુખ્ય મંત્રીઓ હોવા છતાં 21મી સદીમાં માત્ર પુરુષના પ્રમાણમાં બહુ ઓછી નારીઓ જોબ કરે છે. આમ નારી શક્તિને વિકસાવવા ઉપર કયારેય ધ્યાન કેન્દ્રિત નથી કરવામાં આવ્યું.

માત્ર ઇન્ટરનેશનલ વિમન્સ ડે ઉજવવાથી નારીઓનો વિકાસ નથી થવાનો. ભારત અને વિશ્વના અન્ય દેશોએ મહિલા પાવરનો ઉપયોગ કરીને તેઓની અને સમાજની આર્થિક સ્થિતિ સુધારવાની જરૂરત છે અને તેના માટે જરૂરી છે સમાજમા નારીઓનું સ્થાન ઘરની ચાર દીવારીમાંથી બહાર કાઢીને તક આપીને યોગ્ય જગ્યાએ આપવાનું જેમ કે બ્રિટનની ભૂતપૂર્વ મહિલા વડાં પ્રધાન માર્ગારેટ થેચરનું કહેવું હતું કે ‘એની વુમન વ્હૂ અન્ડરસ્ટેન્ડસ ધ પ્રોબ્લેમ ઓફ રનિંગ અ હોમ વીલ બી નીઅરર ટુ અંડરસ્ટેન્ડિંગ ધ પ્રોબ્લેમ્સ ઑફ રનિંગ અ કન્ટ્રી.’