ભારતીય વિદ્યાર્થીઓ માટે વિદેશમાં અભ્યાસની ઉજ્જવળ તક…

નરેન્દ્ર કુમાર

ભારત અને કેનેડા વચ્ચે જ્યારથી ખાલિસ્તાની મુદ્દે રાજદ્વારી તણાવ વધી ગયો છે , ત્યારથી, કેનેડાએ ભારતીય વિદ્યાર્થીઓને ઘણી રીતે હેરાન કરવાનું શરૂ કર્યું છે, જેમ કે વિઝા પ્રક્રિયામાં જાણી જોઈને વિલંબ કરવો, જેના કારણે વિદ્યાર્થીઓને અભ્યાસ શરૂ કરવામાં મુશ્કેલીનો સામનો કરવો પડી રહ્યો છે. વર્ક પરમિટ અને પીઆર અંગે નિયમો કડક બનાવાયા છે.

ભારતના ઘણા વિદ્યાર્થીઓ અભ્યાસ પછી કેનેડામાં કામ કરવા અથવા કાયમી રહેવાસી બનવાનું વિચારતા હોવાથી, કેનેડાએ તાજેતરમાં વર્ક પરમિટ અને પીઆર માટેના નિયમો વધુ કડક બનાવ્યા છે. જેના કારણે વિદ્યાર્થીઓ માટે નોકરી શોધવી અને કાયમી ધોરણે સ્થાયી થવું મુશ્કેલ બની રહ્યું છે. આ ઉપરાંત કેટલાક નકલી એજન્ટોએ વિદ્યાર્થીઓને નકલી કોલેજોમાં એડમિશન અપાવવાની લાલચ આપી હેરાન કરવાનું શરૂ કર્યું છે.

આ તમામ કારણોને લીધે ભારતીય વિદ્યાર્થીઓ માટે કેનેડા જઈને ઉચ્ચ શિક્ષણ મેળવવું દિનપ્રતિદિન માથાનો દુખાવો બની રહ્યું છે.

આવી સ્થિતિમાં, ચર્ચા વધી છે કે કેનેડાના કાયમી વિકલ્પ તરીકે બીજે શા માટે ન જવાય અને કહેવાની જરૂર નથી કે ઘણા સારા વિકલ્પો મળી રહ્યા છે. ચાલો જોઈએ એ ક્યાં છે.

આયર્લેન્ડ

ભારતીય વિદ્યાર્થીઓ માટે આયર્લેન્ડ પણ કેનેડાનો મહત્ત્વપૂર્ણ વિકલ્પ સાબિત થઈ શકે છે. ડિગ્રી પૂર્ણ કર્યા પછી આયર્લેન્ડમાં ગુણવત્તાયુક્ત શિક્ષણ અને નોકરીના ઘણા વિકલ્પો ઉપલબ્ધ છે. ખાસ કરીને ટેક્નોલોજી, બિઝનેસ અને હેલ્થકેરમાં ઉચ્ચ ડિગ્રી મેળવતા વિદ્યાર્થીઓ માટે. આઇરિશ સરકારના 24- મહિનાના પોસ્ટ- સ્ટડી વિઝા સ્નાતકોને રોજગાર મેળવવાની મંજૂરી આપે છે.

જ્યારે મોટી વૈશ્ર્વિક કંપનીઓની હાજરી મજબૂત જોબ માર્કેટ પ્રદાન કરે છે.
આયર્લેન્ડ વિશે એક સારી બાબત એ છે કે તેનું અંગ્રેજી બોલતું વાતાવરણ અને તેની જીવંત સાંસ્કૃતિક વિવિધતા તેને ભારતીય વિદ્યાર્થીઓ માટે આકર્ષક સ્થળ બનાવે છે. કારણ કે ભારતીય વિદ્યાર્થીઓ પણ સાંસ્કૃતિક આદાનપ્રદાનને પ્રાથમિકતા આપે છે.

ન્યુઝીલેન્ડ

ન્યુઝીલેન્ડે તેની ઉચ્ચ શિસ્તબદ્ધ શૈક્ષણિક પ્રણાલી અને ઉદાર જીવનશૈલી માટે તાજેતરના વર્ષોમાં વિશ્ર્વભરના વિદ્યાર્થીઓને આકર્ષ્યા છે. તે ભારતીય વિદ્યાર્થીઓ માટે પસંદગીનો દેશ બની શકે છે, ખાસ કરીને જેઓ ઉચ્ચ સ્તરના સંશોધન પર ભાર મૂકે છે. અહીંના પર્યાવરણીય વિજ્ઞાન અને ટેકનોલોજીનાં ક્ષેત્રો પણ વૈશ્ર્વિક સ્તરે સ્પર્ધાત્મક છે અને ન્યુઝીલેન્ડ વર્ક વિઝા અને અભ્યાસ કર્યા પછી રહેવા અને અભ્યાસ કરવા માટે સલામત વાતાવરણ પણ આપે છે.

અહીં પર્યાવરણ વિજ્ઞાન અને ટેકનોલોજી ક્ષેત્ર પણ વૈશ્ર્વિક ટક્કરનાં છે અને ન્યુઝીલેન્ડમાં પણ અભ્યાસ પછી કાર્યવિઝા અને રહેવા માટે સલામત વાતાવરણ ઉપલબ્ધ છે. ન્યુઝીલેન્ડનું કુદરતી સૌંદર્ય અદભુત છે, ભારતીય વિદ્યાર્થીઓને પણ સુંદરતા અને આઉટડોર લાઈફસ્ટાઈલ ગમે છે. તેથી, ન્યુઝીલેન્ડ પણ કેનેડા માટે સક્ષમ વિકલ્પ બની શકે છે.

સિંગાપોર

સિંગાપોર તેના ઉચ્ચ શૈક્ષણિક ધોરણો માટે સમગ્ર વિશ્ર્વમાં જાણીતું છે. તે નેશનલ યુનિવર્સિટી ઓફ સિંગાપોર અને નાન્યાંગ ટેકનોલોજીકલ યુનિવર્સિટી જેવી વૈશ્ર્વિક સ્તરે ક્રમાંકિત સંસ્થાઓ ધરાવે છે.

સિંગાપોરનો બહુસાંસ્કૃતિક સમાજ અને સ્વચ્છ અને સલામત વાતાવરણ ખાસ કરીને ભારતીય વિદ્યાર્થીઓને આકર્ષે છે. એટલું જ નહીં, અહીં અભ્યાસ કરવા માટે આંતરરાષ્ટ્રીય વિદ્યાર્થીઓ માટે અનેક પ્રકારની શિષ્યવૃત્તિઓ ઉપલબ્ધ છે, જે અહીં અભ્યાસને વધુ સુલભ બનાવે છે.

મોટા પાયે ભારતીયોની હાજરી પણ ભારતીય વિદ્યાર્થીઓને અનુકૂળ વાતાવરણ પૂરું પાડે છે. સૌથી મોટી વાત એ છે કે સિંગાપોર પાસે ખૂબ જ આકર્ષક જોબ માર્કેટ છે અને સિંગાપોરના ભારત સાથે પણ ગાઢ સંબંધો છે.
આ સિવાય સિંગાપોર પણ ભારતીય વિદ્યાર્થીઓ માટે મનપસંદ સ્થળ બની શકે છે કારણ કે તે ભૌગોલિક રીતે ભારતની નજીક છે.

નેધરલેન્ડ

તાજેતરનાં વર્ષોમાં નેધરલેન્ડે વૈશ્ર્વિક શિક્ષણ નકશા પર નોંધપાત્ર પ્રતિષ્ઠા મેળવી છે. ભારતીય વિદ્યાર્થીઓએ હંમેશાં નેધરલેન્ડમાં રસ દાખવ્યો છે. ત્યાં એક વ્યાપક શૈક્ષણિક વાતાવરણ છે, ખાસ કરીને એન્જિનિયરિંગ, પર્યાવરણીય વિજ્ઞાન અને લલિત કલા ક્ષેત્રોમાં.

નેધરલેન્ડની સંશોધન- સંચાલિત સંસ્થાઓ તેમના નવીન કાર્યક્રમો માટે જાણીતી છે. નેધરલેન્ડની વિઝા નીતિ પણ મૈત્રીપૂર્ણ છે અને બહુસાંસ્કૃતિકતાને સ્વીકારે છે.

તેથી, શૈક્ષણિક રીતે સમૃદ્ધ અને સાંસ્કૃતિક રીતે ઉદાર વાતાવરણની શોધમાં ભારતીય વિદ્યાર્થીઓ માટે નેધરલેન્ડ યોગ્ય સ્થળ બની શકે છે.

જાપાન

જો કે, ભાષાને કારણે ઘણા લોકો જાપાનમાં અભ્યાસ કરવા જતા ડરે છે. પરંતુ જો તમે એન્જિનિયરિંગ અને રોબોટિક્સમાં નિપુણતા મેળવવા માગતા હો, તો થોડી ભાષાની કુશળતા પછી જાપાન તમારા માટે શ્રેષ્ઠ સ્થળ બની
શકે છે.

જાપાનમાં પણ શિક્ષણના ખૂબ ઊંચાં ધોરણો છે અને ખાસ કરીને સંશોધનની ઉત્તમ સુવિધાઓ વિદ્યાર્થીઓ માટે છે.
જાપાન શૈક્ષણિક રીતે સમૃદ્ધ દેશ છે; આ ઉપરાંત, તેમના માટે અહીં મજબૂત જોબ માર્કેટ ઉપલબ્ધ છે. તે ભારતીય વિદ્યાર્થીઓ માટે ખૂબ જ યોગ્ય છે.

ભારતમાં 50 ટકાથી વધુ વિદ્યાર્થીઓ શાકાહારી છે અને જાપાનમાં શાકાહારનું અદ્ભુત અને આકર્ષક વાતાવરણ છે.
તેથી, જો તમે જાપાનીઝ ભાષા શીખવા માટે સખત મહેનત કરો તો ખાસ
કરીને રોબોટિક એન્જિનિયરિંગમાં ઉચ્ચ શિક્ષણ મેળવવા માગતા ભારતીય વિદ્યાર્થીઓ માટે જાપાન શ્રેષ્ઠ વિકલ્પ બની શકે છે.